Yòhanɛ̀s 18
18
Wo le Yesù
(Màt 26.47-56; Mrk 14.43-50; Luk 22.47-53)
1Kè e gblɔ̃ ènyà kèa vɔ̀a, Yesù ku yebe nukplaviwo sò Kedrɔ̀n be ètɔ̀ sàsraa, jè àgo ɖèa ji. Àbɔ ɖe lè funu; Yesù ku yebe nukplaviwo ɖo e mè. 2Yudà, àmè kè le xɔ̀ kpli na ɛ̀a, cã jèsi àfi kèa, ɖo Yesù ku yebe nukplaviwo bɔ̀nà lè funu eji-eji. 3Yudà nɔ̀ ŋùkɔ̀ na gbãdãgbãwo ku mawuxɔ nuɖiatɔ kèwo * mawunɔ gãwo ku Farizìwo na ɛ̀awo. Wo hɛ̃ kãligbɛ̃ ku kakati kudo lãnuwo ɖo àsi, eye wo ɖo àbɔ a mè. 4Ekè Yesù nya ènu kèwo keŋu la jɔ̀ ɖo e jiawoa, e zɔ̃ yì dogò wo, eye be biɔ wo be: “Àmè kɛ ye mì le ji ò?” 5Wo ɖo e ŋuti na ɛ̀ be: “Yesù Nazarɛttɔ̀a.” Eye, be gblɔ̃ na wo be: “Ènyè ye.” Yudà, àmè kè le xɔ̀ kpli na ɛ̀ cã lètè lè àmèawo dòmè. 6Ekè Yesù ɖo e ŋuti na wo be: “Ènyè ye à”, wo dɔ̃ yì ŋùgbe, eye wo jè ànyi. 7Yesù gbà biɔ wo, zè èvègɔ̃a be: “Àmè kɛ ye mì le ji ò?” Wo gbà ɖo e ŋuti na be: “Yesù Nazarɛttɔ̀a ye.” 8Eye Yesù ɖo e ŋuti na wo be: “Mù gblɔ̃ na mì be ènyè ye. Ne ènyè mì le jia, mì tàsi àmè kèawo ya ne woa jo.”
9Nène a ye ènyà kè Yesù ŋutɔ gblɔ̃ ɖɛ be: “Nyè mu bu àmè ɖèka lè àmè kèwo wò sɔ do àsi na mùawo dòmè ò” zɔ̃ sùa yeŋu. 10Simɔ̀n Petrò kè si èwui lèa, ɖè è to lè àku mè, dà ɛ̀, eye be kpà ɖùsimè be èto na * mawunɔ gãa be sumɔ̃via. Wo yɔna sumɔ̃via be Malkò. 11Vɔ̀a Yesù to na Petrò be: “Sɔ èwui wòa ɖo yebe àku mè. Nyè mu la nù àyàɖùɖu be kogò kè Àta ɖo ɖɛ na mùa?”
Wo kplɔ̀ Yesù yì Hanà be ŋùkɔ̀
12Wàlɛbɛ ŋua ye gbãdãgbãwo be èhaa ku yebe àhùaga, kudo Yudàviwo be sumɔ̃viwo le Yesù, eye wo bla ɛ̀. 13Wo kplɔ̀ ɛ̀ yì Hanà kè nyi Kayafà be ètoa gbɔ cucugbã, ɖo Hanà ye le nyi mawunɔ gã, lè èpè ŋua mè. 14Kayafà ye nyi àmè kè ɖo àɖàŋù na Yudàviwo be: “Ne àmè ɖèka ku ɖo dùkɔ̃a taa, e nyɔ wu be àmè sia àmè ne ku.”
Petrò be yè mu nyi Yesù be nukplavi ò
(Màt 26.69-70; Mrk 14.66-68; Luk 22.55-57)
15Simɔ̀n Petrò kudo *nukplavi bu kpàsà Yesù do. Ekè nukplavi ŋua nyi mawunɔ gãa be àmè nyanya, e kpàsà Yesù do yì mawunɔ gãa be àxomè. 16Vɔ̀a Petrò yaa, ci àgboa ji lè xixenu, eye *nukplavi kè nyi mawunɔ gãa be àmè nyanyaa, to va yì pò nupo kudo nyɔ̃nù kè lè ɖia àgboa nua. E yomè a, nukplavia kplɔ̀ Petrò ɖo àxuea mè. 17Nyɔ̃nù kè le ɖia àgboa nua gblɔ̃ na Petrò be: “Mu nyi Yesù be nukplaviwo dòmètɔ ɖèka ye wò cã wò nyia?” Petrò ɖo e ŋuti na ɛ̀ be: “Aò, nyè mu lè woa dòmè ò.”
18Ekè àvìvɔ lèa, mawunɔ gãa be sumɔ̃viwo kudo mawuxɔ ɖiatɔwo do èzò, eye wo le pu ì. Petrò cã lè woa dòmè le pu èzòa kudo wo.
Mawunɔ gãa biɔ ènyà Yesù
(Màt 26.59-66; Mrk 14.55-64; Luk 22.66-71)
19Mawunɔ gãa biɔ ènyà Yesù so yebe nukplaviwo kudo yebe ènufiɔfiɔ ŋuti. 20Yesù ɖo e ŋuti na ɛ̀ be: “Mù pò nupo àgbãŋùgbà lè àmè sia àmè be ŋùmè. Mù fiɔ ènu lè bɔ̀bɔ̀pewo kudo mawuxɔa mè, lè àfi kèwo Yudàviwo keŋu bɔ̀nà lèa. Nyè mu bènà keŋu gbɔ̀xue pònà nupo ò. 21Nukɛ ŋuti ènyè ye wò gbà le biɔ ò? Ènyà kèwo mù gblɔ̃a, biɔ àmè kèwo ɖo èto mùawo, ɖo woawo yaa, wo nya ènu kèwo mù gblɔ̃ na woa.” 22Lè ènyà kèawo yomè a, mawuxɔ ɖiatɔa ɖèka kè lètè lè e gbɔa, pò ètomè na ɛ̀ gblɔ̃ be: “Nène ye wò la ɖo ènyà ŋuti na Mawunɔ gãa?” 23Yesù ɖo e ŋuti na ɛ̀ be: “Ne ènu kè mù gblɔ̃a mu sɔ̀gbè òa, ɖè è fiɔ mù. Vɔ̀a, ne ènu nyuɛ̃ ye mù gblɔ̃a, nukɛ ŋuti ye wò pò mù ɖo ò?” 24Yesù kpɔ̀tɔ̀ lè babla nène, eye Hanà ɖo è ɖoɖa Kayafà mawunɔ gãa.
Petrò gbà gbe Yesù ke
(Màt 26.71-75; Mrk 14.69-72; Luk 22.58-62)
25Wàlɛbɛ ŋua Petrò kpɔ̀tɔ̀ lè àfi kè be le pu èzò lèa. Wo biɔ ɛ̀ be: “Mu nyi Yesù be nukplaviwo dòmètɔ ɖèka ye wò cã wò nyia?” Petrò mɔ ènu be: “Nyè mu lè woa dòmè ò.” 26Mawunɔ gãa be sumɔ̃viwo dòmètɔ ɖèka kè do xòmè kudo àmè kè be èto Petrò sòa, gblɔ̃ na ɛ̀ be: “Nyè mu kpɔ wò ku ì lè àbɔ a mè ò a?” 27Petrò gbà mɔ ènu ke, eye gà ŋua mè tutua, kòklo ku àtɔ.
Wo kplɔ̀ Yesù va Pilatò gbɔ
(Màt 27.1-2, 11-14; Mrk 15.1-5; Luk 23.1-5)
28Wàlɛbɛ ŋua, wo kplɔ̀ Yesù so Kayafà gbɔ yì kòjoɖopea. E le nyi ŋùdekɛ̃nyɛ fùtùu. Vɔ̀a woa ŋutɔwo mu ɖo kòjoɖopea mè ò, ne wo mu gbà pòɖi woa ɖokoewo ò, àleke be woa teŋu ɖù Toŋutivayì be àzãa. 29Ye ŋutia Pilatò to va yì kpɔ wo, biɔ wo be: “Àgɔ̀ kɛ ye ŋusù kèa jè do mì ò?” 30Wo ɖo e ŋuti na ɛ̀ be: “Ne mu wɔ̀ ènuvuɛ̃ ɖe ò a, mi mu la kplɔ̀ ɛ̀ va na wò ò.” 31Pilatò gblɔ̃ na wo be: “Mìa ŋutɔwo mì kplɔ̀ ɛ̀ yì, ne mìa ɖo kòjo na ɛ̀ sìgbè àlekè mìabe *èse biɔa nène.” Yudàviwo ɖo e ŋuti na ɛ̀ be: “Wo mu na mi ègbè be mia wù àmè ò.”
32Nène a, Yesù be ènyà kè be gblɔ̃, sɔ ɖè èku kè ŋùmè be la kua fiɔa, zɔ̃ sù. 33Pilatò gbà trɔ yì èfìɔsaa mè. E yɔ Yesù, biɔ ɛ̀ be: “Èwò ye nyi Yudàviwo be èfìɔa?” 34Yesù ɖo e ŋuti na ɛ̀ be: “Wò ŋutɔ kpò ye bù ì nènea, àlo àmè buwo ye to ɛ̀ na wò so ŋuti nyè?” 35Pilatò ɖo e ŋuti na ɛ̀ be: “Yudàvi ye ènyè ya, mù nyia? Wò ŋutɔ àpo dùkɔ̃ kudo mawunɔ gãwo ye kplɔ̀ wò va do àsi mè na mù! Nukɛ ye wò wɔ̀ ò?” 36Yesù ɖo e ŋuti be: “Àpe fìɔɖùɖu mu nyi xixe kèa mè tɔ̀ ò. Ne fìɔdu nyè kè nyi xixe kèa mè tɔ̀a, tɔ̀ nyèwo la kè wɔ̀ àvũ ne wo mu gbà do mù àsi na Yudàviwo be àmègãwo ò. Vɔ̀a, fifìa, àpe fìɔɖùɖu mu so fikèa ò.” 37Pilatò gbà biɔ ɛ̀ be: “Eŋuã èfìɔ ye wò nyia?” Yesù ɖo e ŋuti na ɛ̀ be: “Èwò ye le gblɔ̃ be mù nyi èfìɔ. Wo jì mù, mù va xixea mè, ne ma ɖù ɖase na nyàwo a. Àmè ɖekpekpe àmè kè nyi nyàwo be àmèa, ɖona èto mù.” 38Pilatò biɔ ɛ̀ be: “Nukɛ ye nyi nyàwo a ò?”
Wo sò èku kòjo na Yesù
(Màt 27.15-31; Mrk 15.6-20; Luk 23.13-25)
Kè Pilatò gblɔ̃ ènyà kèawoa, e gbà to yì xixenu, yì kpɔ Yudàviwo. E to na wo be: “Nyè yaa, nyè mu kpɔ àgɔ̀ kè ŋusù kèa jè, ne ma sɔ gblehùɛ do è ò. 39Vɔ̀a, sìgbè àlekè wo wɔ̀nà ɛ̀ lè mìa gbɔ nènea, mù ɖènà gàmènɔ̀tɔ ɖèka to na mì lè Toŋutivayì be àzãa gbè. Ye ŋutia, mì jro be ma ɖè àsi lè Yudàviwo be èfìɔa ŋuti na mìa?” 40Wàlɛbɛ ŋua woa kpata wo do àpa be: “Mu nyi ŋusù kèa ò, vɔ̀a Barabas!” Vɔ̀a Barabas yaa, èhlɔ̃dãtɔ ye be jo nyi.
Pašlaik izvēlēts:
Yòhanɛ̀s 18: GEN
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Mina Bible © Bible Society of Togo, 2014.