Gɔ̃mèjèje be Xoma 6
6
Èsìɖɔɖɔ èdù gbàjàtɔ̀a
Àgbètɔwo be ènu tovò wɔ̀wɔwo
1Wàlɛbɛ kè àmèwo le sùgbɔ ɖo ji lè ànyigbã ji eye wo le jì nyɔ̃nùviwoa, 2Mawu be èvi ŋusùwo kpɔ be àgbètɔ be èvi nyɔ̃nùwo nyakpɔ eye wo sɔ nyɔ̃nùvi kèawo sɔ wɔ̀ èsrɔ̃ lè woa ŋutɔ be èjro nu. 3Tɔhonɔ̀ gblɔ̃ be: “Gbɔ̃gbɔ̃ nyèa ma kplɔ̀ àgbètɔ kaka yì ò, kùɖo yebe vuɛ̃wo ŋutia: ŋutilã kpò e nyi eye yebe àgbè nɔ̀ zã la nyi èpè èkà ètɔ̃ (120).” 4Lè hùe ŋua nua, àmè glàjàwo lè ànyigbã ji eye wo kpɔ lè wàlɛbɛ kè ye Mawu be èvi ŋusùwo va le ɖè àgbètɔ be èvi nyɔ̃nùwo ye wo le jì èvi na woa. Woawo ye nyi xoxotɔwo be àmè xɔ̀asìwo, àmè xɔ̀ nyikɔ ŋuawo.
5Ekè Tɔhonɔ̀ kpɔ be àgbètɔ be àdɔ̀mèvuɛ̃ wɔ̀wɔ le hùã ɖo ji lè ànyigbã ji so ŋùkèkè yì ŋùkèkèa ye àgbètɔ be èjìmè mu jìjɔ èvuɛ̃ susu òa, 6e ve Tɔhonɔ̀ be yè wɔ̀ àgbètɔ ɖo ànyigbã ji. E do àdɔ̀mèze. 7Eye e gblɔ̃ be: “Mù la tutu àmè kè mù ɖoa lè ànyigbã ji, àgbètɔ, ègbemèlã ku àxomèlã; wuwlui ku gãgãwo, kudo àyamèxèviwo ŋutɔ cã, ɖo e ve mù ŋutɔ be mù ɖo wo.” 8Vɔ̀a, Nɔà fɔ̀ màje lè Tɔhonɔ̀ be ŋùmè.
9Nɔà be xòmè ye kè: Nɔà àmè jɔ̀jɔɛ, nyi àmè mà-ɖo ŋùmèkãkã ɖe lè jìjimèwo dòmè lè yebe hùenu. Eye e zɔ̃nà ku Mawu. 10E jì èvi ŋusù ètɔ̃: Sɛm, Cam kudo Jafɛ̀t.
11Xixea dà lè Mawu be ŋùmè eye e ɖɔ ku ènu drã wɔ̀wɔ. 12Mawu ɖèkɔ̀ kpɔ xixea eye e kpɔ yebe dàda, ɖo ŋutilãwo kpata dà lè Tɔhonɔ̀ be ɖoɖowo ji lè ànyigbã ji. 13Mawu gblɔ̃ na Nɔà be: “Ŋutilãwo kpata be cɔ̃crɔ̃ ɖo fifìa vɔ̀! Ɖo àmèwo be wɔ̀na na be ènu drã ɖɔ ànyigbã kpata ji. Eye mù la crɔ̃ wo ku xixea.” 14“Kpà àɖakàhũ ku àti nɔ̀ èsì ji. Wò la wɔ̀ àɖakàhũ kè mè èxɔ̀wo la nɔ̀a. Wò la sì àŋɔ̀ ɖo e ŋuti ku e mè. 15Wò la wɔ̀ àɖakàhũ kèa, e la dìdì àbɔ èkà adrɛ̃ takpo (300), e la kèkè àbɔ èkà ci èwo (50) eye e la yì ji àbɔ ègbã (30). 16Wò la gba àɖakàhũa eye e la dà èsì àbɔ ɖèka. Wò la ɖè hɔ̃tru na ɛ̀ lè àkpa ɖèka, eye wò la kpà àɖakàhũa ɖo àsãŋu tèpe ètɔ̃ ji. 17Mù la na èsì la ɖɔ ànyigbã kpata ji, ne bèa crɔ̃ ènu ɖekpekpe kè mè àgbè lè, lè xixea mèa; ènu sia ènu kè lè ànyigbã jia la ku. 18Mù la trɔ wɔ̀ zòɖùɖu ku wò. Wàlɛbɛ ŋua, ɖo àɖakàhũa mè, èwò ku èvi wòwo kudo èsrɔ̃ wò gbàkudo èvi wòwo be èsrɔ̃wo. 19Sɔ ènu àgbèagbèwo ku ŋutilãwo kpata be èvè-èvè do àɖakàhũa mè ne woa nɔ̀ àgbè ku wò; sɔ wo àsu ku ènɔ! 20Àyamè xèviwo lè woabe dɛnu, àxomèlãwo lè woabe dɛnu, ègbemèlãwo lè woabe dɛnu; lè woa dòmèa, wò la sɔ wo èvè-èvè lè woabe dɛnu ne woa nɔ̀ àgbè ku wò. 21Eye, wò la sɔ ènu ɖekpekpe kè nyi ɖùɖua ne woa ɖo ŋùgbe dàɖɛ. Ekèa ye la nyi àpo ènuɖùɖu ku woa tɔ̀.” 22Eye Nɔà wɔ̀ ɛ̀. E wɔ̀ ɖo àlekè Mawu fiɔ ɛ̀a ji tututu.
Pašlaik izvēlēts:
Gɔ̃mèjèje be Xoma 6: GEN
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Mina Bible © Bible Society of Togo, 2014.