Èdɔwɔ̀wɔwo 3
3
Èdɔ̀dàda na kpòtɛ̃ ɖe lè mawuxɔa mè
1Gbè ɖèkaa, Petrò ku Yòhanɛ̀s le yì mawuxɔa mè, ne wètrɔ gà ètɔ̃ be kuefãa. 2Ŋusù ɖe lè, kè kplibɔ, so wàlɛbɛ kè wo jìa ke, lè funu. Gbè sia gbèa, wo kɔna ŋusù kèa va ɖona mawuxɔa be àgbo kè wo yɔna be “Àgbo nyuɛ̃a” ji, ne bèa nɔ biɔ ènu àmè kèwo tona funu yìnà mawuxɔa mèawo. 3Ekè ŋusù kèa kpɔ Petrò ku Yòhanɛ̀s lè ɖo èta mawuxɔa mèa, e biɔ wo ènu. 4Petrò ku Yòhanɛ̀s kpɔ ɛ̀ dũu, eye Petrò gblɔ̃ na ɛ̀ be: “Nɔ kpɔ mi!” 5Nène a, kpòtɛ̃a fɔ̀ ŋùkuvi ɖo woa ji, le susu be wo la na yè ènu ɖe tètè. 6Petrò gblɔ̃ na ɛ̀ be: “Nyè mu ɖo klòsalò ò, nyè mu ɖo sìka ò, vɔ̀a, ènu kè mù ɖoa, mù sɔ le na wò. Lè Yesù Kristò, Nazarɛttɔ̀a be nyikɔ mèa, sitè ne wòa zɔ̃!” 7Eye e le yebe ɖùsi-lɔa, kɔ ɛ̀ sitè. Zè ɖèkaa, kpòtɛ̃a be àfɔ̀wo ku yebe àfɔ̀kɔ̃nuwo sɛ̃ŋu. 8Eye e tìkpo, nɔ̀tè, tɔ zɔ̃zɔ̃, eye be kpàsà wo do, yì mawuxɔa mè. E le zɔ̃, eye be le tìkpo, be le kafu Mawu. 9Eye àmèwo keŋu kpɔ ɛ̀, be le zɔ̃, le kafu Mawu. 10Ekè àmèwo keŋu va nya be ŋusù kè nɔ̀nà ànyi, biɔna ènu lè Àgbo nyuɛ̃a ji, lè mawuxɔa nua ye à, wo kã yàa, eye ènu ku na wo, ɖo ènyuɛ̃ kè jɔ̀ ɖo e jia ŋuti.
Petrò pò nupo lè mawuxɔa mè
11Ŋusùa mu gbà trɔ lè Petrò ku Yòhanɛ̀s yomè ò, eye ènu kèawo wɔ̀ ŋùdã na àmèwo, eye woa keŋu sidù va kpɔ wo, lè àfi kè wo yɔna be “Salomɔ̀n be àwaa mè.” 12Ekè Petrò kpɔ àmèha a, e gblɔ̃ na wo be: “Izràɛlviwo, nukɛ ŋuti ènu kèa wɔ̀ ŋùdã na mì ɖo ò? Nukɛ ŋuti mì fɔ̀ ŋùkuvi ɖo mia ji, sìgbè mi sɔ mia ŋutɔwo be ŋusɛ̃, àlo miabe mawumenyinyi wɔ̀ be ŋusù kèa le zɔ̃ nène ò? 13Mawu kè nyi Abràham, Izàk, Yakɔb ku mia tɔgbewo be Mawu a ɖè gogo na yebe sumɔ̃vi, Yesù. Yesù kè mì do àsi, eye mì mɔ ɛ̀ lè Pilatò be ŋùmè, wàlɛbɛ kè e ya jro la ɖè àsi lè e ŋutia. 14Mìawo yaa, mì gbe àmè kè nyi àɖèsãme ku àmè jɔ̀jɔɛa, eye mì biɔ be wo ne ɖè àsi lè èhlɔ̃dãtɔa ŋuti na yèwo. 15Mì na wo wù àmè kè nyi àgbè be èfìɔvia. Vɔ̀a, Mawu fɔ̃ ɛ̀ so àmè kukuwo dòmè, eye mi nyi ekèa be ɖàsèfowo. 16To xɔ̀sè kè ŋusù kèa ɖo na Yesù be nyikɔ mè jia, nyikɔ kèa do ŋusɛ̃ ŋusù kèa, kè mì le kpɔ, eye mì jèsia, eye xɔ̀sè kè so Yesù mèa na be ŋusù kèa gã keŋu-keŋu lè mìa kpata mìa be ŋùmè.”
17“Fifìa, nɔ̀viwo, mù nyà be, mìabe wɔ̀na nɔ̀ ènu mànya mè sãa, sìgbè mìabe ŋùkɔ̀nɔ̀tɔwo tɔ̀ nène. 18Vɔ̀a, Mawu ya na yebe gblɔ̃ɖɛtɔwo keŋu gblɔ̃ gbè ɖe gbè ke, be yebe Mɛ̀sia ɖo la kpe èfũ. Ekèa ye be wɔ̀. 19Ye ŋutia, mì ɖɔ̀lì èdɛ̃, eye mìa trɔ va Mawu gbɔ, ne bèa tutu mìabe èvuɛ̃wo. 20Tɔhonɔ̀ Mawu la ɖo fàfa hùenu kè be ɖo ɖɛ na mìa ɖoɖa, wàlɛbɛ kè be la dɔ̃ *Mɛ̀sia kè nyi mìa tɔ̀a ɖoɖa mì. Mɛ̀sia kèa ye nyi Yesù. 21Vɔ̀ fifìa, Yesù Kristò la nɔ̀ Mawu gbɔ gbɔ̀xue, kaka sɔ na gà kè mè Mawu la gbìgbɔ̀ jɔ̀ ènuwo keŋu, sìgbè lekè be gblɔ̃ ɛ̀ ɖɛ xoxo, to yebe gblɔ̃ɖɛtɔ kɔ̀kɔ̀ɛawo jia nène. 22Mosè gblɔ̃ be: 'Tɔhonɔ̀, mìabe Mawu la na yebe gblɔ̃ɖɛtɔ ɖe la to lè mìabe dùkɔ̃a mè, sìgbè àlekè e na mù to lè e mèa nène. Mìa ɖo èto ènu kèwo keŋu be la to na mìawo. 23Àmè sia àmè kè mu la ɖo èto gblɔ̃ɖɛtɔ ŋua òa, wo la ɖè è to lè dùkɔ̃a mè, eye wo la wù ì.' 24So Samuɛl ji, kaka va jè àmè kèwo ye jè e yomè awo jia, gblɔ̃ɖɛtɔwo kpata pò nupo, àmè sia àmè, lè yebe hùenu, ɖè gbèfã ènu kèwo mi le kpɔ egbèawoa. 25Mìa tɔ̀ ye nyi fìãfìã kè Mawu wɔ̀ to gblɔ̃ɖɛtɔwo jia, eye mì ɖo mamã lè Mawu be èzò ke be ɖù ku mìa tɔgbewo mè, wàlɛbɛ kè be gblɔ̃ na Abràham be: 'jìjimèvi wòwo ji mù la to, la tusì na ànyigbã ji be xòmèwo keŋu.' 26Mìawo ŋuti ye Mawu na yebe sumɔ̃via jɔ̀ lè mia dòmè, eye be ɖo è ɖoɖa, ne bèa tusì na mì, lè ekèa mè be, bèa trɔ àmè sia àmè lè yebe àgɔ̀wo yomè.”
Pašlaik izvēlēts:
Èdɔwɔ̀wɔwo 3: GEN
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Mina Bible © Bible Society of Togo, 2014.