Jean 7
7
Yeesu naalib kaa fōō-u ki kíí
1Míǹ boonee, Yeesu nìn kíǹ ki bíi yìiǹ Galiilee timmun, kaa là kí yìiǹ Juudee watil, kun puee Juuda yab yidambi nìn nyàab̀ kí kpɔ̀-u. 2Juuda yab jiŋaaliu un bi yíì Tibìń jiŋaaliuee#7.2 Tibìń jiŋaaliuee nìn jīǹ kinyɔmmɔŋ ní. Jiŋaal gbanti nìn kpáfí nì kuceeu jiŋaaliu ní. Jiŋaal gbanti poonee, bi téetí bi-naanjab nín nìn kāl̀ kuteeun puee. Adican nìn kóò tibìń tin bi gāā jiŋaal gbanti puee poon ní. Kpèè Akoo 23.34-36, Ditee 16.13. tóobińee, 3ní Yeesu naalib bí-u yii: «Yīkì doo kí nīn cá Juudee, án nín làá ŋá pu a-boonnooliibi mun ń tin ká atuun ŋin a tūǹee. 4Unil yaa là bí ká-uee, waa gíti tūǹ u-tuuŋŋi dibalin, míǹ puee, tɔ̄ a-tuuŋŋi gbanti báà ŋma ń ká.» 5Di sá yii Yeesu naalib mun gba kaa nìn là kí fōō-u kí kíí. 6Niinee ní Yeesu kíí-bi yii: «An yaa sá nimbee, iyunti kɔkɔ pée ŋān̄ ki tīī-ni ní, man yuntiŋu kaa láá bāań. 7Duulinya yab kaa ŋūǹ kí nīn ná nimbi, ama bi ná man, kun puee man sòoǹ yii tin bi ŋáańee sá atuŋkpiti. 8Nimbi nín̄ cámaan jiŋaal gbanti. Man kaa làá cù. Di sá yii m-yuntiŋu kaa láá ŋmāntì.» 9U lī-bi mimmee, ní ki gbíntìi kā Galiilee.
Yeesu cūtì Tibìń jiŋaaliu
10U-naalib búntì jiŋaal gbanti, boonee ní u mun dāa dī dibalin ki cūtì, kaa là bí ká-u. 11Jiŋaal gbantinee, Juuda yab kpilib nìn nyàab̀-u ki bàlifī tɔb yii: «U nín bí la dee?» 12Ní binib tikpil nìn lɔ́kɔfí Yeesu bɔti pu samaa kansikin, biba bí yii: «U sá unimɔnti.» Ní biba mun bí yii: «Waa sá unimɔnti, u sá uŋmatinli ní.» 13Míǹ puee, ubɔ kaa nìn sòoǹ mpɔn, di sá yii bi nìn fàŋkí Juuda yab kpilib.
14Bi jíń jiŋaal ki kɔ́ kansikinee, ní Yeesu nín jɔ́ḿ kunimbɔtidiin ki cūtìi bíi dàkà binib. 15Juuda yab kpilib nìn bākatì sèeee, ní ki bíi lì yii: «An ŋá mana ní unil nee nyí Unimbɔti gbɔŋku míǹ, úǹ un kaa ŋá an sukuliuee#7.15 Dūú ŋmàntī nì Maat 13.54, Luuki 2.47.?» 16Ní Yeesu bí-bi yii: «M-dàkatam nee nyēeń un túnní-mee cee ní, an kaa sá man m-ba dàkatam. 17Un yaa là kí ŋá min Unimbɔti lèe, udaan làá béé m-dàkatam nee yaa nyēeń Unimbɔti ceeyaaa, an yaa tí sá man m-ba pɔŋŋu pu ní m sòoǹ. 18Un sòoǹ u-ba bindi puee nyàab̀ kí yòon̄ u-ba yilpu ní, ama un nyàab̀ kí yòon̄ un túnní-uee yindi yilpuee di cáá ibaamɔn, nnyimɔn kpá udaan úǹ ni. 19Mooyiisi di nìn tīī-ni marab àá an kaa sá míǹ? Kin, ba ŋá ní ni-kansikin báà ubɔ kaa tɔ́ marab gbanti? 20Ba di yì-tì ní ni là kí kpɔ̀-mi?» Ní samaayee bí-u yii: «Arasinii kā a-pu níii? Ŋma di là kí kpɔ̀-si ní?»
21Ní Yeesu kíí-bi yii: «Ditumbaantiil din m ŋá ŋwiŋŋuŋfikaa dalee pu ní ni kɔkɔ bākatì nee. 22Ama ni kíikí ki gífí ni-biyaamu akpancan ŋwiŋŋuŋfikaa dal, kun puee Mooyiisi di nìn tīī-ni mara gbanti#7.22 Kpèè Akoo 12.3, Diny 17.10-13.. - Ama an kaa nìn sá Mooyiisi di náanní, doooo ni-naanjab ní an nìn kíliń. - 23Ni nín kaa là kí yìntī Mooyiisi marabee puee, ní ni gífí ŋwiŋŋuŋfikaa dal. Mimmee, ba pu ní ni fōō man pu diŋuul yii m cáaǹ uninja ubɔ weeŋyi kɔkɔ ŋwiŋŋuŋfikaa dal? 24Ní taa pɔ̀ digàndi ama ní tɔ́kɔń ibaamɔn pu kí sòoǹ nì deedee#7.24 Dūú ŋmàntī nì Akoo 19.15, Yees 11.4..»
Yeesu di kalin sá Meesiyaaa?
25Niinee ní Jeerusaleem yab biba bíi lì yii: «An kaa sá un bi là kí kpɔ̀ee deeee? 26Kin, an ŋá mana ní u yú ki tɔ́ u-ba mpaampiin pu doo ki sòoǹ, ubɔ kaa bíi lì-u tiba! Àá biyidambi kalin béè yii úǹ di sá Meesiya ní? 27Ama uninja nee úŋ̀wuee, ti nyí laakin u nyánnée, an yaa sá Meesiyayee, ubɔ kaa dāa béetí laakin ní úǹ sée.»
28Ŋyuntee, Yeesu nìn bí kunimbɔtidiin ki dàkà, ní ki téeń mpɔn yii: «Ni nyí-mi, ki nyí laakin mun m sée yaa! Maa dɔ́miń m-ba pu, un sá ibaamɔndaanee di túnní-mi, ní naa nyí-u. 29Ama man nyí-u, kun puee u-cee ní m nyánní, úǹ di túnní-mi.» 30Niinee ní bi bíi nyàab̀ kí cúú-u, ama báà ubɔ ŋal kaa máań u-pu, kun puee u-yuntiŋu kaa láá bāań. 31Samaa kansikinee, binib tikpil nìn fōō-u ki kíí, ní ki lì yii: «Mimmee, Meesiya yaa láa bāańee, u dāa ŋūǹ kí ŋá maamaacib kí jītíǹ kijapaai nee deeee?»
Bi tú bí bàà cù kí cúuń Yeesu
32 Fariisab nín gbìl̄ samaa bíi sòoǹ Yeesu pu míǹ bi-ŋmaniŋmee, ní bi nì bisaraaŋakpilib tú soojab ń cù kí cúuń-u. 33Ní Yeesu tùkū-bi yii: «Ŋyunti fiii ní m làá gíti ŋá ni-kansikin, ní kí nīn gítí un túnní-mee cee. 34Di sá yii ni làá dāá nyàab̀-mi, kaa làá dāá ká-mi, kun puee naa làá dāá ŋmā kí dāan̄ laakin m làá nīn bée.» 35Niinee ní Juuda yab kpilib bíi bàlifī tɔb yii: «La ní u kalin nín cá ní ki nín tùkù-ti yii taa làá ŋmā kí ká-u ní? Àá, u làá kalin cù Juuda yab bin yàl̄ ki kɔ́ Greeki yab timmunee cee kí dàkà Greeki yab Unimbɔti bɔti ní? 36U nín bí yii: Ni làá nyàab̀-mi, kaa làá ká-mi, ki gíti lī-ti yii: Naa làá ŋmā kí dāan̄ laakin m làá nīn bée, taapu nín sá yii ba dee?»
Ibun in nyim tìì dimaŋfalee
37Ŋwiin ŋun jiŋaal kúntée bɔti di nìn páb́#7.37 Kpèè Akoo 23.36.. Ŋwiin gbanti ní Yeesu nìn yúl̀ samaa kansikin ki téeń yii: «Un ní nnyinnyoo yaa cááyee ń dāan̄ m-cee kí nyɔ̀! 38Un di yaa fōō-mi ki kííyee, nnyim min tìì dimaŋfalee làá kpántí mbun kí nīn pùub̀ udaan pɔbilin, kii Unimbɔti gbɔŋku poon an nín ŋmàn̄ ki síiǹ puee#7.38 Dūú ŋmàntī nì Eesee 47.1, Saka 14.8..» 39Bin fōō Yeesu ki kííyee nín làá fōō Unimbɔti Fam miŋyee pu ní Yeesu nìn bíi sòoǹ nì bi. Ŋyunti gbantee, Unimbɔti Fam kaa láá dɔ́miń kun puee Yeesu kaa nìn dáá fōō u-nyooti.
Samaa yākatì Yeesu pu
40Kunipaauee kansikin biba gbìl̄ an nyɔɔbuŋŋee, ní ki bí yii: «Unil nee lafun sá Unimbɔti bɔnaatiliu un ti cée ní!» 41Ní biba mun bí yii: «Úǹ di sá Meesiya!» Ní biba mun gíti bí yii: «Meesiya ŋūǹ kí nyānní Galiileeee? 42Ama Unimbɔti gbɔŋku tùkù-ti yii Meesiya làá dāá nīn sá Daafiidi maaliŋun, ní ki sá Beetileem, kitiŋ kin ni Daafiidi nìn sée#7.42 Kpèè 2 Sami 7.12, Miika 5.1, Maat 2.5..» 43Yeesu puee kunipaauee nìn cúu yākatì mili. 44Ní bi-kansikin biba bàà nìn là kí cúú-u, ama báà ubɔ ŋal kaa máań u-pu.
Juuda yab tindaŋkpilib kaa fōō Yeesu ki kíí
45Soojab nín fātìi gítì bisaraaŋakpilib nì Fariisab ceeyee, ní bi bālifì soojabee yii: «Ba ŋá ní naa cáań-u ní?» 46Ní soojab kíí-bi yii: «Doooo nee, taa láá ká ubɔ sòoǹ kii kijapaai nee!» 47Ní Fariisab fātìi bí soojabee yii: «Ni mun yāntì u kíil̀-ni naaa? 48Ni ká biyidambi kansikin ubɔ àá Fariisab kansikin ubɔ fōō-u ki kííii? 49An sá binifantantiibi bin kaa nyí Unimbɔti marab ki sá mbusudambee, bíǹ di fōō-u ki kíí.»
50Niikoodeem un nìn cūtìi ká Yeesu ŋyunti ŋubɔee mun nìn ŋmàl̄ Fariisab kansikin. Úǹ di bí yii: 51«Ti-marab poonee, an pú-ti nsan tí kpɔ̀ unil bɔti fám, kaa bālifì-u ki béè kun u ŋéeee#7.51 Dūú ŋmàntī nì Ditee 1.16.?» 52Ní bi kíí-u yii: «A mun sá Galiilee níii? Nyàab̀ Unimbɔti gbɔŋku poon kí kpèè! Aa làá ká bi ŋmàn̄ laaba yii Unimbɔti bɔnaatiliu ubɔ nyánní Galiilee.»
Yeesu fīī kinimpulaakpaai kiba
[ 53Niinee ní bi-kɔkɔ yāaǹ ki nín kùn̄ bi-dumpui.
Pašlaik izvēlēts:
Jean 7: BASSARDC
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
BIBLE EN N'TCHAM (Bassar) © Alliance Biblique du Togo, 2013.