ทิน เต่ย โต้ว 19
19
โสโดม เหธา โกโมลา ฒี่ง หฒุ เหมียด
1วั้ว เต๋ย อี เต้า ฟิน-เมี่ยน มี่ง เถา โสโดม ฒี่ง วั้ว หฒั่น, ลู่ง ม์าน-หฮมวัง อ๊ะ. โล้ด เฒว์ย เจี๊ยน วั้ว ฒี่ง แก้ง ด่าง. เยี้ยด ปวัด นิ่น บัว อี เต้า นิ่น เจี์ย ซิน มี่ง ฒิบ, ฯฒฯ พัวะ เหฌี่ย เดา 2ก๊อง, “ต้ม ก๋อ อ่า, โท้ เม่ย บัว ต้าย ฮิด เยีย, เม่ย เญย โปว, เญย เปย๊า. ไฮ่ หฑาว เหฒา, เปว๋ย ม์วน, ฌัง ดอม เจี์ย ซิน เฑี้ยว เญย มต้าย มี่ง.”
นิ่น บัว เตา, “ไม้ หฒุ อ๊ะ. เยีย บัว เปว๋ย น้าย ฒี่ง เญย ต้ม หฒวัง หฒ่าม หย่า ตุ๊ เญย.”
3มป่า โล้ด ชะ! โท้, นิ่น บัว ฯฒฯ เหธา เจี๊ยน โล้ด หฑวน, เปียะ นิ่น เญย เปย๊า. โล้ด หลิ่ว เล์ย หญั่น ฮบ, ฒิ ไม้ อัน ปี๊ง เญย ฌั้ว, นิ่น บัว ฯฒฯ หญั่น อ๊ะ. 4น้าย เต๋ย อี เต้า เมี่ยน ไม้ แก้ง เปว๋ย, โสโดม ฒี่ง เญย มจั่ง ตอน โก๋ๆ หลุนๆ ต้าย ฑ่อย, ไม้ เหฒ่ง เหยียด เต้า, เว่ย เจี๊ยน โล้ด เญย เปย๊า.#ต้ม เจียน 19:22-24 5นิ่น บัว เห่ว โล้ด, “อี้ ม์วน ต้าย เม่ย น้าย วั้ว เต๋ย อี เต้า เมี่ยน เยียม หาย? ต้อ ธ้วด ต้าย ปุน เยีย บัว ธา ม่าะ!”
6โล้ด ธ้วด แก้ง ขะเดา, เฒาะ แก้ง กวน เจี๊ยน, 7บั๋ว วั้ว เต๋ย เมี่ยน, “ก๋อ-โย์ว อ้า! โท้ เม่ย บัว ไม้ ตู๋ง ฮนั้ง น้าย นอ โหฒว. ไม้ ตู๋ง โหฒว น้าย หญู่ง หว่าย ไห่ เญย สี่. 8หมั่ง ก๋า! เยีย ม่าย อี เต้า เซียะ ไม้ แก้ง เปว๋ย เจี๋ย ตอน. เยีย ต้อ นิ่น บัว ธ้วด ต้าย ปุน เม่ย บัว เซว่ย เอ๋ย โหฒว. มป่า ไม้ ตู๋ง โหฒว หาย หญู่ง ปุน น้าย เต๋ย มจั่ง ตอน. นิ่น บัว ต้าย เยียม เยีย เญย เปย๊า, เยีย อ๋อย หฒุ โก๋ว หลง เปว เจี๊ยน นิ่น บัว.”
9หฒวัง เมี่ยน ก๊อง, “ซิ้ม ฆอย ม่าะ!” แอ๋ง ก๊อง, “น้าย เต้า โล้ เยียม กั้น นอม ต๋อง ต้าย เหฒี่ยว เยีย บัว เยียม. อี้ หฒั่น ฒู้ง อ๋อย เถง เยีย บัว โหฒว เซี้ยม ฒุ์ย เจียน. เยีย บัว อ๋อย โหฒว ปุน เม่ย เก้า โค้ว โหฒว ปุน วั้ว เต๋ย อี เต้า.” นิ่น บัว เหฌี่ย ชะ ฟ้ง โล้ด หลาด หฑาด มี่ง เถา แก้ง ด่าง อ๋อย เบ๊าะ แก้ง ทง.
10มป่า วั้ว เต๋ย อี เต้า แคะ เมี่ยน ฮญา ปั์ว ธ้วด ต้าย เฒาะ โล้ด ทอ เปียะ เปย๊า มี่ง, เฒาะ แก้ง กวน เจี๊ยน. 11นิ่น บัว แอ๋ง โหฒว ปุน เยียม กะเหญี่ย หฒิ แก้ง เญย เหยียด ฒู้ง เมี่ยน โก๋ๆ หลุนๆ เญย มฒีง บั๊ว เหฑ่ง ฯฒฯ หฮวา น้าย หฮวา วั้ว หย่า ล์อ ไม้ ปวัด แก้ง.#2 ฮู่ง โต้ว 6:18
โล้ด ธ้วด โสโดม ฒี่ง
12วั้ว เต๋ย อี เต้า เมี่ยน บั๋ว โล้ด, “เยียม น้าย หธ่อ ม่าย หาย เต้า เม่ย เญย เมี่ยน ไฟ? ไม้ กุ๊น ตอน ไฟ เซียะ, เซียะ-ล่าง ไฟ เยียม น้าย ฒี่ง เม่ย เญย หาย เต้า เมี่ยน, เม่ย อ๋อย หฒุ ต้อ นิ่น บัว เปย๋า ธ้วด. 13เยีย บัว อ๋อย เหมียด โสโดม ฒี่ง เหว่ย หฒุ เฒี้ยว ไฮ์ โก๋ น้าย นอม ฒี่ง เญย หว่า ธั้ม ไห่ อ๊ะ. นิ่น ฯฒฯ พ้าย เยีย บัว ต้าย เหมียด.”
14โล้ด ฯฒฯ ธ้วด มี่ง บั๋ว ก๊อง เฒี่ยง นิ่น เญย เซียะ วั้ว เต๋ย เซียะ-ล่าง, “ก๊าน เซี้ยบ เต๋ย เปย๋า. เฒี้ยว อ๋อย เหมียด น้าย นอม ฒี่ง ไห่ อ๊ะ.” มป่า นิ่น เญย ล่าง บัว หล่าย นิ่น ก๊อง จั๊ด อะหฑย่าว ฮนั้ง.
15ตะเหญ่ย ดอม ลู่ง ฌัง, ฟิน-เมี่ยน เป๊ะ โล้ด. นิ่น บัว ก๊อง, “ก๊าน เซี้ยบ เต๋ย ม่าะ! ต้อ เจี๊ยน เม่ย เญย เอ๊า แอ๋ง เหธา เม่ย เยียม น้าย เญย อี เต้า เซียะ เปย๋า ฆอย. ไม้ เฒย แอ๊ะ, น้าย นอม ฒี่ง หฒุ ตี่ง ฒุ์ย หฒุ เหมียด, เม่ย บัว หย่า เหธา เจี๊ยน หฒุ ไต่ อ๊ะ.”
16โล้ด หธ่อ ซั่มๆ โซะๆ เญย. วั้ว เต๋ย อี เต้า เมี่ยน ฯฒฯ เฒาะ โล้ด บัว อี ฮมวั้ง เหธา นิ่น บัว เญย อี เต้า เซียะ เญย ปั์ว เคน เจี๊ยน ธ้วด กะเหญี่ย หฒิ ฒี่ง มี่ง, เหว่ย หฒุ เฒี้ยว ค้อ-เลี่ยน นิ่น.#2 ปีเต 2:7 17เปย๋า ธ้วด หฒิ ฒี่ง มี่ง, ม่าย เต้า วั้ว เต๋ย ฟิน-เมี่ยน ก๊อง, “ก๊าน เปย๋า ม่าะ! ไม้ ตู๋ง ฮวิน หมั่ง ฆะฮ้า, เลี่ยม ไม้ ตู๋ง ตี้ง น้าย เดา-แป้ง เญย หาย นอม ต๋อง. ฆ่ง เปย๋า มี่ง วั้ว เจี๋ย บง. ไม้ เฒย แอ๊ะ, อ๋อย หฒุ ไต่ อ๊ะ.”
18มป่า โล้ด เตา, “ต้ม ก๋อ อ้า! โท้ ไม้ ตู๋ง ฮนั้ง หน่าย. 19หฒิว เม่ย ปวัด เยีย, เม่ย เญย โปว, โหฒว ตุ๊ หอบ เม่ย เญย เฮญี้ยว, เม่ย หย่า โหฒว หลง ปุน เยีย, เหฌียว ธ้วด เยีย เญย แหม่ง. เยีย ไม้ ไฮ่ เปย๋า ไม้ เถา บง. เหฑีย เยีย เปย๋า ไม้ ดุ๊ด น้าย เต๋ย ต้ม เหฒะ หน่าน, เยีย ฯฒฯ ไต่ อ๊ะ. 20หมั่ง ม่าะ! วั้ว เดา ม่าย นอม มู้ง ไฝ เญย, ฟัด เญย, ไฮ่ ถิว ตุ๊ เถา เญย. โท้ ปุน เยีย เปย๋า มี่ง วั้ว. เป๋น เหยียด นอม ฟิ้ว-มู้ง ฮนั้ง ไม้ เฒ์ย? ฮนั้ง หน่าย ฯฒฯ ตุ๊ เยีย เญย แหม่ง ธ้วด.”
21ฟิน-เมี่ยน ก๊อง บั๋ว โล้ด, “เม่ย โท้ เญย เยีย ฆอย ฑุ่ย. เยีย ฯฒฯ ไม้ เหมียด เม่ย ก๊อง วั้ว นอม มู้ง. 22ก๊าน ถิว เจี๊ยน มี่ง วั้ว อ๊ะ. เม่ย มี่ง ไม้ แก้ง เถา วั้ว นอม ต๋อง, เยีย ไม้ ไฮ่ เหฌี่ย ปั์ว โหฒว หาย หญู่ง.” เหว่ย น้าย เมี่ยน ฯฒฯ ธ้วด น้าย นอม ฒี่ง เญย บั๋ว เห่ว “โสอา.”#19:22 โสอา เญย เอ๋ย เล์ย เซ ไฝ-ฟิ้ว.
โสโดม เหธา โกโมลา หฒุ เหมียด
23โล้ด มี่ง เถา โสอา ฒี่ง วั้ว หฒั่น, บะฮนอย ธ้วด ต้าย อ๊ะ. 24เฒี้ยว เลี่ยม เฒ่ย ปุน เหฒียะ เจี๊ยน โต์ว เญย ฮู่ง#19:24 ฮู่ง เซ เผว ฟิว วั้ว หญู่ง ฮู่ง. เยียม กู้ หงว่าย ลู่ง เหฌี่ย โสโดม เหธา โกโมลา ฒี่ง,#มัดทาย 10:15; 11:23-24; ลูกา 10:12; 17:29; 2 ปีเต 2:6; ยิวดา 7 25ปั๊ว เหมียด เหฑ่ง วั้ว นอม ห่อง หฒั่ง เญย ฒี่ง, เลี่ยม เมี่ยน, เลี่ยม เดา ธ้วด เญย เหยียด ฒู้ง กะน้าย. 26มป่า โล้ด เญย เอ๊า เยียม ฆะฮ้า ฮวิน หฑวน หมั่ง ฯฒฯ เป๋น นอม เฑ้า-ต่ง หมี่ อ๊ะ.#ลูกา 17:32
27ตะเหญ่ย ดอม เฑี้ยว เญย, อับลาฮัม มี่ง เถา, ต้ง นิ่น โซ้ว เจี๊ยน เยียม เฒี้ยว เญย หฑะเฮมียน วั้ว นอม ต๋อง, 28หมั่ง เหฌี่ย. นิ่น ปวัด โสโดม เหธา โกโมลา เหธา วั้ว นอม ห่อง ธ้วด โต์ว-เสียว-ตน ธุดๆ เญย ฝาว ฮนั้ง ปั๊ว ต้ม โต์ว-เหฑ่า นอ.#หล่าว ย่าง 9:2
29ฮนั้ง หน่าย, ทิน-ฮู่ง เหมียด วั้ว นอม ห่อง หฒั่ง เญย ฒี่ง, เลี่ยม โล้ด เยียม เญย ฒี่ง, วั้ว หฒั่น, นิ่น จั๋ง หฒุ อับลาฮัม หธีง ต้าย ต้อ โล้ด เปย๋า ธ้วด, ไม้ หฒุ ไต่.
โมอับ เหธา อัมโมน เมี่ยน เญย กอน
30เหว่ย หฒุ โล้ด กั้ม เหฑีย, ไม้ ก๊าม เยียม โสอา ฒี่ง, นิ่น เหธา นิ่น เญย อี เต้า เซียะ เปย๋า ฝาว บง, เยียม นอม แบ๋ง-ค้วด กะญั์ว. 31เซียะ-โฮล บั๋ว เซียะ-ไฝ, “บัว เญย เตีย โก๋ อ๊ะ. เยียม น้าย ปั๊วะ เดา ไม้ ม่าย เมี่ยน ต้าย หล่ง บัว ฮนั้ง ลู่ง เดี๊ย เมี่ยน หล่ง นอ. 32บัว อ๋อย หฒุ ปุน อา เตีย ฮบ ติ๊ว ฆวิน มี่ง, บัว ฯฒฯ ไฮ่ เหธา นิ่น เปว๋ย, เหว่ย ปั่ง บัว เญย เตีย ม่าย โฮ์ ปาน.”
33วั้ว ม์วน นิ่น บัว อี มั์ว-เซียะ ปุน นิ่น บัว เญย เตีย ฮบ อะหงุ่น ติ๊ว, เซียะ-โฮล ฯฒฯ เปียะ มี่ง เหธา นิ่น เญย เตีย เปว๋ย. เตีย ฒู้ง ไม้ ฮิ้ว ตุ๊ นิ่น เญย เซียะ เฒี่ยง หาย เปว๋ย, เฒี่ยง หาย เจี์ย ซิน มี่ง.
34ตะเหญ่ย ฮนอย เซียะ-โฮล ก๊อง บั๋ว เซียะ-ไฝ, “อะหฮมวัง เยีย เหธา อา เตีย เปว๋ย ลิ์ว อ๊ะ. อี้ ม์วน บัว อ๋อย หฒุ แอ๋ง ปุน นิ่น ฮบ อะหงุ่น ติ๊ว, เม่ย หย่า มี่ง เหธา นิ่น เปว๋ย เหว่ย ปั่ง บัว เญย เตีย ม่าย โฮ์ ปาน.” 35วั้ว ม์วน นิ่น บัว ฯฒฯ ปุน นิ่น บัว เญย เตีย แอ๋ง ฮบ อะหงุ่น ติ๊ว. เซียะ-ไฝ ฯฒฯ เปียะ มี่ง เหธา นิ่น เญย เตีย เปว๋ย. นิ่น เญย เตีย ฟี่ ฮนั้ง เญย ไม้ ฮิ้ว ตุ๊ นิ่น เญย เซียะ เฒี่ยง หาย เปว๋ย เฒี่ยง หาย เจี์ย ซิน.
36ฮนั้ง น้าย นอ โล้ด เญย อี เต้า เซียะ ม่าย เจี๊ยน นิ่น บัว กั้น เญย เตีย เญย กู้งว์า. 37เซียะ-โฮล ยู์ง ตุ๊ เต้า ตอน, เถง ธ้วด บั๋ว เห่ว โมอับ.#19:37 โมอับ ไฮ์ ฮนั้ง ฮิบลู หว่า ก๊อง “เยียม เยีย เญย เตีย ต้าย”. โมอับ โหฒว อี้ จ๋า ฮนอย โมอับ เมี่ยน เญย อง-ถาย-แงะ. 38เซียะ-ไฝ หย่า ยู์ง ตุ๊ เต้า ตอน, เถง ธ้วด บั๋ว เห่ว เบนอัมมี.#19:38 เบนอัมมี เญย เอ๋ย เล์ย เซ “เยีย เญย เธียน-เธะ เญย ตอน,” หย่า ไฮ์ ฮนั้ง ฮิบลู หว่า ก๊อง อัมโมน เมี่ยน. เบนอัมมี เซ โหฒว อี้ จ๋า ฮนอย อัมโมน เมี่ยน เญย อง-ถาย-แงะ.
Pašlaik izvēlēts:
ทิน เต่ย โต้ว 19: IuMiTH
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Mien Bible (Thai Script) © Thailand Bible Society, 2007