Genesis 4
4
Si Cain tan si Abel
1Inakdulan nen Adan si Eva ya asawa to. Nanlokun si Eva tan nananak na sakey a laki. “Diad tulong na Katawan,” kuanen Eva, “akaanak ak na sakey a laki.” Kanyan inngaran to na Cain#4:1 CAIN: Say tanul na sayan ngaran kapara toy Hebreon salita a kabaliksan toy “nala.” imay ogaw. 2Et nananak lamet na sakey a laki a si Abel. Nagmaliw a pumapastol si Abel, balet sakey a dumaralus si Cain. 3Kalabas na pigaran taon, angyakar si Cain na pigaran naani to tan imbagat tod Katawan. 4Insan angyakar met si Abel na kordiron besag na sakey ed saray karniro to, pinatas to, tan imbagat to ray sankaabigan a parti. Akaliket so Dios ed kinen Abel tan samay bagat to, 5balet ag akaliket ed kinen Cain tan samay bagat to. Mapalaloy pasnuk nen Cain tan binmilonget so lupa to. 6Inkuan na Katawan ed kinen Cain, “Akin et mamapasnuk ka? Akin et ambilonget so lupam? 7No maung so ginawam, manimimis ka komun;#4:7 manimimis ka komun; odino inawat ko komuy bagat mo. balet lapud maoges so ginawam, say kasalanan et sisiliban to kan tekmelan. Labay to kan oleyan, balet nepeg mon taloen.”
8Insan inkuanen Cain ed kinen agi ton Abel, “Mamasyar ta ed kaalogan.”#4:8 Diad pigaran dagdaan a patalus Mamasyar ta ed kaalogan; anggapo ra ya ed salitay Hebreo. Nen wadman la ra, tinekmelan nen Cain si agi to tan pinatey to.
9Tinepet na Katawan ed kinen Cain, “Kawalaan nen Abel ya agim?”
Inmebat, “Ag ko amta. Siak tay managasikasod agik?”
10Insan inkuan na Katawan, “Akin et onyay ginawam? Manlapud dalin, manakakis ed siak so dala na agim; singa bosis ya onkekerew na bales. 11Nisamba ka; ag mo la nadalusan so dalin a singa inlokas toy sangi to nen inesep toy dala na agim a pinatey mo. 12No ondalus ka, anggapoy naanim; magmaliw kan anggapoy abung tan akar-akar ka diad tapew na dalin.”
13Inkuanen Cain ed Katawan, “Ambelat a tuloy yan dusa; ag ko nasungdoan. 14Patataynanen mo ak ed dalin tan diad arap mo. Magmaliw ak ya anggapoy abung tan akar-akar diad tapew na dalin, tan pateyen ak na siopaman a makalmod siak.”
15Balet inmebat so Katawan, “Andi! No walay mamatey ed sika, pitoran totoo so pateyen a pinagkabales to.” Kanyan minarkaan na Katawan si Cain a pamasakbay ton ag pateyen na siopaman a makabet ed sikato. 16Tinmaynan si Cain ed arap na Katawan tan nanayam ed dalin a tatawagey “Akar-akar,” diad bokig na Eden.
Saray Kabyangay Boleg nen Cain
17Inakdulan nen Cain so asawa to, et nanlokun tan inngaran toy Enoc. Insan amaalagey na siudad si Cain tan inngaran tod ngaran na sayan anak to. 18Walay lakin anak nen Enoc a manngaray Irad ya ama nen Mehujael, say ama nen Metusael ya ama nen Lamec. 19Duaray inasawa nen Lamec, si Ada tan si Zilla. 20Inyanak nen Ada si Jabal a sengeg na boleg da ray totoon walaan na ayayep tan diad saray tulda so panaayaman da. 21Say agi to si Jubal a sengeg na boleg da ray managtogtog na arpa tan plauta. 22Inyanak nen Zilla si Tubal-cain a nanggawa na amin a klasiy kagawaan#4:22 a nanggawa na amin a klasiy kagawaan; diad sakey a dagdaan a patalus sengeg na boleg da ray pumapanday. a gansa tan balatyang. Say biin agi nen Tubal-cain et si Naama.
23Inkuanen Lamec ed saramay asawa to,
“Ada tan Zilla, dengel yo ak:
Pinatey koy sakey a lakin tubon-balo,
ta kinabil to ak a sinugatan.
24No pitoran totoo so pateyen a
pinagkabales na impamatey ed kinen Cain,
Pitomplo tan pito a totoo so pateyen a
pinagkabales na pamatey ed siak.”
Si Set tan si Enos
25Inakdulan nen Adan so asawa to, et nananak na sakey a laki ya inngaran to na Set.#4:25 SET: Say tanul na sayan ngaran kapara toy Hebreon salita a kabaliksan toy “inter.” Inkuan na asawa to, “Initdan ak na Dios na anak ya onsalat ed kinen Abel a pinatey nen Cain.” 26Walay anak nen Set ya inngaran to na Enos. Diad sayan panaon, inggapo na katoowan so ontawag ed masanton ngaran a Yahweh.#4:26 Nengneng yoy 2:4.
Pašlaik izvēlēts:
Genesis 4: MBBPAN83
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Maung a Balita Biblia © Philippine Bible Society, 1983