Genesis 2
2
1Asumpal sirin ya apalsa so tawen tan dalin tan amin a logan da. 2Diad loob na anem agew asumpal na Dios a pinalsa ira yan amin, insan diad kumapiton agew nampainawa ed amin a kimey to. 3Binindisionan na Dios yan kumapiton agew tan imbiig ton sakey a masanton agew, ta diad sayan agew asumpal toy impamalsa tod ganagana#2:3 diad sayan agew asumpal toy impamalsa tod ganagana tan nampainawa; odino diad sayan agew sinumpal toy impamalsa tod ganagana. tan nampainawa. 4Onya so istoria na inkapalsa na sansinakuban.
Say Tanamanan ed Eden
Nen kayari na Katawan#2:4 NA KATAWAN: No Yahweh so walad tikston Hebreo, balet ta Jehovah so abangonan a nikana, diad sayan patalus KATAWAN ya ankabaleg a litra so inkana, ta tinombuk so inkana na amayamay a patalus ed Ingglis. Wala ra balet so pigaran tiksto a Yahweh so inkana lapud totokuyen day ngaran na Dios. a Dios a pinalsa so tawen tan dalin, 5anggapo ni ray tanaman ed dalin odino bokel a tinmubo, lapud ag to ni pinaoran, tan anggapoy toon ondalus ed dalin. 6Balet pinmaway so danum ed saray sobul tan aparanuman so dalin.
7Insan say Katawan a Dios angalay dabuk ed dalin, minoli ton sakey a too-too,#2:7 DALIN…TOO-TOO: Nampara so tanul na saray Hebreon salita a kabaliksan day “too-too” tan “dalin.” insan to iningasan na linawan manangiter na bilay ed saray abut na eleng to, et nagmaliw a mabilay a too.
8Insan say Katawan a Dios nanggawa na sakey a tanamanan diad bandad bokig a sakop na Eden, tan diman to impanayam imay toon minoli to. 9Pinatubo to rad may amin a klasiy mararakep a kiew tan pinabunga to ra na masasamit a prutas. Diad pegley na tanamanan so kawalaan na kiew a mangiiter na bilay, tan say kiew a mangiiter na pakaamta ed maung tan maoges.
10Walay ilog ya onaagos ed Eden tan sasalugen to may tanamanan; diad paway na Eden nansanga na apatiran ilog. 11Pison so ngaran na onaan ya ilog; onaagos ed kaliber-liber na bansa na Havila. (12Dia naalmoy puron balituk, tan pati nidoma-doman pabalingit tan saray ankablin batoy alahas.) 13Gihon so ngaran na kumadwan ilog; onaagos ed kaliber-liber na bansa na Cus.#2:13 Cus (na Mesopotamia); odino Sudan. 14Tigris so ngaran na kumatlon ilog; onaagos ed bandad bokig na Asiria, tan Eufrates so ngaran na kumapat ya ilog.
15Insan say Katawan a Dios inala to may too tan impasen tod tanamanan na Eden, pian nadalusan to tan naasikaso to. 16Ingganggan tod sikato, “Nayarian mon kaney bunga na antokaman a kiew ed tanamanan, 17balet ag ka mamangan na bunga na samay kiew a mangiiter na pakaamta ed maung tan maoges. Ag nepeg a kanen so bunga na saman a kiew; ta no kanen mo, ompatey ka diad agew a pangan mo.”
18Insan inkuan na Katawan a Dios, “Aliwan maung a mambukbukor so too. Igawaan ko na sakey a manepeg a kaiba to tan katulongan to.” 19Kanyan nanmoli na dalin tan sayan minoli to ginawa ton ayayep tan manomanok. Insan to ra inyakar ed samay too, ta nengnengen to no antoy pangingaran tod sikara. No antoy impanawag tod balang sakey, sikatoy ngaran to. 20Samay too sirin initdan toy kangaranan iray amin a manok tan ayayep; balet anggapod saraya so manepeg a kaiba to tan katulongan to.
21Insan say Katawan a Dios pinaogip toy malmalet imay too; nen naogip, angoyus na sakey ed saray taglang to may laki, insan to kinopit so laman ya angalaan to. 22Ginawa ton bii imay taglang, insan to inyakar ed samay laki.
23Inkuanto may laki,
“A, salamat, sikato yan siansiay kaparak.
Pokel ya inalad saray pokel ko, tan laman ya inalad laman ko.
‘Bii’ so ngaran to, ta inala ed laki.”#2:23 BII…LAKI: Nampara so tanul na saray Hebreon salita a kabaliksan day “bii” tan “laki.”
24Sikato ya sirin so makasengeg no akin et taynan na laki so ama to tan say ina to tan mikasakey ed asawa to, et magmaliw iran saksakey a laman.
25Labus-lakseb imay laki tan samay asawa to, balet ag da ya imbaing.
Pašlaik izvēlēts:
Genesis 2: MBBPAN83
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Maung a Balita Biblia © Philippine Bible Society, 1983