Juan 2
2
Ang Kasal sa Cana
1Sang makaligad ang duha ka adlaw, may ginhiwat nga kasal sa banwa sang Cana, sa probinsya sang Galilea. Ang iloy ni Jesus yadto didto, 2kag si Jesus kag ang iya mga gintuton-an gin-agda man sa kasal. 3Sang naubos na inom ang bino, ang iloy ni Jesus nagsiling sa iya, “Naubosan sila sing bino.”
4Si Jesus nagsabat, “Indi na kinahanglan nga singganan mo pa ako, iloy ko, kon ano ang akon himuon. Ang akon tion wala pa mag-abot.”
5Dayon, ang iloy ni Jesus nagsiling sa mga suloguon, “Himua ninyo ang bisan ano nga isiling niya sa inyo.”
6Ang mga Judio may mga pagsulondan nahanungod sa pagpaninlo, kag sa sini nga tinutuyo may anom didto ka mga tadyaw, ang tagsa ka tadyaw sarang masudlan sang baynte tubtob traynta ka galon nga tubig. 7Si Jesus nagsiling sa mga suloguon, “Pun-a ninyo sing tubig ang mga tadyaw.” Ginpuno nila sing tubig ang mga tadyaw tubtob sa bibig, 8kag dayon ginsingganan niya sila, “Karon, sandok kamo sa sinang tubig kag dalha sa manugdumala sang punsyon.” Gindala nila ini sa manugdumala, 9kag iya gindimdiman ang tubig nga nahimo nga bino. Wala sia makahibalo kon diin ini nga bino maghalin, (pero, nakahibalo iya ang mga suloguon nga nagsandok sang tubig.) Gani gintawag niya ang nobyo 10kag ginsingganan, “Ang tagsa ka tawo nagasirbe sang labing maayo nga bino sa pagsugod sang punsyon kag kon tama na ang nainom sang mga dinapit, ginahatag niya ang ordinaryo nga bino. Pero ikaw iya nagasirbe sang labing maayo nga bino tubtob karon!”
11Ini amo ang nahauna sang gamhanan nga mga buhat nga ginhimo ni Jesus sa Cana sang Galilea. Didto ginpahayag niya ang iya kagamhanan, kag ang iya mga gintuton-an nagtuo sa iya.
12Sa#Mat. 4:13. tapos sini si Jesus kag ang iya iloy, ang iya mga utod nga lalaki, kag mga gintuton-an nagdulhog pakadto sa Capernaum, kag nagtener sila didto sing pila ka adlaw.
Nagkadto si Jesus sa Templo
(Mat. 21:12-13; Mar. 11:15-17; Luc. 19:45-46)
13Nagahilapit#Exo. 12:1-27. na ang Piesta sang Pascua sang mga Judio, gani si Jesus nagtaklad pakadto sa Jerusalem. 14May nakita sia nga mga tawo didto sa Templo nga nagabaligya sang mga baka, mga karnero, kag mga pating, kag subong man ang mga manugbaylo sang kwarta nga yara sa ila mga lamisa. 15Naghimo si Jesus sang inughanot nga lubid kag iya ginpanabog ang tanan pa gwa sa Templo, dungan sang mga karnero kag mga baka. Ginpangwas-ag niya ang mga sensilyo sang mga manugbaylo sang kwarta, kag ginpamaliskad niya ang ila mga lamisa, 16kag ginmanduan niya ang mga manugbaligya sang mga pating, “Kuhaa ninyo ina diri! Indi ninyo paghimua nga tiendahan ang balay sang akon Amay!” 17Nadumdoman#Sal. 69:9. sang iya mga gintuton-an nga ang kasulatan nagasiling, “Ang akon kabalaka sa imo balay, O Dios, nagadabdab sa sulod nakon subong sang kalayo.”
18Ang mga pangulo sang mga Judio nagpamangkot sa iya, “Ano bala nga milagro ang imo mahimo sa pagpakita sa amon nga may katarungan ka sa paghimo sini?”
19Si#Mat. 26:61; 27:40; Mar. 14:58; 15:29. Jesus nagsabat, “Gub-a ninyo ining Templo kag sa sulod sang tatlo ka adlaw patindugon ko ini liwat.”
20Namangkot sila sa iya, “Ini nga Templo ginpatindog sa sulod sang kwarentay sais ka tuig, kag patindugon mo bala ini liwat sa sulod sang tatlo lamang ka adlaw?”
21Pero ang templo nga ginsiling ni Jesus amo ang iya lawas. 22Gani sang nabanhaw sia, nadumdoman sang iya mga gintuton-an nga ginhambal niya ini, kag nagtuo sila sa kasulatan kag sa mga pulong nga ginhambal ni Jesus.
Nahibaluan ni Jesus ang Kinaugali sang Tawo
23Sang didto si Jesus sa Jerusalem sa Piesta sang Pascua, madamo ang mga nagtuo sa iya ngalan sang makita nila ang gamhanan nga mga buhat nga ginhimo niya. 24Pero si Jesus wala magsalig sang iya kaugalingon sa ila, tungod kay nakilala niya sing maayo ang tanan nga mga tawo. 25Wala na sing kinahanglan nga sugiran sia nahanungod sang mga tawo, tungod kay nahibaluan gid niya kon ano ang yara sa ila mga tagipusoon.
Pašlaik izvēlēts:
Juan 2: MBBHIL12
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Maayong Balita nga Biblia © Philippine Bible Society, 2012