Genesis 8
8
Ang Pag-untat sang Anaw
1Gindumdom sang Dios si Noe kag ang tanan nga mga kasapatan nga upod niya sa arka. Ginpahuyop niya ang hangin sa duta, kag ang tubig nagsugod sa paghubas. 2Ang mga tuboran sang dagat sa idalom sang duta kag ang mga alagyan sang tubig sa langit ginpangtakpan. Ang ulan nag-untat, 3kag ang tubig nag-amat-amat sa paghubas sa sulod sang 150 ka adlaw. 4Sang ika-17 nga adlaw sang ikapito nga bulan, ang arka nagtungtong sa mga kabukiran sang Ararat. 5Ang tubig nagpadayon sa paghubas, kag sa nahauna nga adlaw sang ika-10 nga bulan, ang mga putokputokan sang mga kabukiran makit-an na.
6Sa tapos ang kwarenta ka adlaw ginbuksan ni Noe ang bintana 7kag ginpalupad pa gwa ang isa ka uwak. Wala ini magbalik kundi naglupadlupad palibot tubtob nagmala ang duta. 8Dayon ginpalupad ni Noe pa gwa ang isa ka pating sa pagtan-aw kon ang tubig naghubas na, 9pero tungod nga ang bug-os nga duta natabunan pa sang tubig, ang pating wala sing mahapunan. Gani nagbalik ini sa arka kag gindab-ot ni Noe ang pating kag ginpasulod sa arka. 10Naghulat anay si Noe sing pito ka adlaw kag ginpalupad liwat ang pating pa gwa sa arka. 11Pagkagab-i nagbalik ini sa iya, kag nakita niya nga sa iya tuktok may dala ini nga dahon sang olivo nga bag-o lang makutol. Gani nahibaluan ni Noe nga ang tubig naghubas na. 12Dayon si Noe naghulat sing pito pa gid ka adlaw kag ginpalupad niya liwat pa gwa ang pating. Sa sini nga tion wala na magbalik ang pating.
13Sang nagaedad si Noe sing 601 ka tuig, sa nahauna nga adlaw sang nahauna nga bulan, ang tubig sa duta naghubas na gid. Sang maabrihan ni Noe ang isa ka bahin sang atop sang arka, nagtamwa sia kag nakita niya nga ang duta mamala na. 14Sang ika-27 nga adlaw sang ikaduha nga bulan, ang duta nagmala na gid.
15Ang Dios nagsiling kay Noe, 16“Gwa ka sa arka upod sa imo asawa, sa imo mga anak nga lalaki kag sa ila mga asawa. 17Pagwaa ang tanan nga mga sapat kag mga pispis upod sa imo, agod magmuad sila kag maglapta sa bug-os nga duta.” 18Gani si Noe naggwa sa arka upod sa iya asawa, sa iya mga anak nga lalaki, kag sa ila mga asawa. 19Ang tanan nga mga sapat kag mga pispis naggwa sa arka nga nagapunsokpunsok suno sa ila sari.
Si Noe Nagdulot sing Halad
20Dayon si Noe naghimo sing altar sa Ginoo. Nagkuha sia sing isa sa tagsa ka sahi sang matinlo nga mga sapat kag mga pispis kag iya gin-ihaw kag ginhalad ini subong nga sinunog nga mga halad sa altar. 21Nahamuot ang Ginoo sang kahamot sang halad, gani nagsiling sia sa iya kaugalingon, “Indi ko na gid pagpakamalauton ang duta tungod sang ginahimo sang tawo. Nahibal-an ko nga sugod sang bataon pa sia ang iya mga panghunahuna malaut. Indi ko na gid paglaglagon ang tanan nga mga butang nga nagakabuhi, subong sang akon ginhimo karon. 22Samtang nga ang kalibutan nagapadayon, may tigtalanom kag tig-alani. May tigtulognaw kag tig-ilinit, tingulan kag tingadlaw, adlaw kag gab-i.
Pašlaik izvēlēts:
Genesis 8: MBBHIL12
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Maayong Balita nga Biblia © Philippine Bible Society, 2012