GENESIS 2
2
1Churawhchun, laikulh pumpi chu siam dih asi rawh. 2Chun, Pathian nih a thilsiam chu a lîm rawh ruangah ni sarih ni ah chun a dinhtâk rawh. 3A ni sarihnâk ni chu mal a sâwm le, chu ni ah chun a thilsiam chu a lîm rawh ruangah leh rianṭuan a dinhtâk ruangah a bîk hâwi hen a dangtê hen a thlei rawh. 4Chu chu laikulh siam dân chu asi.
Eden Dûm
LALPA Pathian nih laikulh a siam liauah, 5tual tlûnah zei keuh khawm a um lo, zei thlâi chî khawm a um lo, ruah a sûrtir lo ruangah, chun âukhawm nih phâisen a nâwn lo. 6Sikhawmsele tanglei thawk hen sûm tlûnlei ah a kâi le, tual chu a nâwngtir.
7Chun, LALPA Pathian nih tual ah mi valei tâwm a lâk le, mipa a siam; chun a nârkua lakah nungnâk pêktu thâw a khumh le, chu minung chu a nung rawh.
8Chun, LALPA Pathian nih sak leiah, Eden ah, dûm a siam le, chunah chun minung a siam mi chu a siah. 9Chunah chun thing dawh tak zât kip rah suah mi a khotir. Dûm lâi chirah chun nungnâk thing leh sia leh ṭha theihnâk thing a um.
10Eden ah tiva a luang le, chu nih dûm chu a nâwngtir. Eden lanh leiah chun tiva chu pali hen a suah. 11Tiva masa chem chu Pison asi; chu chu Havilah ram ah a luang. 12(Chunah chun ngûn a tliang mi leh rimthâw a um êu lo mi lung a sung mi tla an tawng.) 13Tiva panihnâk chu Gihon asi; Kus ram ah a luang. 14Tiva pathumnâk chu Tigris asi; Asiria saklei ram ah a luang. Tiva palinâk chu Eufretis asi.
15Chun, LALPA Pathian nih minung chu Eden Dûm ah nâwn ding leh vêng ding hen a siah. 16-17Anih nih chun a sinah, “Sia leh ṭha theihnâk thing tilo chu dûm lakah mi thing rah zeital na ei kho lai. Chu thing rah chu na ei salam ding asi lo; na ei chun, na ei ni ah na thi lai,” a ti.
18Churawhchun, LALPA Pathian nih, “Minung chu amah lâwng hen um a ṭhalo. Amah ṭangpitu ding hen bawptu ṭha tak ka siam lai,” a ti. 19Churawhchun, Pathian nih tual ah mi valei tâwm a lâk le, ramsa tla leh vâ zawzawng tla a siam na. Chun, an min ah zei se a sak awt ti zauhtir ding hen a siam mi minung sinah a kalpi na-- chu chu mah min chiau an neihnâk chu asi. 20Churawhchun, minung nih chun ramsa leh vâ tla chu an min a phuah na; sikhawmsele amah ṭangpi ding hen pakhat khawm hâwikawmh ṭha an si lo.
21Churawhchun, LALPA Pathian nih minung chu thâw tak hen a ittir le, a it karah a nâkruh pakhat chu a lâk le, sâ hen a tuam. 22A nâkruh hen nunau a siam le, a sinah a kalpi. 23Chun minung nih chun,
“A dawnghchem ah, hinah keimah hâwitê --
ka ruh leh taksa thawk hen siam mi a um.
Mipa thawk hen siam mi asi ruangah
a min chu ‘Nunau’ asi,” a ti.
24Churuangah asi mipa nih a nu leh a pa a kaltâk le, a nupi hen anna sihawh le, pumkhat an hawng si.
25Mipa leh nunau chu takkaro hen an um vevê le, sikhawmsele pawi tinâk an nei lo.
Pašlaik izvēlēts:
GENESIS 2: BCLBV
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bawm Common Language Bible © Bangladesh Bible Society, 2004. All rights reserved.