BOTHUBO 14
14
Abram no Lot Hakholu
1Shinar lo akukau Amrafel, Elasar lo akukau Ariok, Elam lo akukau Khedarlaomer eno Goim lo akukau Tidal ishino 2kukami hipano pungu sasu aghu shie: Sodom lo akukau Bera, Gomora lo akukau Birsha, Adma lo akukau Shinab, Zeboim lo akukau Shemobur eno Bela lo akukau ti Zoar ishi. 3Kukami hipaqo no Sidim qa tiye Amti Zughiqa lono panongu kuka kughojue. 4Panonguye Khedarlaomer qholo ampe chighikini ache puzu ampe chighi akuthu-uloye hebide ipeghive. 5Ike ampe chighi abidiu loye Khedarlaomer no kukami pagholo kuqhape akeqo sasu ighi puzu panonguno hipaqo leve: Ashterot-Karnaim lo Refaim akeqo, Ham lo Zuzimiqo, Kirithaim qalo Emimqo, 6Seir naghutolo agha kughutsu kumo yeghi phivilo El-Paran kutolo Horimi aghikeqo ngo ishi. 7Eno panongu hotsughu sasu Kadesh tiye Kughakutha Zupuki ipikeulo ideghi eno Amalekmi ye kumtsu leluve eno Xatsatson-Tamar lo Amarimi akeqo ghi leluve.
8Tile Sodom ngo Gomora ngo Adam ngo Tseboim eno Bela lo kukami akeqono aghu shinike Sidim qhalo wo kumqo ngo puzu 9Elam kukau Khedarlaomer, Goim kukau Tidal, Shinar kukau Amrafel eno Elaser kukau Ariok, ti kukami punguno bidi sasu aghu shie. 10Eno Sidim qalo alkatra kuchhu khukino nha khaae eno Sodom ngo Gomora kukau noqono aghukishi lono poche kelo tile iluqi ilo eno kutamiye naghutolo polukhae. 11Eno kukami bidi huno Sodom ngo Gomora lo tinhemgha eno kuchukini aghikeu kumtsu puwuve. 12Panonguno Abram thikuzuu nu Lot khuu Sodom lo kughuna achekeno, pa eno pa nhemgha ishi susu wuve.
13Ike tile timi lakhi kajo poighilu eno Abram ti Ibriu vilo pike. Amarimi Mamre thikuzuu Eskol ngo Aner ache, eno Abram no Mamre chine subo phivilo kughuna ache, eno panonguye Abram sasu xukuqhape ae. 14Kughou Abram no pa bolomi huye lepusu wuvae pi chilukeno, pa gholo acheke lono punu kemiqo, aqemi shitsashi qophe puakeqo kumtsu kuqhakelo 318 aghu nanu pepipeno Dan kutolo kukamiqo hu haue. 15Tile pa timiqo aqo kini shi puzu putho lono panongu le. Eno Damaska ahuu Hoba ipikeu kutolo panongu hasusu wue. 16Pano tinhemgha kumtsu hakho sughie eno pa thikuzuu Lot ngo pa nhemgha totimiqo eno timiqo ghi sachile saghie.
Melkhizedek ngo Abram
17Kughou Abram no Khedarlaomer ngo pagholo kukami akeqo sasu aghu shino toluve puzu idewo chekelo, Sodom lo akukauno pasasu kushoniye Shave qalo wue, tiye Akukau Luqa ghi picheni. 18Melkhizedek ye Salem lo akukau shi ache eno Ighono Akiqheu Lhou wu achineu ghi shi ache, eno pano Abram lau asho ngo atsaiji peighi. 19Pano Abram kumghatsu ghi pi:
“Atsutsu ngo ayeghi lhokeu
Akiqheu Lhou pelo Abram kumghatsu peniu!
20Opelo aghumiqo shou aghulo tolu peke,
Ighono Akiqheu Lhou sheqhelo.”
Eno Abram no pano kiu hakholu keno tipau lono chighi saje lo lakhi pesu patsue.
21Tile Sodom kukauno Abram vilo pi, “Iwu timiqoye itsulo eno tinhemghaye nono lulo.” 22Ikemu Abram no ishi khochile, “AMPEU, Ighono Akiqheu Lhou, atsutsu ngo ayeghi kipighiu zulono ino i-u peqhe ghi tushoqhi ani, 23ike niye ayeho tachu momu apukhukuqho kutsugha kighi mu lumoe eno niye ti onhemgha kiumu lumoe, khilehi nono, ‘Ino Abram pelo kinimi shilupeke,’ ipi pinosake. 24Ti apumi qono kiu chuveakela eno igholo wukemiqo sala likhi kumo aye niye kiumu lutsumoe; Aner, Eskol, Mamre ngo ishi pelo panongu saje lupelo.”
Pašlaik izvēlēts:
BOTHUBO 14: SUMIBSI
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.