THAUREYMEI 2
2
1Heikumna mbaanv kapwm hei damclou the. 2Ravguangc kamei rui taanc bammei taanv tei zaeng chaneimei nungc luai the kumna taanc nthaekc the.#Tat 20.11 #Ibr 4.4,10 3Kamei rui zaeng chaneimei tingmik ta tei suaihiamlou the. Mi tingmik ta tei nkunmei tingmik swna reicpatlou the, kalam thu mi nungc tei damhmei taanv tei luai the kumna taanc nthaekc the. 4Heikumna mbaanv ti hei damclou the.
Eden Pikwan
Ringhpouc rui tingpuk kandih damhpui kaanc khou heikumna pat khwan e. 5Kandih khou ramhbwan maek khwan e khatni ramhthw akhat na sini kak pat mak khwan e, kalam thu kamei rui ting tii key mak khwan e, khatni kailau taanclou nimei maansei maek khwan e. 6Tiki kandih khou rui achin kuna kandih kapwm ta titimclou bam khwan e. 7Khoutei Ringhpouc Ravguangc rui kandih khou rui taniang laana mi khou tei rui maansei kasiamh the. Kamei rui kanukwang khou ringhmei thiu mbunlou tina maansei tei ringc the.#1 Ko 15.45
8Khoutei Ringhpouc Ravguangc rui neihpat biak thangc Eden khou pikwan akhat kasiamhlou the. Kumna kamei rui kasiamhloumei maansei ta hei khou tei lou the.
9Kamei rui mi khou tei howgaymei thingbang kazaat kaguayna khatni taektw khang gay nimei kaguay tithaulou the. Mi pikwan chung khou tei ringhmei thingbang khatni simei gaymei thaymei thingbang tithaulou the.#Nda 2.7; 22.2,14
10Pikwan khou tei duithuak akhat luangc bam khwan e kumna hei tei rui mi pikwan tei titimc bam khwan e. Eden luangc twan pat pwkhou hei tei duiriang padeih khang ruangrac kan the. 11Reymei duiriang tei Pishon e, hei tei Havila kandic kapwm ta luangc nkuay e. Mi khou tei kachaekc ni pat re. 12(Mi Kandic khou kachaekc tei nthan e, namhgaymei bedola bang khatni kamanv kunghmei ntauh ni nai e.) 13Kaneimei duiriang zanc rui Gihon e; hei tei Kus kandic kapwm ta luangc nkuay e. 14Kathumhmei duiriang rui Tigris re. Hei tei Asiria tuang neihpat thangc luangc e. Padeihmei duiriang rui Euphratis the.
15 Ringhpouc Ravguangc rui maansei ta tei Eden khou pikwan tei taanc bam khang khatni gaek bam khang lou the.
16 Ringhpouc Ravguangc rui maansei khou tei latdanv tiina sa the, “Pikwan khou naimei thingbang kathuic tuang tingthai nang tu nuh e, 17tiki simei gaymei thaymei thingbang thai tei thu tu lak nina e; nang hei tei tu e thei, tu rap nungc rui nang theic puni.”
18Khoutei Ravguangc rui sa the, “Maansei hei karana bammei hei gay mak khe. Kata nkhavlou khang kapam khang chamei akhat kasiamhlou puni the.”
19Kumna kamei rui kandih khou rui taniang laana khouringh khounah, nruay thauruay kasiamh the. Mi guay zanc tei phuaklou khang Ravguangc rui mi guay tei maansei khou tei laaguang the; heikumna kaniw zanc tei nai kanmei tuang the. 20Mipu tei rui khouringh khounah khatni nruay thauruay zanc phuaklou the. Tiki mi guay tei akhat na sini kata nkhavlou khang chamei pam hamh the.
21Khoutei Ringhpouc Ravguangc rui maansei ta tei tizip theicmangh manglou the, kumna kamei zip bam khou tei rui mipu tuang naekpairou akhat laa patna kazanctei rui gum binlou dat the.
22Mi rou khou tei rui ntumei akhat kasiamh patna mipu khou tei laaguang the. 23Khoutei mipu tei rui sa the,
“Ntaw thu, mi hei arou khou rui laa patmei rou the,
azanctei khou rui laa patmei zanctei the,
kumhpui zaeng rui kamei hei ntumei the,
kalam thu kamei hei nggaanvmei khou rui laa patmei tuang e.”
24Heikum tina nggaanvmei rui kapui kapu ta ganclouna kanow khou amyan nina e kumna kaney pumh akhat na sw nina e.#Met 19.5; Mrk 10.7,8; 1 Ko 6.16; Eph 5.31
25Ntumei lev nggaanvmei kaney tei pheybaan piu mak ge, tiki kaney zak mak khwan e.
Pašlaik izvēlēts:
THAUREYMEI 2: RONGBSI
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.