約翰 6
6
給五千人食飽
(馬太 14:13-21；馬可 6:30-44；路加 9:10-17)
1後來，耶穌渡過加利利湖 (又安到提比哩亞湖)。 2有一大群人跈等佢，因為佢等看過佢醫病个神蹟。 3耶穌上山，同厥學生共下坐等。 4該時猶太人个𨃟過節會到了。 5耶穌昂頭，看到一大群人來到佢个面前，就對腓力講：「𠊎等愛去㖠位買食物，俾這兜人食飽呢？」 6(佢講這個話係愛試驗腓力；佢自家已經知愛樣般辦理。)
7 腓力回答：「就係用兩百隻銀錢 #6:7 一隻「銀錢」係當時工人一日个工錢。去買餅仔，每一個人分一些些仔，也係毋罅！」
8另外一個學生，就係西門‧彼得个老弟安德烈，㧯耶穌講： 9「這位有一個細阿哥仔帶五隻大麥餅㧯兩尾魚仔，總係樣會罅分給恁多人呢？」
10耶穌吩咐佢等講：「喊大家坐落去。」 (該地方有盡多草。) 大家就坐落去，單淨男人約有五千儕。 11耶穌拿起餅仔來，感謝上帝後，就分給坐等个人；魚仔也係恁樣分；大家全部得到所需要个。 12佢等食飽以後，耶穌吩咐學生講：「將所賸个餅碎仔全部拈起來，毋好打喪。」 13佢等就將五隻大麥餅个碎仔，就係大家食賸个，拈起來，總共裝滿十二隻籃仔。
14大家看到耶穌所行个神蹟，就講：「這個人一定係該愛來世間个先知！」 15耶穌知佢等愛拉佢，強迫佢做王，佢自家一個人又閃到山頂去。
耶穌行水面
(馬太 14:22-33；馬可 6:45-52)
16臨暗仔，耶穌个學生來到湖滣， 17上船，向湖對面个迦百農出發。該時天已經暗，耶穌還吂來到佢等該位。 18忽然起狂風，波浪盡激。 19學生搖槳，大約行五六公里，看到耶穌在湖面向船行等過來，就盡著驚。 20耶穌㧯佢等講：「係𠊎，毋使驚！」 21佢等就歡歡喜喜接佢上船；船即時就到目的地。
眾人尋耶穌
22第二日，留在湖對面个一大群人想到原來該位只有一隻細船仔；佢等知耶穌並無同學生共下上船，該兜學生係自家離開个。 23有幾隻對提比哩亞來个細船仔停在湖邊，就係主感謝後分餅仔給大家食个地方个附近。 24這群人發現耶穌㧯厥學生無在該位，就上船去迦百農尋佢。
耶穌係生命个糧食
25佢等在湖个對面尋到耶穌，問佢講：「先生，你幾時來到這位哪？」
26耶穌應講：「𠊎實在㧯你等講，你等尋𠊎，毋係因為看到神蹟，係因為有食到餅仔，又得到飽足。 27毋好為到會腐爛个食物操勞，愛為該存到永生个食物打拚。這食物就係人子愛賜給你等个，因為人子係阿爸上帝所印證个。」
28佢等就問講：「𠊎等愛做麼介正算係做上帝个工作哪？」
29耶穌應講：「信上帝所差來个，這就係上帝愛你等做个工作。」
30佢等又問講：「恁樣，你愛行麼介神蹟給𠊎等看來信你哪？你个工作到底係麼介哪？ 31𠊎等个祖先在曠野有食過嗎哪，像聖經所記載个：『佢將對天頂來个糧食賜給佢等食。』」
32耶穌講：「𠊎實在㧯你等講，毋係摩西賜給你等對天頂來个糧食；只有吾爸正賜給你等該對天頂來个真糧食。 33因為上帝所賜个糧食就係該對天頂降臨、將生命賜給世界个。」
34佢等講：「先生，請常常將這糧食賜給𠊎等！」
35耶穌㧯佢等講：「𠊎就係生命个糧食。到𠊎這位來个，永遠毋會飢；信𠊎个，永遠毋會渴。 36總係𠊎識㧯你等講，你等已經看到𠊎，還係毋信。 37凡係阿爸所賜給𠊎个人攏總會到𠊎這位來。到𠊎這位來个，𠊎絕對毋會拒絕佢； 38因為𠊎對天頂下來，毋係愛照𠊎自家个意思行事，係愛實行該『差𠊎來个』个旨意。 39該『差𠊎來个』个旨意，就係愛𠊎保守佢所賜給𠊎个人，連一個也毋會失落，反轉，𠊎在末日愛使佢等復活。 40因為阿爸个旨意係愛使所有看到孻仔並信佢个人得到永遠个生命；在末日，𠊎愛使佢等復活。」
41 猶太人因為耶穌講：「𠊎係對天頂降下來个糧食」，就暗中議論講： 42「這個人敢毋係約瑟个孻仔耶穌嗎？𠊎等認識佢个爺𡟓。這下，佢樣敢講佢係對天頂降下來个！」
43耶穌講：「你等莫暗中議論。 44若毋係該差𠊎來个阿爸吸引人，無人會到𠊎這位來；到𠊎這位來个，在末日𠊎愛使佢復活。 45先知个書記載講：『逐個人會得到上帝个教示。』所有聽從阿爸又接受厥教示个，攏總愛到𠊎這位來。 46這毋係講有麼人看過阿爸；只有對上帝該位來个正看過阿爸。 47𠊎實在㧯你等講，信个人就有永遠个生命。 48𠊎就係生命个糧食。 49你等个祖先在曠野食過嗎哪，還係死掉； 50總係該對天頂降下來个糧食係愛使食个人毋會死。 51𠊎就係對天頂降下來、該賜生命个糧食；食這糧食个人永遠毋會死。𠊎所愛賜給人个糧食就係𠊎个肉，係愛使世間人得到生命个。」
52這個話在猶太人當中引起激烈个爭論。佢等講：「這個人樣般做得用自家个肉給𠊎等食呢？」
53耶穌㧯佢等講：「𠊎實在㧯你等講，你等若毋食人子个肉，啉佢个血，你等就毋會有真个生命。 54食𠊎个肉、啉𠊎个血个，就有永遠个生命；在末日𠊎愛使佢復活。 55𠊎个肉係正經做得食个，𠊎个血係正經做得啉个。 56該食𠊎个肉、啉𠊎个血个，佢就在𠊎底背，𠊎也在佢底背，兩儕成做一體。 57永生个阿爸有差派𠊎，𠊎也因為佢來生；共樣，食吾肉个人也愛因為𠊎來生。 58這就係對天頂降下來个糧食。這糧食毋係像你等个祖先食過个，佢等食嗎哪，還係死掉；總係食這糧食个人會生到永遠。」
59這兜話係耶穌在迦百農會堂教示人講个。
永生个話
60好多學生聽到這兜話，就講：「這教訓恁硬，麼人聽得入耳？」
61耶穌知厥學生暗中議論這件事，就對佢等講：「這話害你等信心搖動係麼？ 62若係你等看到人子升上去佢原來个所在，又樣般呢？ 63給人生命个係聖靈，肉體係無麼介路用个；𠊎㧯你等講个話會使你等得到賜生命个靈 #6:63 「會使你等得到賜生命个靈」抑係譯做「係對賜生命个靈來个」；原文直譯「就係靈，就係生命」。。 64總係你等當中有人毋信。」 (耶穌早就知㖠兜人毋信，麼人會出賣佢。) 65佢講：「所以，𠊎識㧯你等講，若毋係吾爸个恩賜，無人會到𠊎這位來。」
66對該時起，跈佢个人當中有好多人退出去，無愛再跈佢共下去。 67耶穌就問厥十二個學生講：「你等哪？你等也愛退出嗎？」
68 西門‧彼得應講：「主啊，你有永生个話，𠊎等還愛跈麼人呢？ 69𠊎等信，也知你就係對上帝該位來个聖者。」
70耶穌講：「𠊎敢毋係揀選你等十二個人嗎？總係你等當中有一個係魔鬼！」 71耶穌這句話係指加略人西門个孻仔猶大講个。猶大係十二個學生个一個，就係後來出賣耶穌个人。
Pašlaik izvēlēts:
約翰 6: THV12Hdb
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© The Bible Society in Taiwan, 2012
All rights reserved
© 台灣聖經公會版權所有 2012