出埃及記 7
7
1上主對摩西講：「𠊎愛使你在國王面前像上帝共樣，若哥亞倫愛代你講話，像做你个先知。 2你愛將𠊎命令你講个話全部㧯亞倫講，喊若哥向國王講，愛佢放以色列人離開這個國家。 3總係𠊎愛使國王心硬，無論𠊎對埃及行幾多神蹟奇事， 4佢還係毋聽你等个話。最後𠊎愛嚴嚴責罰埃及；𠊎愛𢱋𠊎个軍隊以色列个子民離開這地方。 5𠊎對埃及出手，𢱋以色列人離開佢等國家个時，佢等就會知𠊎係上主。」 6摩西㧯亞倫就完全照上主所命令个去做。 7佢等㧯國王交涉个時，摩西已經八十歲，亞倫八十三歲。
亞倫个柺棍仔
8上主對摩西㧯亞倫講： 9「若係國王愛你等行一隻神蹟來證明你等个身份，你愛吩咐亞倫將佢个柺棍仔㧒在國王面前，該支柺棍仔會變做蛇。」 10摩西㧯亞倫去見國王，佢等照上主个命令去做：亞倫將柺棍仔㧒在國王㧯官員面前，該支柺棍仔就變做蛇。 11國王黏時召集埃及个星象家㧯行邪術个；佢等也變法術來做共樣个事。 12佢等逐儕將手中个柺棍仔㧒在地上，也全部變做蛇；總係亞倫个柺棍仔吞掉佢等个柺棍仔。 13照上主所講个，國王个心還係恁硬；佢毋聽摩西㧯亞倫个話。
埃及受災難
(1) 血災
14上主對摩西講：「埃及王心硬，佢毋放𠊎个子民走。 15天光朝晨，佢去尼羅河个時，你去見佢。將你該支變過蛇个柺棍仔帶去，在河壩滣等佢。 16你愛對佢講：『上主 — 希伯來人个上帝派𠊎來，愛你放佢个子民走，俾佢等在曠野敬拜佢，總係你一直毋肯聽。 17上主恁樣講，這下你會對佢所行个來知佢就係上主。你看，𠊎愛用這支柺棍仔打河壩水，水會變做血， 18魚仔全部會死淨淨，河壩水會臭掉，埃及人會毋敢啉這水。』」
19上主對摩西講：「你愛㧯亞倫講，喊佢手擎佢个柺棍仔，伸手向埃及所有个河壩、運河、湖㧯陂塘。水全部會變做血，全國滿地係血，連水桶、石缸底背也全部係血。」
20所以，摩西㧯亞倫照上主个吩咐去做。在國王㧯佢个官員面前，亞倫擎起柺棍仔打河壩水，河水全部變做血。 21河壩肚个魚仔死掉，河壩水也臭掉，埃及人無法度食這個水。埃及逐地方个水全部變做血。 22總係埃及行邪術个也行法術，共樣使水變做血。照上主所講个，國王个心比以前還較硬，毋肯聽摩西㧯亞倫个話。 23毋單淨恁樣，國王轉去王宮，無將這事放在心肚。 24所有个埃及人全部無法食河壩个水，高不將在河壩滣挖井食地下水。
25上主打河壩水後，這災難連續七日。
Pašlaik izvēlēts:
出埃及記 7: THV12Hdb
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© The Bible Society in Taiwan, 2012
All rights reserved
© 台灣聖經公會版權所有 2012