Mataio 4
4
Tiaporo Ehore Iesu Ehobona.
(Mk 1.12-13; Lk 4.1-13)
1Weiana Auba Robe ehore Iesu eaoaina hano'akunai tiaporo#4.1 Satani kehore kehobona. 2Iesu wapu ikoinai bariabui erobe aniani ha a'i eani, murinai hanona mare'a e'ari ki'a. 3Aonai baihobo hauna emai herena e'abi etibaha, “Peoi Tirama nahuna raninai, pihara neiakia mohina benakia pohamai temeao.” 4Ia Iesu e'abi etibaha, “Puka robenai aba tererena,
‘Maearima hanona pohamai mo
a'i katemauri,
ia Tirama ena 'abi ehina haukia
ikoinai katea'inakia hanona
katemauri.’”
5Weiana tiaporo ehore Iesu eaoaina Ierusalema aiara robena, Marea robe 'ubina 'akinai ebakori 'auna, 6ba ehinabena etibaha, “Peoi Tirama nahuna raninai, kipomu naia morobo ahi. Pokina Puka robenai aba tererena,
‘Tirama ena aneru kehina benakia
kate'imani'o imakiai
katea'i taeani'o,
weiana piharai aemu
a'i mokaina ta'una.’” Sal 91.11, 12
7Iesu ia ena 'abi ebamuena etibaha, “Puka robenai abomo ṉa terere aihona,
‘Obiapaka emu Tirama
baihobo 'ekanai a'i kohorotina.’”
8Haeamona tiaporo ehore Iesu eaoaina 'ubi 'akina kobiona kaipanai ebaehe 'auna, ba hanopaka aiarakia maikoina nuabina ebaihana. 9Tiaporo e'abi etibaha, “Kokaipehu kokuti aina'u raninai, neiakia maikoinai oi kabeni'o.” 10Iesu haeamona e'abi etibaha, “Satani e, mokatu'a! Puka robenai ṉa terere aihona,
‘Obiapaka emu Tirama
iamo ikupaiana kokuti aina,
mai ta'arana koa'i.’”
11Weiana tiaporo Iesu herenai ekaobo, ba aneru temai tebaraina.
Iesu Ena Aka Ea'i Ramana Galileai.
(Mk 1.14-15; Lk 4.14-15)
12Iesu Ioane aba wapura itunai tehorotina pouna eona raninai emue eao Galilea hanonai. 13Weia Nasareta aiaranai a'i emiaho, ia eao Sebulon mai Napatali hanokiai Galilea obu haianai aiara ha atana Kaperanauma ua'a emiaho. 14Neiana erama hanona Isaia mahabanai hauna e'abi hanona kebatohana etibaha,
15“Sebulon hanonai
mai Napatali hanonai,
obu haianai, Ioridana ate
abihanai,
Galilea rama haeai haukia
ekia hano ai!
16Maearima weiakia
wapurai ṯemiaho haukia
ea rarina 'akina kateihana.
Weiakia 'ari aiaiakia hanokiai
ṯemiaho haukia herekiai
ea kerara.” Isa 9.1, 2
17Rani weianai Iesu ena iroro ea'i ramana etibaha, “Emi ki'ai tomoraona kabe, pokina Tirama ena obia aiarana#4.17 Basileia hanona aba ekaibari!”
Iesu Ba'eha Haukia Bani Eaparinakia.
(Mk 1.16-20; Lk 5.1-11)
18Iesu Galilea 'obu poena haiana ekana eao aonai, a'a hati rua Simona, teaparina Petero, uaho 'abana Anderea ohi eihanakia ekia re'e 'obu aonai tehorenakia, pokina ia hanona ba'eha haukia. 19Iesu ehina benakia etibaha, “Muri'uai tomai. Au kahore maearima iba'eha benikia haumiai kabaonimi.” 20Beronai ekia re'e tehabonakia murinai teao.
21Eka'a haha eao hanona a'a hati rua Iakobo mai Ioane hamakia Sebedeo kipokia ekia ahi ahanai ekia re'e tiahu abunakia eihanakia ba eaparinakia. 22Beronai ekia ahi mai hamakia tehabonakia Iesu murinai teao.
Iesu Eiroro mai Inawa Ebanamonakia.
(Lk 6.17-19)
23Iesu Galilea hanona maikoina aona ekana, Iuda haukia ekia marea aokiai eba'iobi, Tirama ena obia aiarana pouna namona eiroro aina, mai maearima ekia inawa haeai haeai mai hau haiara haeai haeai ikoinai ebanamonakia. 24Suria hanopakana maikoina aonai pouna erama otaraina, weiana maearima tehore inawa haeai haeai haukia temaiainakia Iesu herena, hau haiara haeai haeai haukia, aokiai auba ki'a obokia haukia, nawa ti'ari aina haukia, mai 'ome haukia. Ia ehore ikoinai ebanamonakia. 25To'u rarina 'akina Galileai mai weiakia Aiara Harauhaeai, Ierusalemai mai Iudai, Ioridana atena abiranai hanokia maearimakia Iesu murinai teka'a.
Pašlaik izvēlēts:
Mataio 4: rroNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2002, Wycliffe Bible Translators, Inc. All rights reserved.