Mag 6
6
Nazarif yaab kaah nan yii Yisa man
(Matiu 13:53-58; Lug 4:16-30)
1Ni bu le Yisa nin u bɔɔnɔɔb nan nyan nin yaan ki jir chaa kun u tɔɔl a tiŋin. 2Le likpakɔɔl daal nan foo, le u kɔɔ kuwonjiɛndiigin ke un wɔɔn bininfob Uwonbɔr a bɔr. Bininfobin kaah nan gbir u wɔɔnimin, le ni gar bi biɛn, le bi baan tab ke, “Uja nan kan nlam nan la ban naa? U ŋa niin ki fir tun ligaril a toon nan naa? U kan ni niɛ nan biɛn laa? 3Kanpinta-n le kaa yen naa? Naa ye Meri a bija-n le yen naa? U ma kaa ye Jemisi nin Josef nin Judasi nin Simɔnn a kpel n naa? U ninsiɛb le kaa be nan do nan naa?” Ni ma bu le bi yii u bɔr.
4Le Yisa bei bi ke, “Ulinlenn a tiŋin, nin u tɔɔl a ninfobin, nin u tɔɔl a niin yaabin a binba, le baa tenn u jilima.” 5Waa nan fir tun ligaril a toon niin ni, bibaarib bi ŋa nan bu, le u nan ta u nɔɔ ki paan bi bu, le bi kan kutebug, 6amaa bininfobin kaah kaa nan ŋa u yada-n bu le ni nan gar u.
Yisa kaah nan tun u tooi piig nin bilee man
(Matiu 10:5-15; Lug 9:1-6)
Man le Yisa nan chonn ntinbumin ki wɔɔn Uwonbɔr a bɔr, 7le ki nan nan lagin u tooi piig nin bilee ki sei bi npɔɔn ke bin nyan nnaanbiim bininfobin, u nan tun bi bilee lee bilee lee le.
8Le ki bei bi ke, n-yonn man wee ni chaa nan, ni laa ŋmag niba ki chaa, see ni jaangbiɛm a binba. Ni laa ŋmag tijiiri, ki laa ŋmag ipɔgi, ni mu laa ŋuun iligi. 9Ni li tag inaataga, amaa ni laa ŋmag daala kiba ki kpiɛ. 10Ni ye ni foo iniin yan yaan wee bi gaa ni kuchɔŋ ke, ni li be niin ki tan kpaa ni nya daal. 11Ni ye ni foo kitiŋ kiba ni, wee bininfobin kaa gaa ni ke, ki mu kaa ji pel ni wɔɔnim n ke, ni nya kitiŋ nmɔn yaan na, wee ki pir ni taai a tan ki jaa kitiŋ nmɔn yaan na, wee ni li ye siɛra biig ki sei bi.”
12Le bi nan fii ki jon ki tan mɔɔn ke, bininfob n jiɛn bi toonbira, 13le bi nan nyan nnaanbiim bininfobin takpem le ki war nkpam ŋa bibaarib takpem le bi kan kutebug.
Jɔnn Wan nan Fu Bininfob Uwonbɔr a Nyunfulin a kum a bɔr
(Matiu 14:1-12; Lug 9:7-9)
14Ubɔr Herɔd nan gbir Yisa a bɔra, u yinl kaah nan don takpemin bu. Le bininfob biba ke, “Jɔnn Wan nan Fu Bininfob Uwonbɔr a Nyunfulin le fii nkumin. Ni ma che u jɔɔ npɔɔn ki tun ligaril a toon man.”
15Le biba mu ke, “U ye Uwonbɔr a linlenu Elaja le.” Le biba mu ke, “U ye Uwonbɔr a linlem ban nan be yaayoo n-yaa ni u ba le.”
16Ubɔr Herɔd ma kaah gbir man n-yonn man nin, le u ke, “U ye Jɔnn, wan wee n nan che bi jii u yul ki tugirin le, le u fii nkumin ki be u miɛlin.” 17Herɔd baantɔɔl le nan che bi choo Jɔnn ki baan u kubaandaag ki ta u ŋa kuloondiigin, u ma Herɔd a waal Filib a poo bu. Bi nan yi upii nmɔn a yinl ke Herɔdiya, Herɔd le nan fee u ki kɔɔn. 18Jɔnn nan bei Herɔd le ke Uwonbɔr a siim kaa chee nin un fee u waal a poo ki kɔɔn ni. 19Ni ma bu le nan che Herɔdiya nan nan Jɔnn, ki ban un ku u, amaa le kaa sin nyi waah li ŋa man ni. 20Nan bu-n, Herɔd nan san Jɔnn le, u nan nyi Jɔnn kaah ye upoopendaan wan san Uwonbɔr. Mambu le u nan fee Jɔnn ki jaa. Jɔnn kaah nan mɔɔn Uwonbɔr a bɔr nmɔn Herɔd nan pelig le, ni nan bii u sufu pam, amaa le u le pɔɔn uba ki pelig u bɔr nmɔn.
21Ni bɔɔn bu le Herɔdiya a bonni nan nan choo Jɔnn. Herɔd a maalim a chiig daal kaah nan nan foo-n, le u yin u bɔrbum nin bitɔtob a ninkpeeb nin Galilii a tingbɔŋ a ninkpeeb biɛn. 22Le Herɔdiya a bisa nyan ki nan waa kiwaag, le ubɔr Herɔd nin u cham a pool pen, le u baan kibisiɛgin ke, “Ba wee a ban n ŋa seiŋaa? N li seiŋ nan biɛn wee a ban.” 23Le ki poo tipoor sei kibisiɛgin ke, “N li seiŋ nan wee a ban, hali ni sir nin n bɔgir n naam nan a bɔgil ki seiŋ ke, n li seiŋ.”
24Le kibisiɛg nan nan nyan ki tan baan u na ke, “N le pii ni yin bei ubɔr ke n ban baa?” Le u na bei u ke, “Tan bei ke, a ban Jɔnn wan fu bininfob Uwonbɔr a nyunfulin a yul le.” 25Iyaayoo nmɔn le kibisiɛg nmɔn nan nyan ki jir ubɔr Herɔd ban ki tan bei u ke, “N ban Jɔnn wan fu bininfob Uwonbɔr a nyunfulin a yul le, a ta kpeen kitasaŋin ki seim daandaan nan.”
26Ni nan bii ubɔr a sufu pam, amaa, u mu kaa ji na li fir yii kibigin kaah ban nan nin ni, waah bi chinn ki poo tipoor bichamin ban ni bu. 27Le ki nan tun bitɔb a jau libol nmɔn, ke un tan tugir Jɔnn a yul ki nan sei u. Le bitɔb a jau nan sin nan jon kuloondiigin ki tan tugir Jɔnn a yul, 28ki ta kpeen kitasaŋin, le ki nan ta sei kibisiɛg nmɔn. Le u mu ta ki tan sei u na, 29Jɔnn a bɔɔnɔɔb kaah nan gbir man n-yonn man nin, le bi dan ki nan yuur u gbanann ki tan pii.
Yisa kaah nan jin bininfob turiŋmu man
(Matiu 14:13-21; Lug 9:10-17; Jɔnn 6:1-14)
30Ni bɔɔn bu le Yisa a tooi nan jirin u ban ki nan bei u baah tan tun nan biɛn, ki sin ji wɔɔn bininfob man. 31Bininfob takpem le nan dan, biba nan chaan le biba mu jir hali ke Yisa nin u tooi kaa nan jɔɔ isaŋ nin bin ji. Ni ma bu le u nan bei bi ke, “Ni che ti jo kulɔŋ, ti binba, ki foor wama.” 32Le bi kɔɔ kuŋaluŋin bi binba, ki lɔŋ ki jon kulɔŋin.
33Baah nan chaa n-yonn man nin, le bininfob takpem nan kan ki biɛ bi, le ki nan nyan bi timin, ki guun ki kpagin limɔgil a gbaam ki chinn kenn bi. 34Yisa kaah nan nyan kuŋaluŋin yaan nin, ki miin bininfob pii lagin le ki mug, le kunyunyunbaag choo u takpem, bi binbem nan nann ipee yan kaa jɔɔ upeekpaar le. Le u nan piin iyaayoo nmɔn ki wɔɔn bi tibɔr takpem.
35Iyoo nmɔn kaah nan nan jon nin, le u bɔɔnɔɔb nan dan u ban ki nan bei u ke, “Isaŋ jon na, le taah be nan yaan nan mu ye kulɔŋ le. 36Jaa bininfobin wee bin jo kitiŋin, nin ntinbum man mal, wee ki tan daa tijiir ki ji.”
37Le u mu bei bi ke, “Ni tɔɔlin sei bi tijiir wee bin ji.”
Le bi jiin ki baan u ke, “A ban ti taa iŋmal iniin a yɔɔr le ki tan daa tijiir ki nan sei bi wee bin jii?”
38Le u baan bi ke, “Ni jɔɔ boroboro kon iŋaa? Ni tan liga man.”
Baah jon ki tan lig ki biɛ n-yonn man nin, le bi jirin ki nan bei u ke, “I ye boroboro kon iŋmu le nin njanbum milee.”
39Le Yisa bei u bɔɔnɔɔbin ke bin che bininfobin bɔgir ki kal ikur ikur timɔsɔɔn bu. 40Le bi bɔgir ki kal ikur kobig bininfob piŋmu piŋmu. 41Le u yuur boroboro-n nin ijan ilee-n, le ki waan lig paab, le ki poor Uwonbɔr, le ki war war boroboro-n ki ta sei u bɔɔnɔɔbin ke bin ta tol bininfob nmɔn na, le ki por por ijan ilee nmu, le bi tol bininfobin biɛn. 42 Le bininfob n biɛn jin ki nan gbee ki sin gur. 43Le u bɔɔnɔɔb lagin tijiir tan gurin, ki gbeen tikachar piig nin tilee. 44Bijab ban nan jin tijiir nmɔn nan ye bininfob turiŋmu le.
Yisa kaah nan chonn nnyum bu man
(Matiu 14:22-33; Jɔnn 6:15-21)
45Libol nmɔn le Yisa nan che u bɔɔnɔɔb kɔɔ kuŋaluŋ ki lii u sam ki tan lɔŋ limɔgil a dool, ki chaa Befisada; amaa le u ma paar ke un jaa bininfobin. 46Waah jaa bininfob nmɔn ki diɛ n-yonn man nin, le u don lijɔɔl a papaab ki tan be ki miɛ Uwonbɔr.
47Le kunyiɛg nan ŋmiɛ, ke kuŋaluŋin la be nnyum a sisiigin, le u ma la be lijɔɔl n-yaa paab u binba, 48le u nan kan ki miin u bɔɔnɔɔbin be gbaar le ki kur ke kuŋaluŋ n jo, bi nan too nfaam le. Le u fii ki choon nnyum bu ki chaa bi ban kutaayɔg. Waah tan mal n-yonn man nin, le ki ŋa ke u yin jo jo bi ban le-n. 49Le bi kan u ki miin u choon nnyum bu le, le bi nyi ke u ye utakpiir le, le ki nin yigin papaab, 50bi biɛn nan kan wa, le bijawaam choo bi takpem.
Libol nmɔn le u bei bi ke, “Ni che ni sufu li pɔɔu ke ni ye min le; ni laa san bijawaami.” 51Le ki kɔɔ kpiɛ bi bu kuŋaluŋ nmɔn yaan; le ntafaamin jir ki ŋmin soon. Le ni ŋa bi ligaril takpem, 52nan bu-n, baa laa nan biɛ boroboro-n a taai.#6:52 Baa nan biɛ Yisa kaah nan ta boroboro kon iŋmu ki jin bin ni. Bi tuli le nan pɔɔ.
Yisa kaah nan che bibaarib kan kutebug Genesareti man
(Matiu 14:34-36)
53Baah tan nyan limɔgilin yaan wee ki don ligungonl a paab, Genesareti a tiŋin ni, le bi lol bi ŋaluŋ ki siin. 54Niin a ninfob kaah nan kan Yisa nan, bi nan biɛ u le weem, 55le ki nan gu ki kɔɔ kitiŋ nmɔn a logi biɛn ki tug bibaarib ki jɔɔ chaan Yisa ban. Bi gbir ke u be nan yaan biɛn ke, bi tug bibaarib bi wan dɔɔn waŋ bu le ki chaan u ban. 56Ni ye u nyan kitiŋ kan yaan bee ntinbum biɛn nin ke, bininfob jɔɔ bibaarib le ki too u nsan bu hali nin nnyamin na, ki balin u ke un le che bibaarib n maa u daala a gbaam, le ban biɛn nan pii u ki maa nmɔn biɛn nan kan kutebuga.
Pašlaik izvēlēts:
Mag 6: KUGL
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Komba New Testament © Bible Society of Ghana, 2014.