Génesis 44
44
José vaso pꞌaratꞌadee ooda
1Nekꞌodapꞌeda, kꞌɨɨrɨ ikꞌaawa Josepa jaraji ichi tedepema mimiapataarã poro waibɨamaa:
—Ãchi costal trigopa ipurupáde aji, mãikꞌaapa costal chaachaa ãchi pꞌaratꞌa waya tꞌɨ bɨpáde aji. 2Ichiaba mɨ vaso pꞌaratꞌadee ooda tꞌɨ bɨ́ji chi tꞌẽepema costalde ichi pꞌaratꞌa ome.
Ma mimiapataarã poro waibɨapa mãga ooji.
3Tapꞌeda Josepa ãra wãpiji ãchi burroorã ome. 4Ma tꞌẽepai, pꞌuurudeepa makꞌɨara tꞌɨmɨa–ee wãdade Josepa mãgaji ichi mimiapataarã poro waibɨamaa:
—Ma eperãarã tꞌẽe wãdapáde aji. Ẽpꞌedakꞌãri, iidíji: “¿Sãapꞌeda parãpa ne–inaa kꞌachia oojidama tai chiparipa pia ooda pari? 5¿Sãapꞌeda ichi vaso pꞌaratꞌadee ooda atee wãjidama? Irua ne–inaa pꞌasaitꞌee kꞌawa kꞌinia bakꞌãri, ma vasode topari. ¡Parãpa ne–inaa kꞌachia oojidada!” aitꞌee.
6Ẽpꞌe atadakꞌãri, ma mimiapataarã poro waibɨapa aukꞌa iidiji Josepa jaradakꞌa.
7Ãrapa pꞌanaujida:
—¿Sãapꞌeda pɨa tai ɨmɨatee kꞌinia bɨma? ajida. ¡Taipa mãgee ne–inaa oodakꞌaapɨ! 8¿Canaán eujãdeepa taipa ma naawedapema pꞌaratꞌa unudapꞌedaa costalde tee chejida–ekꞌã? ajida. ¿Sãgá pɨ chipari nẽe wa pꞌaratꞌa chɨa atadayama? ajida. 9Tai netꞌaade ma vaso unuruta pɨrã, chi ateeru piu baibeeipia bɨda ajida, mãikꞌaapa tai pɨ chipari esclavoorã pꞌaneedaipia bɨda ajida.
10Mãpai ma mimiapataarã poro waibɨapa pꞌanauji:
—Mãga–eda aji. Jĩpꞌa ma vaso ateeru aupaita esclavo paitꞌee. Apemaarã wãdayada aji, pãchi eujãdee.
11Chi ɨ̃pemaarã jõmaarãpa ãchi burrodeepa ãchi costal isapai ɨrabai atajida mãikꞌaapa ewajida. 12Ma mimiapataarã poro waibɨapa jɨrɨji naapemadeepa tꞌẽepema parumaa. Mãpai Benjamín costalde ma vaso unu ataji. 13Mãga unudakꞌãri, chi ɨ̃pemaarã ãchi pꞌaru jẽtꞌaajida tꞌãri pꞌuapa. Mãpai ãchi costal burro ɨ̃rɨ bɨdapꞌeda, ãpɨtee wãjida pꞌuurudee.
14Judá chi ɨ̃pemaarã ome José temãi panadakꞌãri, iru atꞌãri mama baji. Iru kꞌĩrapite bedabaidakꞌãri tau bɨɨrɨ te jãde tꞌõbairumaa, 15Josepa mãgaji:
—¿Parãpa kꞌãata oojidama? aji. ¿Kꞌawada–e pꞌanɨkꞌã aji, mɨa kꞌawa bɨ ne–inaa awaraarãpa kꞌawada–e pꞌanɨ?
16Judapa pꞌanauji:
—¿Kꞌãata jaradayama? aji. ¿Kꞌãata jaradaima pɨa tai pedee ijãamerã? Tachi Akꞌõrépata tai na kꞌachiade baaipiji. Nama pꞌanɨda aji, pɨ esclavoorã chi vaso chɨa atada ome.
17Mamĩda Josepa mãgaji:
—Mãga–eda aji. Chi vaso iru bada aupai mɨ esclavo paitꞌee. Apemaarã pãchi akꞌõre temaa kꞌãiwee wã́tɨ. Apidaapa parãmaa ne–inaa kꞌachia ooda–eda aji.
Judapa Benjamín pari chupɨria iidida
18Mãpai Judá Josemaa kꞌaitꞌaara wãpꞌeda, mãgaji:
—Eperãarã poro waibɨa, chupɨria kꞌawaapáde aji, mɨa jararu ũriitꞌee. Mɨ ome kꞌĩraunáaji. Mɨa kꞌawa bɨ na eujãde pɨ Faraonkꞌa bɨ. 19Tai naapɨara chedapꞌedaade pɨa iidiji tai akꞌõre pari mãikꞌaapa ɨ̃pema pari. 20Taipa jarajida akꞌõre chonaa bɨta iru pꞌanɨ warra aba, chi tꞌẽepema tꞌoda ome. Nepɨrɨjida tai akꞌõrepa ma warra audú kꞌinia iru bɨ iru aupai nawe apaide beeda perã, chi apema ma nawedé piuda perã. 21Mãpai pɨa jaraji ma tꞌẽepema aneedamerã, iru kꞌawa kꞌinia bada perã. 22Jarajida ma warra chi akꞌõre ikꞌaawaapa wãikꞌaraa bɨda ajida, ma kꞌaurepa chi akꞌõre piudarii perã. 23Mamĩda pɨa jaraji ma ɨ̃pema aneeda–e pɨrã, pɨa tai waa kꞌaripa–e payada aji.
24’Mãgá pedeedapꞌeda, tai temaa wãdakꞌãri, ma jõma nepɨrɨjida tai akꞌõremaa. 25Maapꞌeda tai akꞌõrepa jaraji waya chedamerã nama trigo netode. 26Mamĩda pꞌanaujida: “Tai ɨ̃pema tꞌẽepema wẽe, ma eperã pꞌoyaa akꞌɨnada–eda” ajida. 27Mãpai mɨ akꞌõrepa mãgaji: “Parãpa kꞌawa pꞌanɨda aji, mɨ wẽrapa warra omeepai tꞌoji. 28Aba mɨ ikꞌaawaapa uchiajida aji. Maadamãiipa iru waa unu–e paji. Iru piujida aji, ne–animal kꞌachiapa kꞌotꞌaada perã. 29Chi apema ateeruta pɨrã mãikꞌaapa waya wãdade irumaa ne–inaa kꞌachia pꞌasaru pɨrã, mɨ piu baibeeitꞌeeda aji, tꞌãri pꞌuapa.”
30’Mãgá mɨ akꞌõrepa tai tꞌẽepema audú kꞌinia iru bairã, iru aukꞌa wã–e pɨrã tai ome, 31tai kꞌaurepa mɨ akꞌõre tꞌãri pꞌuapa jai–idaayada aji. 32Mɨa jaraji mɨa mɨ ɨ̃pema tꞌẽepema akꞌɨ bapariitꞌee mãikꞌaapa waya temaa ateeitꞌee. Mãgaji: “Anee–e pɨrã, ma kꞌaurepa mɨ ichita kꞌachiade bayada aji, pɨ kꞌĩrapite.” 33Maperã mɨta beeyada aji, Benjamín pari mimiamaa. Chupɨria kꞌawáaji mãikꞌaapa iru pë́iji mɨ ɨ̃pemaarã ome. 34Mãga–e pɨrã, ¿sãgá mɨ akꞌõremaa wãyama aji, iru warra wẽe? Mɨa unu kꞌinia–e bɨda aji, mɨ akꞌõre mãgá audú chupɨria nɨ̃bamerã.
Pašlaik izvēlēts:
Génesis 44: sjaB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2005, 2010, 2015 Wycliffe Bible Translators, Inc. All rights reserved.