Génesis 34
34
Jacob warrarã kꞌĩrau pꞌanadapꞌedaa
1Leapa Jacob ome kꞌau ooda tꞌɨ̃jarapachida Dina. Jamor eujãde pꞌanɨde Dina wãji te kꞌaitꞌa beemaa awẽraarãmaa pꞌasiade. 2Mamĩda ma wãde ma eujãdepema poro waibɨa, heveo Jamor warra Siquén ome unudakꞌãri, Dinapa kꞌiniaamaa bɨta kꞌãiji aɨ ome. Maperã Dina kꞌĩra nejasia beeji. 3Mãga ooji mĩda, ma Siquenpa Dina kꞌinia iru baji mãikꞌaapa pedeetee kꞌinia baji miakꞌãidaitꞌee.
4Mãga nɨde ma kꞌũtrãa wãji chi akꞌõre Jamormaa mãikꞌaapa mãgaji:
—Wãpáde aji, ma awẽra akꞌõremaa iru iidide mɨ–itꞌee. Iru ome miakꞌãi kꞌinia bɨda aji.
5Jacobpa kꞌawa ataji chi kꞌau ome pꞌasada. Mamĩda chi warrarãmaa maarepida jara–e paji, mẽe nipadapꞌedaa perã ãchi ne–animalaarã ome. 6Mãga nɨde Siquén akꞌõre Jamor wãji Jacobmaa iru ome pedeede ma awẽra kꞌapꞌɨa pari.
7Mamĩda Jacob warrarã teedaa chedakꞌãri mãikꞌaapa kꞌawa atadakꞌãri ãchi ɨ̃pewẽra ome pꞌasada, kꞌĩraudachida. Ma eperãpa ooda audú kꞌachia baji israelitaarã–itꞌee, ãrapa mãga oodakꞌaa pada perã.#34.7 Tꞌẽepai Tachi Akꞌõrepa Moisemaa ley pꞌãpiji miakꞌãi naaweda, Israeldepema wẽra ɨmɨkꞌĩra ome kꞌãiikꞌaraa bɨ.
8Mamĩda Jamorpa ãchimaa mãgaji:
—Mɨ warra Siquenpa parã ɨ̃pewẽra kꞌinia iru bɨda aji. Iru ome miakꞌãipidapáde aji. 9Mãgá parã tai ome ëreerã pꞌaneedai mãikꞌaapa tai parã kꞌaurã ome miakꞌãidai. Jõdee parã tai kꞌaurã ome miakꞌãidai. 10Na eujãde tai ome pꞌaneedapáde aji. Eujã neto atadapáde aji, mãikꞌaapa nama pãchia oo kꞌiniata oodapáde aji.
11Ichiaba Siquén ichi kꞌapꞌɨakꞌɨ pedeeji.
—Mɨ chupɨria kꞌawaadapáde aji. Parãpa iidirutata mɨa teeitꞌee. 12Wẽra–itꞌee pꞌaapata ɨ̃rɨ iidiruta pɨrã, pia bɨda aji. Netꞌaa kꞌinia pꞌanɨ pɨrã, teeyada aji. Aba mɨa kꞌinia bɨda aji, mɨ miakꞌãipidamerã parã ɨ̃pewẽra ome.
13Mãga jaraji mĩda, Siquenpa ma kꞌachia ooda perã ãchi ɨ̃pewẽra ome, Jacob warrarãpa iru unuamaa iru pꞌanajida.
Mapa irumaa mãikꞌaapa chi akꞌõre Jamormaa seewa jarajida:
14—Tai ɨ̃pewẽra pꞌoyaa teeda–eda ajida, ɨmɨkꞌĩra tauchaa wẽe bɨmaa. Mãgee ɨmɨkꞌĩra ome miakꞌãipiruta pɨrã, Tachi Akꞌõre kꞌĩrapite kꞌĩra nejasia pꞌaneedai. 15Aba teedayada ajida, parã taikꞌa pꞌaneeruta pɨrã; tauchaa bɨpiruta pɨrã parã ɨmɨkꞌĩraarã jõmaarã kꞌapꞌɨade. 16Mãga ooruta pɨrã, parãpa tai kꞌaurã atadai. Jõdee taipa parã kꞌaurã ichiaba atadai. Mãgá parã tꞌãide pꞌuuru apai pꞌanapataadai. 17Mamĩda pãchi ɨmɨkꞌĩraarã kꞌapꞌɨade tauchaa bɨdaamaa pꞌanɨ pɨrã, mãgara tai namãikꞌaapa wãdaitꞌeeda ajida, tai ɨ̃pewẽra ome.
18Jamorpa chi warra ome ijãajida. 19Aramata chi kꞌũtrãapa tauchaa bɨpiji ichi kꞌapꞌɨade, Jacob kꞌau audú kꞌinia bada perã.
Ma pꞌuurudepemaarãpa Siquén pipɨara akꞌɨdapꞌedaa perã Jamor warrarã apemaarã kꞌãyaara, 20iru wãji chi akꞌõre ome ãra ome pedeede ma pꞌuuru tꞌĩupatapꞌedaamãi. Mama ichita pedeepachida jõmaarãmaa ne–inaa jara kꞌinia pꞌanadakꞌãri.
Jõmaarã taide mãgajida:
21—Jãgɨ́ ɨmɨkꞌĩraarã tachi kꞌõpꞌãyoorãda ajida. Na eujãde pꞌanapataadaitꞌee mãikꞌaapa negocio oodaitꞌee nama tachi ome. Na eujã waibɨa bairã, tachi jõmaweda araadai. Ãra pꞌaneeruta pɨrã, tachia ãra kꞌaurã atadai mãikꞌaapa ãrapa tachi kꞌaurã atadai. 22Mamĩda ãra ome pꞌuuru a–pai pꞌanadaitꞌee, ãrapa kꞌinia pꞌanɨ tachi ɨmɨkꞌĩraarãpa tauchaa bɨpidamerã tachi kꞌapꞌɨade, ãrapa oopatakꞌa. 23Mãga ooruta pɨrã, ãra netꞌaa ne–animalaarã ome tachidé pꞌaneedai. Aba oodaipia bɨ ãrapa jara pꞌanɨkꞌa. Mãpai ãra tachi ome na eujãde pꞌaneedaitꞌeeda ajida.
24Ma pꞌuurudepemaarã jõmaarãpa Siquén pedee ijãajida. Mãpema ɨmɨkꞌĩraarã jõmaarãpa tauchaa bɨpijida ãchi kꞌapꞌɨade. 25Mãga oojida mĩda, Jacob warrarã Simeón Leví ome atꞌãri ma eujãdepemaarã kꞌĩra unuamaa iru pꞌanajida, Siquenpa ãchi ɨ̃pewẽra ome kꞌachia ooda perã. Mapa kꞌãima õpee parumaa ma tauchaa bɨpidapꞌedaarã pꞌuapa atꞌãri kꞌapꞌɨa tꞌũmaa jõnɨde, Simeón Leví ome mãɨrã jõmaweda peekꞌoo wãjida espadapa. 26Ichiaba peejida Jamor chi warra Siquén ome. Mãpai ãchi ɨ̃pewẽra Dina Siquén tedeepa atadapꞌeda, jirabodojida. 27Mãga nɨde Jacob warrarã apemaarã ma pꞌuurude pachejida. Ma eperãarã kꞌapꞌɨa piuda unudakꞌãri, ãchi netꞌaa pꞌe ata wãjida, kꞌĩra jõda–ee pꞌanadapꞌedaa perã ãchi ɨ̃pewẽra ome pꞌasada kꞌaurepa. 28Atadachida ovejaarã, pꞌakꞌaarã, burroorã, mãikꞌaapa netꞌaa jõmaweda unudapꞌedaa ma pꞌuurude mãikꞌaapa ma pꞌuuru kꞌaitꞌa beeda paara. 29Ma pꞌuurudepemaarã netꞌaa jõmaweda chɨa atadachida mãikꞌaapa mãpema wẽraarã warrarã ome ateejida.
30Jacobpa mãga kꞌawa atakꞌãri, mãgaji Simeonmaa mãikꞌaapa Levimaa:
—Parã kꞌaurépata mɨ kꞌachiade baaiitꞌeeda aji. Ma oodapꞌedaa kꞌaurepa cananeorãpa ferezeorã ome mɨ kꞌĩra unuamaa iru pꞌanapataadaitꞌee. Pedeeteedaitꞌee mɨ ome chõodaitꞌee mãikꞌaapa ma–itꞌee chedakꞌãri, tachi jõmaweda peekꞌoodaitꞌeeda aji, tachi chokꞌara–ee pꞌanadairã.
31Mamĩda Jacob warrarãpa pꞌanaujida:
—¿Pia bajikꞌã ajida, jãgɨpa tai ɨ̃pewẽra atamerã prostituta atapatakꞌa?
Pašlaik izvēlēts:
Génesis 34: sjaB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2005, 2010, 2015 Wycliffe Bible Translators, Inc. All rights reserved.