Génesis 15
15
Tachi Akꞌõrepa Abrammaa warra oopiitꞌeeda ada
1Ma tꞌẽepai ewari aba Tachi Akꞌõrepa Abrammaa kꞌãimokꞌaraa pɨkꞌa bɨde pedeeji:
—Abram, waaweenaapáde aji, mɨa pɨ jɨ̃apari perã. Pɨa mɨde ijãapari perã, mɨa pɨmaa ne–inaa pia ooitꞌeeda aji.
2Mamĩda Abrampa pꞌanauji:
—Tachi Akꞌõre, mɨ Akꞌõre Waibɨa, ¿pɨa sãgá mɨ pia ooitꞌeema aji, mɨ warra wẽe bɨta? Mɨ netꞌaa atabëiitꞌeeda aji, Damascodepema Eliezer ome, mãgɨ́ mɨ mimiapari perã. 3Pɨa mɨmaa warra tee–e bairã, mɨ mimiaparipa mɨ netꞌaa jɨ̃aitꞌee.
4Mãpai Tachi Akꞌõrepa mãgaji:
—Pɨ mimiaparipa pɨ netꞌaa jɨ̃a–e paitꞌeeda aji. Pɨchi warrápata jɨ̃aitꞌeeda aji.
5Mãpai Tachi Akꞌõrepa Abram taawaa wãpiji mãikꞌaapa irumaa mãgaji:
—Pia akꞌɨpáde aji, pajã mãikꞌaapa pꞌoyaa juasiai pɨrã, lucero juasiapáde aji. Pɨdeepa uchiadaitꞌeerã jãgá cho–kꞌara paraaitꞌeeda aji.
6Abrampa ijãaji Tachi Akꞌõrepa jarada. Maperã Tachi Akꞌõrepa iru kꞌachia wẽe unupachi. 7Tachi Akꞌõrepa waya pedeeji:
—Mɨ pɨ Akꞌõre Waibɨa. Kꞌirãpapáde aji, mɨata pɨ caldeorã eujãdepema Ur pꞌuurudeepa uchia atada pɨmaa na eujã teeitꞌee.
8Abrampa iidiji:
—Mamĩda Tachi Akꞌõre, ¿sãgá mɨa kꞌawayama aji, na eujã mɨ–itꞌee?
9Tachi Akꞌõrepa mãgaji:
—Aneepáde aji, pꞌakꞌa aba, chivo aba mãikꞌaapa oveja aba, chi año õpee iru bee. Ichiaba aneepáde aji, tortola, paloma pichón ome.
10Abrampa ooji Tachi Akꞌõrepa jaradakꞌa. Ma ne–animalaarã aneeji Tachi Akꞌõremaa. Mãpai ma ne–animalaarã chaachaa peepꞌeda, tꞌooji mãikꞌaapa chi kꞌapꞌɨa tꞌooda kꞌĩraichaa bɨji. Mamĩda ma ipanaarã peepꞌeda, tꞌoo–e paji. 11Ãkosoorã ɨtꞌɨɨpa baai chejida ma ne–animalaarã kꞌapꞌɨa piuda kꞌodaitꞌee. Mamĩda Abrampa jërekꞌooji. 12Kꞌeu wãkꞌãri, Abram tapꞌokꞌeedachi. Mapa kꞌãidachi. Mãga nɨde pꞌeradachi, audú pꞌãriudaida perã.
13Mãga bɨde Tachi Akꞌõrepa mãgaji:
—Pɨdeepa uchiadaitꞌeerã pꞌanapataadaitꞌeeda aji, eujã awaraade mimiamaa chĩara–itꞌee. Mama esclavo pꞌanadaitꞌee mãikꞌaapa mãpemaarãpa ãra miapi iru pꞌanadaitꞌee cuatrocientos años. 14Mamĩda mɨa ichiaba miapiitꞌee ma eujãdepemaarã, ãchia pɨdeepa uchiadaitꞌeerã esclavo papidaitꞌee perã. Maapꞌeda pɨdeepa uchiadaitꞌeerã netꞌaa pi–ia ome awara ãi wãdaitꞌee. 15-16Taarã pakꞌãri, pɨdeepa uchiadaitꞌeerã uchiada kꞌĩmari uchiadapꞌeda, waya namaa chedaitꞌee. Mãgá taarãdaitꞌee mɨa amorreorã namãikꞌaapa waide jëre–e paitꞌee perã. Ãrapa ne–inaa audú kꞌachia oodakꞌãrita, mɨa ãra na eujãdeepa jërekꞌooitꞌee. Mamĩda pɨdeepa uchiadaitꞌeerã chedai naaweda, pɨ kꞌãiwee, chonaa piuitꞌeeda aji.
17Pꞌãrikꞌua pada perã, ma pꞌãriude kꞌuurukꞌa bɨ nãgɨ́ ome uchia chejida: okꞌokꞌĩra urua, nari jɨ̃rakꞌawaa mãikꞌaapa ĩpirã urua. Wãyaajida ma ne–animalaarã kꞌapꞌɨa piuda esajĩakꞌa.
18Ma ewate mãga unupikꞌãri, Tachi Akꞌõrepa Abram ome pacto ooji. Mãgaji:
—Na eujã teeitꞌeeda aji, pɨdeepa uchiadaitꞌeerãmaa; Egiptode to bɨmãiipa to waibɨa Éufrates parumaa. 19Pia jaraitꞌeera teeitꞌee pɨdeepa uchiadaitꞌeerãmaa nãgɨɨrã eujã: quenitaarã, quenizitaarã, cadmoneorã, 20hititaarã, ferezeorã, refaitaarã, 21amorreorã, cananeorã, gergeseorã, jebuseorã; mãgɨɨrã eujã.
Pašlaik izvēlēts:
Génesis 15: sjaB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2005, 2010, 2015 Wycliffe Bible Translators, Inc. All rights reserved.