San Mateo 2
2
Sek kãanijuwe'sx Jesusa's weçxaya' pa'jni
1Jesusa' Belen çxhabtek upx, Judea kiwete. Txãn ensu txãa kiwesu jxkaahsa' Herodesku yu'. Naapkaçxha' Jerusalen çxhabte maz piçthẽ'j pa'jtx sek kãani kiwejuwe'sx estrelxatx jiisa. 2Sa' na'jĩnatx pẽjx:
—¿Mtee ũsna judiuwe'sxtxi jxkaahwa'jsa ãçxh u'se upxsa? Kwe'sxa' txajx upxni's pta'sxsa estrelxa's uytha'w sek kãani kiweju, txãasatha'w weçxaya' yuwé'.
3Txã'jĩte', Herodesa' wala kuh yajkxku, txã'wẽy Jerusalen çxhabte nasawa jxukaysa. 4Txajũ' jxkaahsa' sacerdote npiiçthẽ'jwe'sx vxite' ley kaapiya'jsawe'sx jxukaysatx pa'yaçxa' paapẽjxku:
—Kristo' ¿mteega upxwa'jsa yu'? jĩte', pta'sxtxi:
5—Judea kiwete Belen çxhabtek upxwa'jsa yu'. Txajíik Dxus yuwe pta'sxsa' na'jĩna fxi'j:
6Judá kiwete Belen çxhab txã'wẽ maa çxhabtewa jxthaakwe ãhmeekwesame'.
Txãa pa'gatey Belen çxhabuh teeçx npiiçthẽ'jsa kasehçxa Adx nasa Israelwe'sxtxi jxpe'jwa'jsa' jĩ'k.
7Txã'jĩte', Herodesa' estrelxa's uysaatx paaçte pa'yaçxa pẽjxku:
—¿Makwe txaçx yuuçna estrelxa vxyaani? jĩna wala ew paapẽjxçxak 8Belenna kaah na'jĩna neewe'weçxa:
—Kxte me'jwe, sa' wala ew paapẽyine'kwe txãa luuçx ma'wẽsatewa. Sa' ew jiyuçxa', adxa's pta'sxine'kwe, aça' adxwa weçxaya' u'jwe'nja jĩte', 9estrelxa's uysaawe'sxa' u'jtx. Naapkaçxha' sek kãani kiweju estrelxa uyne'ta txãa estrelxa' txãawe'sx yaçte vxyaana u'jçxa mteene' luuçx ũsu' txãa kajkwete pa'jçxak kxtee yuju. 10Txã'wẽ estrelxa ki' vxyaate', wala weçxatx, 11sa' yatte u'kaçxa luuçxa's uytxi njĩ'j yakh. Sa' peejxũkweçxa' luuçxa's weçxatx. Txã'wẽ yũuçxatx txãawe'sx peeswa'j jxũçxa u'jni's phaadeçxa pees: vxyuu beh, incienso vxite' miçxa. 12Txã'wẽ yũuniijũ' kus ksxa'wte pta'sxnitx yuu Herodes tasxna ki' sxawedkahmén. Aça' vxite dxi'jsutx sxawedna u'j.
Egipto kiwen ũphna u'jni
13Estrelxa's uysaawe'sx u'jnijũ', José ksxa'wte', Dxus angel vxyaaçxa na'jĩk:
—Kiiteçxa me'j ũphna Egipto kiwen luuçxkuẽ's pe'jçxa petx njĩ'j yã'jçxa. Sa' kxtee ũsune'ga adx ki' pta'sxpkaçx. Txã'wẽme', Herodesa' luuçxkuẽ's ikhya' pakweya'wa' jĩte', 14Jose' kusçxáa pe'jna Egipto kiwen u'kh. 15Sa' kxteetx ũsu' Herodes uupkaçx. Dxus yuwe pta'sxsa we'weçxa': Egiptoju pa'yath Adx Nçxi'ka's jĩk txãa kxtey yuukahnçxáak txã'wẽ yũu.
16Estrelxa's uysaawe'sx txã'wẽ Herodesa's weeçxsa na'wẽ vxite dxi'jsu u'jni's jiyuçxa', seena' wala ũusaçxak. Sa' luuçxtxi kiikhe'kh Belen çxhabtewe'sx vxite' peeku'jsuwe'sx yã'jçxa jxuka, luuçx e'z anxu ji'phsate kãhpkaçx. Estrelxa's uysaawe'sxa' makwe txaçx yã'j yuuçtewa pta'sxne'ta txã'sna jiyuçxak txã'wẽ e'z anxu ji'phsate kãhpkaçx kiikhe'jna ũsu' Herodesa'. 17Dxus yuwe pta'sxsa Jeremias na'jĩna fxi'jni kxtey yuuk:
18Teeçx ahte Ramá yaasesate pthũusek
Seena' pebeena nxus we'weni.
Txã' Rakelku txã'wẽ ũ'ne' txajx luuçx pa'gate,
Sa' kisxi'çme', txã'wẽtx ikhni yuu naa pa'ga jĩ'k.
19Egipto kiwete ũsçxa José ksxa'wte', Dxus angel vxyaaçxa na'jĩk Herodes uuniijũ':
20—Ãçxha' luuçxa's ikh wẽesawa uuyã'jtx, aça' pe'jçxa sxawedna me'j Israel kiweníi jĩte', 21Jose' sxawedna u'kh Israel kiwen luuçx petx njĩ'j yã'jçxa. 22Nawa Herodes pa'gate nçxi'k Arkelao Judeate jxkaahna ũste jiyuçxa', ũukhku kxtee pa'jya' yu'. Sa' ksxa'wte' pta'sxnik yuu, txãasak Galilea kiwen u'j. 23Kxtee pa'jçxa', teeçx çxhab Nasaret yaasesatek u'p-ya' u'j. Nyafxiitey Dxus yuwe pta'sxsawe'sx we'weçxa', Jesusa' Nasareno ya'kxsusuna jĩ'tx txã'jĩni kxtey yuukahnçxáak txã'wẽ yũu.
Pašlaik izvēlēts:
San Mateo 2: pbbNNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1984, Wycliffe Bible Translators, Inc. All rights reserved.