Mata 10
10
Yéésù sààvúŋ gbantumsə̀ bəd kób zè iira
(Markus 3.13-19; Luka 6.12-16)
1Yéésù dɛ̀rà nɛ́b sáànmbə̀ bəd kób zè iira, bít pii bə̀ kpɛŋsɛ́l bɔ̀b nwul vaksə́ bəd bə̀ niŋ̀vúŋ̀á, kə̀ nɛ́b bəd si' gáŋ̀mbə̀ marú, bít kə̀ nɛ́b aa mad yɛ̀l bə̀ si' rə gáŋ̀mbìá. 2Aa yée Yéésù gbantumsə̀ bəraa kób zè iirə rə, nə́gə́lá' Sɔ̀d tə́ kə̀ Simon, nɛ́ŋə̀ aa bə̀ dɛ̀rə̀ Piyɛr roó, kə̀ ɔ̀dkudvɛɛ̀l oò Andre tá; Yakuba, Zebede wàà váàndoá, kə̀ kudvɛɛ̀l oò Yohana tá; 3Filip kə̀ Bartelemi tá; Tomas, kə̀ Mata, nɛ́d ba'káám bə̀ ke'ǹ tá; Yakuba, Alfa kə̀ Tade tá, wàà váàndo boò ra; 4Simon màn aa nə́' kè' yɛ́b oò roó, kə̀ Yudas Iskariyot, màn aa ɛ̀m dáá lɛ́b Yéésù boò naà roó.
Yéésù tùm gbantumsə̀ oò bəraa kób zè iirə roó
(Markus 6.7-13; Luka 9.1-6)
5-6Yéésù tùm nɛ́b aa kób zè iirə yée, kə̀ nwɔŋ aa yóo: «Éèn ìì ɛ̀m nɛ́b Israila bə̀ bəd sunú. Kàandə, boò rə, ìì tə́ kìínmbə̀ bɛ̀rə̀ bɔ̀bke bəd kíin. Ìì dáá nɛ́b aa bə̀ bàg Vɛnɛ́b síndə səǹ sí, bít ìì dáá bìl bəraa Samariya yɛ́b bərə rú sí kɔ̀. 7Íí tə́ ɛɛ̀m kpaŋə́ gə́, ìì bàà Vɛnɛ́b nwɔŋá; ìì bàà: ‹Sɛŋ aa Vɛnɛ́b yaà dá gààd ləə̀n bə nɛ́b oò bəd yílə́ rə, gbad yaà tə́ kíìn wə́ə́nàá.› 8Bít ìì bàà bə̀ boò gáŋ nɛ́b bəd si' marú, boò díím nɛ́b bəd valú, boò nyɛ́' nɛ́b bəd gərá, bít nìŋ boò vúŋ nwul vaksə́ bəd nɛ́b bəd sisú. Vɛnɛ́b pii bà tɛdńní, bít boò kɔ̀, boò pii nɛ́b bəd tɛdńní. 9Ìì ɛ̀m nɛɛ̀n tɛdńní, ìì kò' bəŋ sɔsá, sínkɔ̀ basá, sínkɔ̀ bayáàm nə́ŋ̀má naà sí. 10Ìì pà' nə́əd sɛ̀ɛ́n kpaŋ̀ bə̀ naà sí, sínkɔ̀ gɔ̀' páànmbə̀ iirə sí, ìì pà' tábá, sínkɔ̀ gbà' sí. Kàandə, nɛ́d tù' bə̀ ma'ǹ də́ŋì inlíìnmbə̀ oò bɔbm̀bìá.
11«Ɛ̀m dá íí wə́ə́ì bìl gbà'á rú, sínkɔ̀ bìl bɛ̀ŋ́sə̀wà rú gə́, ìì sàà nɛ́ŋə̀ aa dá ii báàn ke'ǹmbə̀ roó. Ìì kùm nɛ́ŋə̀ aarə kàrú, sɛŋ aí bə̀ zá'ǹ ɛɛ̀mbə̀ oò wə́ə́ zé. 12Màìgə́, íí tə́ piìn yiìl gə́, ìì dɔ̀m ligə̀ rə sína, ìì bàà: ‹Vɛnɛ́b tɛbə̀ oò kùm kə̀ aí tá.› 13Nɛ́b aa yiìl wərə̀ rə bə̀ kè'iyì gə́, pɔ̀bsə́ tɛbə̀ bə̀ aa íí dɔ̀m bə̀ kə̀ kùrú rə, oò kùm ligə̀ rə yílú. Zá nɛ́b aa yiìl wərə̀ rə ìì kè' ii síngə́, pɔ̀bsə́ tɛbə̀ bə̀ íí rə, oò bírà aí naà ní. 14Màìgə́, bə̀ məəiyì ke'ǹmbìá, bít bə̀ zɛ̀ŋi nwɔŋ síngə́, ìì vúg kíìn ligə̀ aarə rú, sínkɔ̀ bìl aarə rú. Bít ìì dì' yɛ́b məsə́g aa bag aí dun bərə kúnú. 15Mə́ tə́ ii kíìn baanàá, aarə nwɔŋ sɔ̀ɔ̀ná, nyàm aa Vɛnɛ́b dá nɛ́b bəd fágǹ bərə, nɛ́b aa Sodoma bìlə́ rə, kə̀ nɛ́b aa Gomora bìlə́ rə tá, fágə́n boò dá kuùm bɛ̀ŋ́sə̀wàá. Zá bìl bəraa rə, fágə́n boò nwuu dá sə̀n Sodoma kə̀ Gomora bə̀ tá kanàá.»
Búúd bəraa dáà yaànà roó
(Markus 13.9-13; Luka 21.12-17)
16«Ìì ɛ̀ga! Mə́ tùmi tə́ kìínmbə̀ bɛ̀rə̀ bəd kíin, gbàál lɛ̀gsɛ́rə̀ bəd tə́ŋú. Kə̀ taàbìá, ìì gú' dáàn kuùmbə̀ kìínmbə̀ bi' bəd kíni. Bít ìì mà' invaksə́ nə́ŋ̀má sí, kìínmbə̀ mìrə̀ gə́blə̀ kíin. 17Ìì gú' yíl íí kə̀ nɛ́b bərá. Kàandə, kò' bə̀ dá ii aàn nɛ́b gbàád bəd númú, bə̀ dá ii kíìn fágàá, bít bə̀ dá ii kíìn zibàá, Yahudu bəd wúlwáàlbə̀ bərú. 18Máá bòórú, kò' bə̀ dá ii taà aàn gɔ̀mnà bəd númú, kə̀ gààd gbàád bəd númú. Aarə dá i'ǹ gə́, íí sedako mə́ bərá, boò númú, bít kə̀ nɛ́b aa bə̀ bàg Vɛnɛ́b síndə númú. 19Zá màìgə́ bə̀ luuiyì kàangə́, ìì lɔ̀b tɛ́m kə̀ nɛɛ̀n aa íí dá nwɔŋ gáàm dú rə sí. Kàandə, nwɔŋ aa íí dá baàn də, Vɛnɛ́b dá ii sə̀n piìn sɛŋ də bəní. 20Kə̀ aakíin də, aíra íí dá sə̀ní nwɔŋ də gáàm kə̀ yíl aí bə̀ gá, zá Báá íí nwul yaà dá sə̀n nwɔŋ gáàm kə̀ gú' aí bìá.
21«Nɛ́b bəd dá kudvɛɛ̀l boò bəd kə̀ níí boò bəd tá luùn, bɔ̀b kòd boò lòd bə̀ kúnú. Bít wàà bóò dá wàà oò ma'ǹ kə̀ aarə kíin, bɔ̀b boò lò'ù kúnú. Yɛb bəd dá nə́gə̀d zá'ǹ kə̀ báá boò bərá, bít kə̀ nà' boò bərá, bɔbm̀ lodǹmbə̀ boò bìá. 22Nɛ́b bəd kóólé, bə̀ dá ii kíìn zeenàá, máá nə́gə́lú. Zá màn aa sìd kùmì tɛ́mbagké rú rə, sɛŋ bɛ́dke bə gə́, dákíìn súúnàá. 23Màìgə́, bə̀ í' ii búúd tə́ bìl nə́ŋ̀ú gə́, nùù ìì ɛ̀m bìl nə́ŋ̀ gɔ̀ŋú. Mə́ tə́ ii kíìn baanàá, nwɔŋ sɔ̀ɔ̀ná, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, kid dáà sína bíràá, nùù gád íí dá bìl bəraa Israila yɛ́b bərə bɛ́'ǹ gə́ roó.
24«Nɛ́d sánán nə́ŋ̀má kàn nɛ̀n oò gá; nɛ́d tù' bə̀ ma'ǹ nə́ŋ̀má kàŋ kàn báá oò tììkpɛ̀ŋ gá. 25Taà nɛɛ̀nì gə́, wàà sánán oò kùm kìínmbə̀ nɛ̀n oò kíin. Bít nɛ́d tù' bə̀ ma'ǹ kɔ̀, oò kùm kìínmbə̀ báá oò tììkpɛ̀ŋ kíin. Dáà bə̀ dɛ̀d nɛ́d ligə̀ bə̀ì Belzebul (taà kùmsə̀n baànmbə̀ nwul vaksə́ bəd gààrá) gə́, nɛ́b aa yiìl lə gə́, bə̀ dá bə̀ nə́gə́l aa yɛɛ̀l taà nɛɛ̀n də páánàá!»
Màn aa nɛ́ŋə̀ oò nùù roó
(Luka 12.2-7)
26«Kə̀ aakíin də, ìì nùù nɛ́b bəraa rə sí. In aa mə́ bàà ii bə́ŋyée rə, kpàm ìì bàà nɛ́b zùúm númú. Bít in aa tə́ mə́'ke rə gə́ kóólé, ìì mà' bɔ̀b nɛ́b bəd boò gàb kúnú. 27Nwɔŋ aa mə́' mə́ bàà ii tə́ tígə́lə́ rə, ɛ̀m dá ìì bàà nyàámbərə̀ú, zɔ̀ŋ nyɛdkè ba. Bít nwɔŋ aa bɔ̀n bə̀ bàà ii kə̀ laàmú, túŋ wàà rú rə, na' kpàm ìì bàà gbàg ba. 28Ìì nùù nɛ́b yíl bə̀ lodǹ bəraa màìgə́ bə̀ lò' nɛ́ŋə̀ sisá, bít nɛ́ŋə̀ nyì' gə́, bə̀ bán lo'ǹmbə̀ gá rə sí. Zá aa dá sɔɔ̀n də gə́, ìì nùù Vɛnɛ́bá, màn aa bán nyì' lo'ǹmbə̀ kə̀ si' tá, bít pà' dáráàn lɛ́'ǹ laa aa fə́' bə gá rə rú roó. 29Bə̀ gə́l saasa yɛb iira, kóbò nə́ŋ̀ bə̀ géè? Núú bəraa rə kóólé, nə́ŋ̀ vàrì gə́, Báá Vɛnɛ́b pii sə̀n kpaŋ̀á. 30Yíl gí' bəraa aí yíləsə́ rə máá, Vɛnɛ́b gád tə́ kíìn kóólé. 31Kàandə, ìì nùù də́dǹ nɛɛ̀n aa nɛ́b bəd dá ii ma'ǹ dú rə sí. Íí kànsə̀n saasa yɛb kə̀ pɛ̀sá!»
Ke'ǹmbìá, kə̀ məə̀n daànmbə̀ Yéésù Krístù nɛ́b bəd númú
(Luka 12.8-9)
32«Dáà nɛ́ŋə̀ nə́ŋ̀ bààì nyɛdkè dág nɛ́b bəd númú, bəǹ bàg mə́ì gə́, máá kɔ̀ má baàn Báá mə́ aa lɛgə́ paà rə númú nyɛdkè dág, oò nɛ́ŋə̀ mə́ra. 33Zá kóó nɛ́ɛ̀réè, dììyì nɛ́b kambəd númú, bít bààì nyɛdkè dág bəǹ bàg mə́ síngə́, máá kɔ̀ má baàn Báá mə́ aa lɛgə́ paà rə númú nyɛdkè dág, oò nɛ́ŋə̀ mə́ gá.»
Mə́ àà tɛbə̀ gá, zá mə́ àà nə́gə̀rá
(Luka 12.51-53; 14.26-27)
34«Ìì gú' seèl baànmbə̀ aí tɛ́mú, mə́ yaà tɛbə̀ aànmbə̀ zɔ̀ŋə yɛ́b ba. Mə́ yaà tɛbə̀ aànmbə̀ gá, zá mə́ àà nə́gə̀rá. 35Kə̀ aakíin də, mə́ àà nə́gə̀d, bɔbm̀ pɛdǹmbə̀ wàà kə̀ báá, bít wàà kéèndo pɛdǹmbə̀ kə̀ nà'á oòra, wàà kéèn kə̀ gúùn kéèn oòra. 36Kóó nɛ́ɛ̀réè, nɛ́b oò yiìl bə̀ bəd bə̀ dá ɔ̀dmáàn oò bəd bílàá.
37«Màn aa í' taà nɛɛ̀n tə́ báá oòra, sínkɔ̀ nà'á oòra, kə̀ máá rə, də́ŋ kuùmbə̀ wàà mə́ sé. Bít màn aa í' taà nɛɛ̀n tə́ wàà váàndo oòra, sínkɔ̀ wàà kéèndo oòra, kə̀ máá rə, də́ŋ kuùmbə̀ wàà mə́ sé. 38Màn aa pà' téélɛŋké oò, bít bàg mə́ síndə, də́ŋ kuùmbə̀ nɛ́d bagké mə́ sé. 39Màn aa bàà bəǹ dá gɔ̀ŋsə́ bəǹ súùn də, dáù kíin bɔ̀'ǹ Vɛnɛ́b númú; bít màn aa oò gə́ kè'ì bəǹ dá gɔ̀ŋsə́ bəǹ bɔ̀'ǹ máá bòórú rə gə́, dá gɔ̀ŋsə́ aa bɛ́d bə gá rə bɔbàá.»
Vɛnɛ́b dá sə̀n nɛ́b aa bə̀ tə́ nɛ́b tù' bə̀ ma'ǹ oò bəd ke'ǹ də, mú'sɛ̀l dùm boò káánàá
(Markus 9.41)
40«Màn aa kè'iyì rə, kè' máára, bít màn aa kè' mə́ì rə, kè' màn aa tùm máà roó. 41Màn aa kè' Vɛnɛ́b gbantumsə̀ì kìínmbə̀ Vɛnɛ́b gbantumsə̀ kíin də, Vɛnɛ́b dáù mú'sɛ̀l dùm oò káàn kìínmbə̀ Vɛnɛ́b gbantumsə̀ kíin. Bít màn aa kè' nɛ́ŋə̀ wɔ̀ɔ̀lə̀ì kìínmbə̀ nɛ́ŋə̀ wɔ̀ɔ̀lə̀ kíin də, Vɛnɛ́b dáù mú'sɛ̀l dùm oò káàn kìínmbə̀ nɛɛ̀n aa nɛ́ŋə̀ wɔ̀ɔ̀lə̀ mú'sɛ̀l dùm kùm dú rə kíni. 42Mə́ tə́ ii kíìn baanàá, aarə nwɔŋ sɔ̀ɔ̀ná, kóó nɛ́ɛ̀réè, kɔ̀b pii wàà bɛ̀ŋ́sə̀wà wəl tɛbkèì magə̀ wàà nə́ŋ̀ní, nɛ́b sáànmbə̀ mə́ bəraa yée tə́ŋú, nɛɛ̀n aa kùm nɛ́d sánán mə́ rə bòórú gə́, dá mú'sɛ̀l dùm oò kíìn bɔbàá.»
Pašlaik izvēlēts:
Mata 10: SLNT98
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Nouveau Testament en Samba Leko © Alliance Biblique du Cameroun, 1998.