Mateo 21
21
Sa Pagdiyà Hi Jesus Ta Jerusalem
(Mateo 21:1-11; Marcos 11:1-11; Lucas 19:28-40; Juan 12:12-19)
1Nakauma si Jesus daw sa mga tinun-an din diyà ta Betpage diyà ta Buntud ta Ulibu saena ubay en diyà ta Jerusalem. Sinugù hi Jesus sa daruwa din ha tinun-an 2ha tagyanaen, “Umuna kaw en diyà tayà ha banuwa. Ku makauma kaw diyà maahà nuy sa intagkes ha asnu daw amin din nati. Hukada nuy haena daw tuyuka dini ta kanak. 3Ku amin manginginsà inyu, ‘Imbà nuy hayana agtimua?’ ikagiya nuy, ‘Agkinahanglanen haini hu Ginuu’ dayun sagunà din haena itugut inyu.”
4Nahitabù haena ta daw matuman sa lalang hu Dios pinaagi hu prupita ha tagyanaen,
5“Tultuli nuy sa mga taga-Jerusalem, ‘Sa Harì nuy pakauma en, saena maluluy-en daw taglulan duun hu nati hu asnu.’”
6Huminipanaw haena sa mga tinun-an hi Jesus daw buhata su insugù kandan. 7Tinuyuk dan su asnu daw sa nati din daw binalhenan dan haena hu mga bisti dan dayun luminulan si Jesus duun. 8Madakel ha mga etaw sa migbuklad hu mga bisti dan daw mga palwa duun ku dalan ha ag-agiyan hi Jesus. 9Sa madakel ha mga etaw ha nakalibut diyà ki Jesus nangulahì ha tagyanaen,
“Dayeen gayed sa Kaliwat hi David. Panalanginan haini sa nakauma ha sinugù hu Dios. Dayeen gayed sa Dios ha diyà ta langit.”
10Su makauma en si Jesus diyà ta Jerusalem nabibu sa kaet-etawan daw migpainsaay sidan, “Sin-u man hayana?”
11Tuminubag haena sa namanduma ki Jesus, “Iyan en haini si Jesus ha prupita ha diyà napuun ta Nazareth ha sakup ta Galilea.”
Sa Pagseled Hi Jesus Ta Timplu
(Mateo 21:12-17; Marcos 11:15-19; Lucas 19:45-48; Juan 2:13-22)
12Sumineled si Jesus diyà ta Timplu daw pan-abuga sa mga tagbabaligyà daw sa tagpamalit duun. Pinamantang din sa mga lamisahan taena ha tagpamaylu hu salapì daw sa mga pinun-ayà hu tagbabaligyà hu mga salapati 13daw ikagiyi sidan, “Nakasulat en sa lalang hu Dios ha tagyanaen, ‘Sa Timplu ku iyan alampuanan.’ Ba saini binuhat nuy ha kampu hu mga tulisan.”
14Duun taena ha Timplu namandiyà ki Jesus sa mga buta daw sa mga pigket aman nangaulian din sidan. 15Ba sa mga labaw ha sinaligan hu paghalad daw sa mga manunudlù hu Kasuguan su maahà dan sa belenganen ha binuhat hi Jesus daw su mapaliman dan sa mga batà duun hu Timplu ha tagkulahiay, “Dayeen sa Kaliwat hi David” nangapauk-pauk gayed sidan.
16Ininsaan dan si Jesus, “Agkapaliman nu ba haena sa tag-ikagiyen dan?”
Tuminubag si Jesus, “Agkapaliman ku man. Hurà nuy ba diay kabasa haena sa lalang hu Dios ha tagyanaen,
‘Intudlù hu Dios sa hustu ha pagdayè kandin duun hu mga batà.’”
17Dayun inawaan sidan hi Jesus diyà ta Jerusalem daw diyà dà tuminiduga ta Betania.
Sa Pagkagangu Hu Kayu Ha Igira
(Mateo 21:18-22; Marcos 11:12-14, 20-24)
18Su maselem pa tungkay luminikù dà si Jesus diyà ta Jerusalem. Su diyà pa ta dalan agkauhul gayed. 19Naahà din sa kayu ha igira aman duminuun taena ba hurà din naahà ha bunga. Dayun inikagiyan hi Jesus su kayu, “Harì kad en gayed mamunga.” Saena sagunà nagangu.
20Su maahà haena hu mga tinun-an hi Jesus tungkay gayed sidan nangabeleng aman minikagi sidan, “Imbà gid sagunà dà kagangu su kayu?”
21Tuminubag si Jesus, “Laus gayed sa ag-ikagiyen ku inyu ha ku amin nuy pagsalig duun hu Dios daw harì kaw gayed magduwa-duwa mabaluy nuy gayed daan haini sa binuhat ku duun taini ha kayu ha igira. Daw kenà haini iyan dà ta bisan pa ku ikagiyan nuy hayana sa bubungan, ‘Agbul ka diyà ta dagat’ saena matuman gayed. 22Ku sumalig kaw hu Dios madawat nuy sa bisan inu ha agpanayuen nuy pinaagi hu pag-ampù.”
Sa Katenged Hi Jesus
(Mateo 21:23-27; Marcos 11:27-33; Lucas 20:1-8)
23Sumineled si Jesus diyà ta Timplu daw su tagpanudlù en duminiyà ta kandin sa mga labaw ha sinaligan hu paghalad daw sa mga magulang. Ininsaan dan haena, “Inu sa katenged nu daw sin-u sa mig-ila ikaw hu kagahem hu pagbuhat taena?”
24Ba tinubag sidan hi Jesus, “Ag-insaan ku daan inyu. Ku matubag nuy haini ikagiyen ku inyu sa katenged ku hu pagbuhat taena. 25Sin-u man sa mig-ila ki Juan Ha Tagpamautismu hu kagahem hu pagbautismu? Iyan ba sa Dios daw ku etaw dà ba?”
Miglalang-lalang sidan, “Ku kagi taw iman ha iyan sa Dios insaan kuy kandin ku imbà hurà taw tuuwi si Juan. 26Ba ku ikagiyen taw daan ha etaw dà mapaukan kuy hu mga etaw ha tuminuu gayed ha prupita si Juan.” 27Aman iyan dà tubag dan diyà ki Jesus sa, “Hanaw ta.”
Inikagiyan sidan hi Jesus, “Ku iyan hayana harì ku daan ikagiyen inyu ku sin-u sa mig-ila kanak hu kagahem hu pagbuhat taena.
Sa Daruwa Ha Sinugù
28“Inu man sa kahenhenaa nuy taini? Amin etaw ha daruwa sa batà din ha maama. Inikagiyan din su magulang, ‘Magtrabahu ka iman diyà ta uma.’
29“Ba bà dà haena tuminubag sa batà, ‘Harì a agkabayà.’ Ba su malugay-lugay nahalin dà sa henà-henà din aman duminiyà dà ta uma.
30“Dayun si Amay din duminuun daan ku sabuwa ha batà din daw sugua haena diyà ta uma. Minikagi haena, ‘Hee, dumiyà a’ ba hurà haena diyà ta uma.
31“Sin-u man duun taena ha mga batà sa nakatuman hu insugù hu amay dan?”
Tuminubag sidan, “Iyan haena sa magulang.”
Inikagiyan sidan hi Jesus, “Laus gayed sa ag-ikagiyen ku inyu ha saena ha limbungan ha manunukut hu buhis daw su madaet ha mga bahi iyan mangauna dì inyu ha pagharian hu Dios. 32Ta nakadini si Juan Ha Tagpamautismu hu pagpaahà inyu hu paagi ha mabuhat kaw ha matareng ba hurà nuy tuuwi. Ba saena ha mga limbungan daw sa madaet ha mga bahi tuminuu kandin. Bisan su maahà nuy en ha namanuu sidan ba hurà kaw gihapun tuu daw hurà kaw daan maghinulsul hu mga salà nuy.
Sa Sanglitanan Mahitenged Hu Mga Tag-alima Hu Parasan
(Mateo 21:33-46; Marcos 12:1-12; Lucas 20:9-19)
33“Palilimani nuy haini sa sanglitanan. Amin etaw ha amin din uma ha pinamulahan hu paras. Linibut din haena hu alad daw migbangbang hu pangemesà hu mga bunga din daw miglawig daan hu timaay taena ha mga tag-alima duun. Dayun pinaalimahan din haena daw pahiphipanaw duun hu madiyù ha banuwa. 34Su bungahan en su paras sinugù din sa mga suluguen din duun ku mga sinaligan din ha tag-alima hu parasan ta daw matimù taena sa kandin ha bahin. 35Ba su mga sinugù din bà dà pinan-ibiti ku mga sinaligan, sa sabuwa binunalan dan, sa sabuwa hinimatayan dan daw sa sabuwa binatu dan hangtud ha matay. 36Dayun impalupug ku tag-iya ku uma sa madakel pa ha suluguen dì su nauna ba iyan gihapun haena binuhat kandan.
37“Sa katapusan iyan din en paman sinugù su batà din ta sa henà-henà din, ‘Tahuran dan gayed haini tumenged ta batà ku.’
38“Ba su maahà haena ku mga sinaligan miglalang-lalang sidan, ‘Iyan en haini batà hu tag-iya. Himatayan taw ta daw maangken taw en haini sa parasan.’ 39Aman inuwit dan diyà ta guwà taena ha parasan daw himatayi.
40“Ku makauma sa tag-iya taena ha parasan inu man sa buhaten din duun ku mga sinaligan din?”
41Tuminubag sidan, “Panhimatayan din gayed sidan dayun su parasan paalimahan din hu lain ha iyan mag-ila kandin hu bahin hu bunga taena.”
42Inikagiyan sidan hi Jesus, “Hurà nuy ba kabasa sa lalang hu Dios ha tagyanaen,
‘Sa batu ha bà dà inlambeg ta abi hu mga tagbalay ha hurà din pulus iyan man diay mahinengdanen ta iyan pakapalig-en hu balay. Belenganen gayed haena ta iyan sa Dios migbuhat duun.’
43“Aman ikagiyen ku inyu ha kenà kaw iyan pagharian hu Dios ta iyan dà sa mga etaw ha tagtuman hu agkabayaan din. 44Saena ha makadaghà duun taini ha batu magebà gayed, daw saena daan ha mahulugan taini ha batu mabekbek gayed.”
45Su mapaliman hu mga Parisiyu daw hu mga labaw ha mga sinaligan hu paghalad haena sa mga sanglitanan hi Jesus natun-an dan ha iyan en sidan tagsubayen din. 46Aman nan-ahà sidan hu paagi ha madakep dan si Jesus, ba nahaldek sidan hu mga etaw ta si Jesus nakilala dan en ha prupita.
Pašlaik izvēlēts:
Mateo 21: bkd
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2015, Wycliffe Bible Translators, Inc. All rights reserved.