KECHENG 6
6
Monit Akhei A-ot-kelangno
1Pirthe athak monit atum kechan pangcheng-lo, lapen latum aphan asopimar atum mahang pathekpilo,#Job 1.6; 2.1 2Keklotang Arnam asopomar#sining api mate arnam asomar atum mate Arnam asomar atum atum monit asopimar atum arje langmesen thek-long-lo; lapen latum aphan chongvaisi latum halatum pen che-en chedolo. 3Anke Hemphu pulo, “Ne Karjong monit along kaike dovervelo, athema la ok chot, la apotsi la achethe ningkan 120 an parengchotpo.” 4Halaso ahut Nephilim#6.4: Keklotang sining apherangke atum pirthe athak dolo, latum monit asopimar atum pen pen chopatherap asolo. Lahei atum hako ahut ingtangrak lapen anong chethanghu amonit atumlo.#Kela 13.33
5Pirthe athak monit akun langnopik-lo, Arnam la thek-long-lo, lapen latum aning kematha asontin ta kehingno saide.#Mat 24.37; Luk 17.26; 1 Pit 3.20 6Lapen pirthe athak Hemphu monit kepinchong apot Alangli ning che-oilo, lapen la Alangliphan aning paduk-lo. 7La apotsi Hemphu pulo, “Ne kepinchong amonit aphan pirthe athak pen Ne pavirdetpo, monit, lapen pi lapen keklim api lapen kangjar avo-heihei aphan, pima latum aphan Ne kepinchong apot Nening che-oilo.” 8Bonta Hemphu angno Noah abang kangjinso long-lo.
Noah
9Noah a-ove-heihei lahei helo. Noah inut dhoromi amonit, a-ove ahut alangliphan kejong adim ave; Noah, Arnam pen-pen kengkam chejorrap-rap-lo.#2 Pit 2.5 10Lapen Noah asopomar bangkethom do, Shem, Ham lapen Japheth. 11Non Arnam angno pirthe chehotang-lo lapen pirthe kephalangno si plengthup-lo. 12Lapen Arnam pirthe langsi thek-long-lo, la chehopik-lo; athema ok kedo-an halatum atovar pirthe athak ahokpetpe det-lo. 13Lapen Noah aphan Arnam pulo, “Ne kadokave ok an pavir-etpo pusi mathathip-lo; athema latum pen ajok pirthe kephangno plengset-lo, langtha, pirthe pen Ne latum aphan pavirdetpo. 14Thengjangthu pu akapat pen telong ehum kimnon, lapen telong ingdenghini binon, lapen la athak alkatra vitnon. 15Lasonle nang telong selamnon: Telongkeding ingrup 300, la arpan ingrup 50, lapen kangtui ingrup 30. 16Telong asarnung#mate inghapso selamnon lapen la ingrup isi pangtuira patangnon; lapen la akung anat inghap selamnon, la abersi athengsong anghap selamnon. 17Athema langtha, pirthe athak sining aber achethe-kerengphun api an kepavirjisi lang-heihei alangthepi Ne nangtoipo; pirthe athak kedo-an amar thipo. 18Bonta nang pen Ne kechejok aloh pathikpo, lapen nangtum telong arlo vangpo, nang, lapen nangsomar atum, nangpiso lapen nangmunpi atum. 19Lapen ok kedo-an kereng-et asontin amar, nang echor-echor ajattin telong arlo vanpo, latum nang pen pen kerengrappetji aphan; lahei api lapen alo donangpo. 20Vo ta ajattin, marat api ajattin, longle athak keklim api ajattin, ta nanglong arlo nang arludunpo, halatum kereng-longji aphan lo. 21Kechome ahormu ajat an, lapen la pangrumra binon; lapen la nangtum aphan an plangpo, lapen halatum aphanta lo.” 22La Noah klemlo; la aphan Arnam hukum kepi ason an klempi-et-lo.#Ibr 11.7
Šiuo metu pasirinkta:
KECHENG 6: KARBIBSI
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Karbi Holy Bible © Bible Society of India, 2010.
Used by permission. All rights reserved worldwide.