Tavaꞌu 15
15
Lataua Musakiinu Vaikala sou Opo Vilesisi Noxou Avalamu
1Xe ili'i la sou IAUE muxali noxou Avalamu no anu loxo aipiepiena, la mulomusou IAUE muvikalanu aloxo 'o, “Avalamu, na'ume mamu, xo eni xaliausine sou asaxila'ine no anu tu'utu'umaxu ane lexe uxali noxine, mo nini naxali itema tila manina.” 2Ioxe, Avalamu muavuti la mukolinu aloxo 'o, “IAUE Lataua noxilo, mii ma'ia ane nini nalosilo loxo alu e nelosilo no anu. Eni ulai la asoli io, apalaa 'alixe vile sou eni ualasilo ulai ili'i la ilemolemo ua. Eliaselu sie Temasukasi ane anu sou ulai xe eni asoli, la anu ualasou utelo no anu mimii noxilo. 3Nini naxalixa'a ta 'ali'alixeni mo ta xasixasilo uasi, mo 'alixe vile eni apalaanu sou lexe eni asoli la anu ualasou utelo no anu mimii noxilo uasi.”
4IAUE mukolinu Avalamu la muvikalanu aloxo 'o, “Eliaselu e uxoxoolu noxine sou napalupalusou ne, ulai ili'i la anu ualasou utelo no anu mimii noxine uasi, 'iline vile manina ualasou utelo no anu.” 5#Rom 4:18; Eva 11:12Xe ili'i la sou IAUE muno'u anu Avalamu ne sou mulailixu no ale sou muvikalanu aloxo 'o, “Ieni utelai no loxotolo mo natovo lexe naitisi'a ta oto 'o ukalusi, xo ulai ili'i la ta 'iline mo ta xasixasine mo ta 'ilusulusuneni ixali tavu'alo aloxo ne.”
6 # Rom 4:3; Xal 3:6; Iak 2:23 Avalamu mumuxamuxaxu tanu noxou IAUE, la IAUE mumoxo'u lexe anu itema mulapu. 7La sou IAUE muvikalanu aloxo 'o, “Eni IAUE ane elaalixene ne Ulu no xalee lia ne Vaviloni mo elosine lia ano 'o lexe na'a nini.” 8Xe Avalamu muavuti la mutali'isou Lataua aloxo 'o, “Lataua IAUE noxilo, eni alavu a loxovaa lexe lia ano 'o ulai la eni na'a xeni?” 9Anu mukolinu aloxo 'o, “Nano'e kau sema vile mo mee sema vile mo sipsip mulu vile tauu iexa'a tatalusi. Nano'a ine'e noxilo. Nano'u utu vile mo kuau vile kalumo.”
10Avalamu muavuti la muno'a ta mimii ane ne milai noxou IAUE, ka anu molu muxotone'i tamomone'i tamei ka sou muta'olune'i tangatanga tametamei, ia ta ngiala ne uvalane'i uasi. 11Ta nenusuluvi se'i mivava mulu'e sou lexe itokixa'a mo ilai i'ou la ua. Avalamu mukusai'a milai.
12 # Iop 4:13-14 Xe no 'olo'olovoxo mine aso ululu'elai 'o la, Avalamu iou muvuvuvu la muai. Anu muai ne la muaipiepiena lexe isivoxo toxoxa'a mutaasou mukalu. La mu'olo'olo la mu'ume. 13#Mul 1:1-14; Apo 7:6Xe IAUE muavuti la muvikalanu aloxo 'o, “Ulai aso vile la ta 'ilu'ilusuneni ne ixolu no tuala vile mo. Mo ilai ixolu no tuala vile va'axu mo. Mo ta mitema imuxaxa'a sou ipalupalusi'asi no tuala ane ne. Xoluxoluxa'a kalumo ne masuasi no nano no anu tauu ie loxo itemaxu mavulovexa tamei (400). 14#Mul 12:40-41; Apo 7:7Ia ta mitema ane i'oxo 'ilixo aloxo ne ulai noxi'a ne, eni alosi'a navunavu, ia ta 'ilusulusuneni ne no voxo ane ane'i i'umesou tuala ane ne, la itavulei'a lavuluti piena misevile sou ilailixu. 15Xe nini ne, naxoxoo namauli laixe xoo mole nalai naaululu manina mole namuamua'i la ua. Naxoxoo laixe loxo ne ia, oponeni uavuti sou la'iaxeneu mii vile uasi manina xoo mole nasoli la i'asixene. 16Ta 'ilu'ilusuneni ne ilivu ilai palea uasi xo ta mitema ne Amolu ne, eni umomomo sou eni akusai'a ilai palea uasi. Ixoxoo ane 'o mo lexe 'ili'ilixo masumasua noxi'a ne lexe u'oki'oki tani, la sou eni alosi'a navunavu, xe la sou akusai'a ilai. Ia ane'i ta 'ilu'ilusuneni ne ilivu ine'e lexe tauu ie itemaxu mavulovexa tamei ukalu.”
17IAUE muvikala aloxo ne mukalu, la aso mulu'elai mole tani isivoxo. Lasopeni vile sou navu xe telu vile ne mukaa mu'okinu, ilou mipaa vitanisi ka ilou miiave vaxa no taiinu la'ola'oluxu mimii ane anu Avalamu musu'a la'oluxu ne. 18#Apo 7:5No voxo ane ne, la IAUE ilou Avalamu misakiinu vaikala sou opo vilesisi la IAUE muvikalanu Avalamu aloxo 'o, “Eni aitixa'a ta 'ili'iline ilo'a ta xasixasine mo ta 'ilusulusuneni lialia e pilixasou musokou no lexa ne Aixiputo la mulai mutalo ne lexa tila ne Iupileitisi. 19Lialiaxa'a ta Kenan ilo'a ta Kenisi mo ta Kademon 20mo ta Keti ilo'a ta Peresi mo ta Lepaimu 21ilo'a ta Amolu mo ta Kanani ilo'a ta Xilixasi mo ta Ievusi ne, eni alosi'a ukalusi.”
Šiuo metu pasirinkta:
Tavaꞌu 15: ataNTpo
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2013, Wycliffe Bible Translators, Inc. All rights reserved.