TƏŊMORFANNE 8
8
Bii ǝŋni
1So Masǝŋ foo ɓǝ Noa tǝkine fan mai mo no ɓǝr dah ne ki daŋ. Masǝŋ soɓ zyak ge kuu tǝ sǝrri. Fahfal ah bii tǝŋ ǝŋni. 2Fahlii bii mai mo ɓal gin mor sǝr tǝkine zahtǝwoo ah ma sǝŋ daŋ coo tǝɗe'. 3Bii tǝŋ soo ga mor sǝrri, fahfal zah'nan temere ne jemma dappe, bii tǝŋ soo nǝfal njenje. 4Ne zah'nan jemma tǝtǝl rǝŋ ne fĩi patǝ rǝŋ ma pǝ syii ahe, dah ge zyii tǝ waa Ararat. 5Bii soo nǝfal ŋhaa dai pǝzyil fĩi jemma ahe. Ne fĩi patǝ jemma ne zah'nan vaŋno ah tǝlǝǝ waa tǝŋ jurra gin lalle.
6Fahfal zah'nan jemma nai, Noa gbǝr zahtǝwoo dah mai mo zyeɓko. 7Soɓ tǝmgbuu pǝ̃ǝ ge lalle, amma pii soo ge gwari. 8So Noa soɓ matǝvaa ge lal ka zye tǝ, ɗah bii ǝŋ tǝ sǝr ɓe ne? 9Amma matǝvaa lwaa cok tan sǝŋ ya, so pii soo ge wo Noa pǝ dahe, mor bii no tǝ sǝr ba. Noa nyen jol ah ge lalle, matǝvaa tǝ ge gŋ, kal ge wol ah pǝ dah ne ko. 10So Noa kaa zah'nan rǝŋ soɓ matǝvaa pǝ̃ǝ gin pǝ dah ge lal faɗa. 11Amma matǝvaa pii soo ge wol ah ne lil ne goo tǝbaakãm zahe. Noa tǝ, sǝr fee ɓe. 12So kaa zah'nan rǝŋ soɓ matǝvaa pǝ̃ǝ ge lal kpǝ, amma pii soo ge wol ah yao.
13Ne cok bii mo ǝŋ gin tǝ sǝrri, ka syii byaŋ Noa joŋ ɓo temere yea tǝtǝl vaŋno ne patǝ vaŋno fĩi pǝzyil syii ah ne zah'nan vaŋno ahe. Noa gbǝr zahtǝwoo dah ge lalle, so ẽe sǝr fee ɓe. 14Ne fĩi gwa ma pǝ syii ne zah'nan jemma gwa tǝtǝl rǝŋ ah sǝr yak ne daŋ.
15So Masǝŋ faa nyi Noa: 16Mo pǝ̃ǝ pǝ dah ge lalle, amo ne mawin ɓo, wee ɓo ne ŋwǝǝ wee ɓo daŋ. 17Mo pǝ̃ǝ ne fan ma ne cee mai mo no ne mo daŋ: juu, nǝǝ yaŋ tǝkine fan ma ker tǝ sǝr daŋ mo pǝ̃ǝra ne mo ka mo myahra wo sǝr tǝkine bem wee ka mo ɓoora ge pelle. 18So Noa pǝ̃ǝ gin pǝ dah ne wee ah ne mawin ah ne ŋwǝǝ wee ahe, 19tǝkine faɓalle, fan ma ker tǝ sǝrri, juu tǝkine fan ma ne cee ne ban ɓǝǝ daŋ pǝ̃ǝra pǝ dah ge lalle.
Noa joŋ syiŋ wo Masǝŋ
20Noa vuu cok joŋ syiŋ wo Masǝŋ, woo nǝǝ masãh ah tǝkine juu masãh ah daŋ joŋ syiŋ ah ne ko. 21Masǝŋ laa fuŋ ah pǝ'nyahre, so faa: Me tǝ ɓe, ɓǝ foo zahzyil dǝfuu pǝɓea daga nyee ɓǝǝra, ne daŋ laŋ me ka soɓ sǝr ne tǝkẽawãk mor ɓǝ ɓǝǝ faɗa yao, me ka ik fan ma ne cee tǝgbana me ik kǝpel faɗa yao ta. 22Zah'nan sǝr mo ga yea daŋ cok ruu fan tǝkine gwahl ga yea ta. So celle, cok cwakke, zalle, kal ne com tǝkine suŋ a yeara ta.
Šiuo metu pasirinkta:
TƏŊMORFANNE 8: MUAR
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible Moundang © Alliance Biblique du Tchad, 1996.