Joaancha Laenai 11
11
Oha Lasarone
1Naain Betaniau coroatajai baihuru aina nenaa Lasaroneein curuajai jetaote, banejelanaala cunaite.
2Marata, Mariha, naa nii baihuru curuaa. Nii Marihate, Cana Coaunera Calaohi Jesoso tijia choae erene jujui jataain coreti chorohin, couturiji que jacoraera ne.
3Nii jaunte cunaitiha nii acaauru cona Lasarone jaun, “Cunaitiha iicha belaaicha curuaanaa”, naain Jesoso rai berateeure.
4Nii jaunte Jesoso rene turuhin beeuruhane jana: “Coatiha nii ucuaetoha nii cunai caaun orihaain. Cana Coaunera coitucuhin, ‘Caohatoha Cana Coaunera Calaohi’, naain Cana Coaunera Calaohi coitucuuruha satiin cachaaurune coinate cunaite nii cacha”, naainte cuelanaala cuu coroata janohin ne Cana Coaunera Calaohi Jesoso. 5Nii baihuru aina curataain belainaaca natiinte 6“Cunaitiha Lasaro”, naain berateeuruhane jana. 7Coroata janohi cuu nihane baiha:
“Chajaauchete coaiteen Jodea cunichaache”, naa Jesoso, aina nerelanaa nichaanune raine janate:
8“Jaitinootera carajaje, ishohin ijiaonaa jerecuruha Jorioocuru, ajeri que ii bodoosiine. Nii atiin inachura coaiteen ucuaae cunaa jereeite cacha relaera”, naacaanune janate:
9-10“Tana, cojoanonaateein caletoaa Ofa Cana Coaunerana jaan ichacaaunne nihane coitucuhichene. Ichaenihanune, canuhachane baasoneein nedareeunni”, nae Jesoso.
11Nii baihate: “Siniha cana belaicha Lasaro, nocoa inae nocoaa curichaaun”, naa Jesosone jana:
12“Aihana jaunte chujian, sinihane jaun nerautareein”, naacaanu. 13Esinae sininaa que jecha aite naacaanune jaunte, 14rauhijiriin:
“Inae oha Lasaro. 15Caohacha quete cuu nenihanune jana ai. Inae laaen jataain quesenetaa curiquicheein”, naa Jesosone jana:
16“Chajaauchete cana netonai aina cunichaache, aina jiniiquiin ohacachene coina”, nae nii Tomasi canacaanu rai. (Nii Tomasite curuaateeure Fafione neei, fafione nihana jaun.)
Onaa ichateein, rai ichaonaa tera niha Cana Coaunera Calaohi Jesosone
17Nii janate Betaniau turuha Jesosone jana, inae jena janoha atane neruujuene beeure. 18Saneein itaraeniha Jerosaleen caje nii Betaniane jaunte, 19tajiha caje turuhacoaaure Jorioocuru, nii onaa cacha baihuru Marata, Mariha, naaonjoain suujua nunaauruhane coina.
20Nii janate turuelalajeein tajiha uujiha Jesosone coitucuuriin que tacaa uhe Marata. Jana, Marihate, loreri asaae nedae.
21Nitohaneein cuhin Jesoso que tacaain: “Cau neeichene jana nihane, oriheiche canejerata curaanaa. 22Nete, chaelai bajaaichene ichei tiha cureeinche Cana Coaunera”, naa Maratane jana:
23“Ichanaainte coaiteen nichaurareeinche”, naa Marata rai Jesosone jana:
24“Eejeen airichaaiche chuhisi. Inae besautiaa cana janonaane banate, coaiteen ichanaain ichaoha cuurureeinche onacaauru niquicha”, naa Maratane jana:
25“Canune onaa ichateein, rai ichaonaa nitajenaa charaneein nenaana jaan teraneeunche. Quesenetaerate, ohane niha natiin ichaoha cureeinche. 26Satiin jaiti ichaohin nenacaauru quesenetaanete, ohane niha natiin, chabana nitajenereeinchein. Caa caitoonjoan esenetaaichena”, naa Jesosone jana:
27“Eejeen, iite Curisito neein Cana Coaunera Calaohineeinchene esenetaanuchera. Iite caa chauratane que turuha uha niicha jerecuri canacaanuhacha cohajei ineinchera”, nae Marata.
Lasaro atanebana choae chanaa Jesosone
28Niritohane baihate, nocoasai Mariha cotihaca cue Marata. Rene turuhinte: “Taute turue cacha relaera. Ichotijiaeratiha jaunna ii cotihaca uun”, naa Maratane jana, 29luhecotariin nimihuritiin Jesoso coaraa uhe Mariha. 30Nii janate nii ratiriha Maratane jaaun jelaiha ne Jesoso, jaiti nii neseu turuelanaala. 31Luhecotariin nimihuritiin uha Marihane jaunte caaijie uure nii loreri asaae aina neein suujua nunaa nenacaauru Jorioocuru, “Naain atanebana choae jecha inaderaa cue”, naain niqui caaijie cuure nii Jorioocuru.
32Nii janate Jesoso rene turuhin nacatiha neseonraain:
“Cau neeichene jana nihane, oriheiche canejerata Curuaanaa”, naain 33chanaa Marihane jana, aina chanaauruha Jorioocurune jaun, jataain inaderaain:
34“Chu atane rucuhecure”, naain bajaa Jesosone jana:
“Nota taute atane rucuhecurera Curuaanaa. Chajaautejian coanicha”, naauruhane jana 35chanae Jesoso.
36Nii jaunte: “Jataainte coinaderae”, naaure Jorioocuru tabaauru.
37Nii jana leochaaurute jana: “Tajia caa cacha, maosa nota cono tihalune. Tajia jana naineriha chaaelai ichaa oheniha Lasarone coinane”, naaure nii leeochaauru Jorioocuru.
Oo caje ichanaa Lasarone
38Nii jaunte atane bana rohan turuhin, coaiteen inaderae Jesoso. Ajeri jachu cuhane ita rucuhecuruha Jorioocuru, jelai ajeri que fuhine jaun:
39“Joracaauche”, naa Jesosone janate:
“Inae jerihane nirinihache cacha natiinta. Inae jena janohache aiha cachane natiinta Curaanaa”, naa nii nijiaonaa cacha bai Maratane jana:
40“Inaera ichei, ‘Esenetaaichenete Cana Coaunera ichanohin caohati coaariquicheeincha’, naain ichei aitoonchena”, naa Cana Coaunera Calaohi Jesosone jana 41-42joracaauruhane jana, dede coarajeein:
“Nariha Ofa, ii bajaanune satiin quiicha bajanojoin tenajaaoqui bajaanune naineeine coreniha. Nii jaunna ichei aitoon, aonacuruha nuricho que cau nenacaauru cachaaurune coina, aonaain esinae rauhijiriin ii caletohaine esenetaauruhane coinara Ofa”, naane 43baihate:
“Lasaro, mituu nii Lai caje”, naa Cana Coaunera Calaohi Jesoso tonijiaain jana, 44tajiha conaara tijianeein mituha uhane jana: “Batuhicuchete jianacoon mituhine”, nae Cana Coaunera Calaohi Jesoso.
45Nii ainate Cana Coaunera Calaohi Jesoso esenetaaure le lauriin Jorioocuru, nii Mariha corianiha cunacaauru.
Jesoso mucuuruhane rai neeuruha fariseeocurune
(Mt 26.1-5; Mr 14.1-2; Lc 22.1-2)
46Nii jana, acaauru tabaauru jetaote turuhin biha cuure fariseeocuru rai. 47Nii jaun jetaote itataojiaaure fariseeocuru, batirichuru curuaanaacuru, saain cocoainanacaihuri nii que ita rai ereereecuruhane coina. Nii jaun jetaote ita rai:
“Inae itolere ichaa nii cacha. Nasirihacache. Maosacuru rautaain, onaa ichateein, lenone faain, itolere ichaa inae. 48Naajeein inauheneeicha coarajihacachenete, esenetaacoaauruha satiin cachaaurune, cana cairichaaurureein Romanocuru rai cocoainanacaihuri. Cana raite caa ita taojianaana jaan loreri Teenforo chamuhintiin cana cairichaaurure”, naaure jetao Jorioocuru curuaanaacuru.
49Nii jana jetaote, cuune leinjiin Caifasineein curuajaain batirichuru curuaanaa. Nii jetaote:
“Joaereeinte ereereequiche. 50Nita coitucuhichene, cana caohachanu que tejian oha cureein nii leinjiin cacha, nabana necairichanaa coaracaache satiin Isaraele cocoaicha nichaachene coataa”, nae jetao acaauru rai nii Caifasi.
51(Coatiha suujua caje coaauneein rocohin aitohi nii Caifasi. Nii ajaana cuhane batirichuru curuaanaa neein nihana jaunte coroatajane Cana Coaunera, nabana necairichaa Jorioocurune coataa oha curichaain Cana Coaunera Calaohi Jesosone que aitohane coina. 52Coatiha Jorioocuruhacha coreniha oha curihaain niqui. Satiin chauratane sacutaain riaaneein nenacaauru Cana Coaunera calaohichuru jitariin taojiaane coinate aicheein.) 53Nitohaneein oo caje Lasaro ichatihane caje coauneeinte, Cana Coaunera Calaohi Jesoso que necosuujuaaure Jorioocuru rai cocoainanacaihuri, sohin jaooruhane coina.
54Nii jaunte Jorioocuru rai cocoainanacaihuri rai ococoelanaala nii Jodea batane caje mituhin naain Efaraaiun cue Jesoso. Cacha areroo rohan nenaa neseu Efaraaiun cuhin cuu ne, canacaanu aina.
55Fasocoa catainajeein, neseeuru caje naainen Jerosaleeun cuhajeeure, acaauru necoaauna rijijieein naunatajaain, necaaonjoaain jatoroaain Fasocoa beseta bitohauruhane coina. 56Nii Jerosaleeun turuhinte cuu cajihaneein Jesoso ariirijieeure. Cuu nenaa ita taojiahurune jaan Teenforo asaae ita taojiaain:
“Beseta bitohanacha urichaain”, naain itacaje bajaaure, 57“Chunocoha, ‘Cuute ne’, naain coitucuhane, beeinete mucuhin raeratihacaanu”, naauruha fariseeocuru, batirichuru curuanaacuru, naaonjoainurine jaun.
Šiuo metu pasirinkta:
Joaancha Laenai 11: URA
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2005, 2024, Wycliffe Bible Translators, Inc.