Vakatekivu 7
7
Na Waluvu Levu
1A sa kaya o Jiova vei Noa, “Mo vodo ki waqa vata kei iratou kecega na nomu lewe ni vale; au sa raica ni sai iko taudua ga na tamata yalododonu ena i tabatamata taucoko oqo. 2Mo kauta vata kei iko e yavitu, na veimataqali manumanu savasava kecega, ka me ra veisa, ia me dua talega na ka tagane kei na ka yalewa na manumanu tawa savasava. 3Me yavitu talega, na veimataqali manumanu vuka kecega. 4Ni sa vo ga e vitu na siga, au na qai vakatauca na uca e vuravura me vasagavulu na siga ka vasagavulu na bogi; au na vakarusa talega na veika bula kecega au a bulia mai ena dela i vuravura.” 5A sa vakayacora o Noa na veika kecega sa vakarota vua o Jiova.
6A sa 600 na yabaki i Noa ena gauna a waluvu kina na vuravura. 7A vodo ki waqa o Noa, na watina, o iratou na luvena tagane, kei na dui watidratou me ratou dro kina ni sa yaco mai na waluvu.#Maciu 24.38-39; Luke 17.27 8Era a vodo ki waqa e yadua na veisa, dua na ka tagane ka dua na ka yalewa na manumanu era dau qasi. 9Era a vodo vata kei Noa ki waqa me vaka sa vakarota o Jiova. 10Ia ni sa oti e vitu na siga, a qai tekivu me waluvu na vuravura.
11Ni sa yabaki 600 o Noa, ena i katinikavitu ni siga ni i karua ni karua ni vula, a botea kina na Kalou na i vurevure ni wai kecega e vuravura, ka tadola na veilati kece kei lomalagi,#2Pita 3.6 12ka sa tau na uca e vuravura ena 40 na siga ka 40 na bogi. 13Ena siga talega o ya e ratou a vodo kina ki waqa o Noa, na watina, kei iratou na luvena tagane, o Semi, Ame kei Jefeca, kei iratou na dui watidratou. 14Era a vodo vata kei iratou na veimataqali manumanu kila, na manumanu manoa, na manumanu era dau qasi kei na veimataqali manumanu vuka. 15Era vodo vata kei Noa ki waqa e yadua na ka yalewa ka dua na ka tagane na veimataqali ka bula kecega. 16Ia ni ra sa curu kece ki loma ni waqa me vaka sa vakarota na Kalou, a qai sogoti Noa yani ki loma ni waqa o Jiova.
17A sa waluvu tiko na vuravura ka oti e 40 na siga, a qai tubu cake na cere ni wai ka nawa sara yani na waqa. 18A titobu sara na wai, ka mai ciri voli na waqa ena dela ni wai. 19A qai toro cake tikoga na wai me yacova ni ra sa dromu kece sara na veiulunivanua cecere. 20A toro cake tale na wai me rauta e vitu na mita na kena cere mai na dela ni veiulunivanua. 21Era a mate na veika bula kecega ena dela i vuravura, na manumanu vuka, na manumanu manoa, na manumanu kila, kei na veiqele ni manumanu lalai kecega. 22A sa mate na veika kecega sa cegu e dela i vuravura. 23Sa vakarusa o Jiova na veika bula kecega ena dela i vuravura me vaka na tamata, na manumanu era qasi voli kei na manumanu vuka kecega. A vo wale ga o Noa kei ira era tiko kaya ena waqa. 24A sa tu na wai titobu ena dela i vuravura ka oti e 150 na siga.
Šiuo metu pasirinkta:
Vakatekivu 7: FNVDC12
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Fijian New Version including Deuterocanonical Books © Bible Society of the South Pacific, 2012.