Marcos 3
3
Meyosma
(Mt 12.9-14; Lc 6.6-11)
1Jaton haho tsinquiti xoboho cahen Jesus hihcorihbihi. Meyosmahi noque jano rihbi jai. 2Jesus jisquin sirijascacanquin.
—Rohaja ra ta jatihiqui tantiti neten hihqui bi —hihxon jiscanquin jaya yohuanti janoxon cahecatsihquin.
3Jesusen sca meyosmahi yohiquin:
—Noque tocanbi johue —hahquin.
4Jascajaxon tsahotaibo yocaquin:
—¿Tantiti neten sirijati joi jaiquin? ¿Masajati joi jaiquin? ¿Teehihmati joi jaiquin? ¿Rehteti joi jaiquin? —jan jascahah bi jahua hihyamacani. 5Benaya bi sinaxon sca Jesusen jato bejispaquequin. Jointi chahomayabo copi benati. Meyosmahi sca yohiquin:
—Miin mequen sanahihnihue —hahquin. Sanahihnihax rohascai. 6Jaa rohajahi jisish cainax herodianobo betan sca fariseobo hahqui yohuancani:
—¿Jenquetsahaxon non Jesus mahuamatihin? —hihcani yohuani.
Hian quexa tsamajaquetaibo
7Hian janin sca jahuen haxenicabo betan Jesus caresscai. Hahchon bocani hicha jonibo tsama bi res. Galilea mai mehax, Judea mai mehax. 8Jerusalen janinhax, Idumea janinhax, Jordan hoque quexa quehax, Tiro janinbohax, Sidon janinbohax. Tsama bi res hahqui cahax tsamajaqueti. Jatihibi jan hahcaibo nincacax tsamajaqueti hashoan nincacatsihqui. 9Main tsamajaquetaibo hahqui tsehquesihquiboya jahuen haxenicabo sca yohiquin:
—Nonti jistannahue non hahan canon —hahquin. 10Jan hicha rohajahipi copi hisinyahpabaan jatihixonbi Jesus mehecatsihquish hahqui tsamajaquetax tsehquesihqui. 11Yoshin tiromabaan rihbi Jesus jisish hahqui betihipaquetax joi coshin yohuani:
—Mia tah min Diosen baque qui —hihcani. 12Jonibaan yoshin jascari yohuanai nincayamanon hihxon, jato hihti yohiquin:
—Yohuanyamanahue —hahquin.
Jahuen doce raantibo Jesusen caisai
(Mt 10.1-4; Lc 6.12-16)
13Mananahbo sca cahi. Caxon jan caisaibo quenaquin. Quenahah hahqui bocani. 14Doce joni cahen caisquin, hahbetan nihnon. Papan joi yohinicabo raannoxon jato caisquin. 15Tiroma yoshin potati hihbobo hihnon jato caisquin. 16Huetsa cahen Simon. Jaa cahen Pedro janequin. 17Huetsa cahen Jacobo, Zebedeon baque. Huetsa cahen Juan Jacobonen huetsa. Jabo rabe Jesusen Boanerges janequin. Boanerges cahen terenhihca baquebo hihcatsihqui. 18Huetsa cahen Andres, huetsa cahen Felipe, huetsa cahen Bartolomé, huetsa cahen Mateo, huetsa cahen Tomas, huetsa cahen Alfeon baque Jacobo, huetsa cahen Tadeo, huetsa cahen Simon Celador, 19huetsa cahen Judas Iscariote, Jesus bihmanica. Jaa rahsi caisquin, doce joni.
Mia tah min Satanas coshiyah qui hihquibo
(Mt 12.22-32; Lc 11.14-23; 12.10)
20Xobon sca Jesus cahi. Hahquirihbi tsamajaquetaiboya piti hahtipahyamascaquin. 21Jascascai nincacax jaa bichi sca jahuen jenabo cahi.
—Tehquehih sca ta jaiqui —hihxon jaa bichi bocani. 22Jerusalen janinhax jahuex huishani joi honanbo rihbi yohuani:
—Tiroma yoshin hapon yanapana ta tiroma yoshin picohihqui. Beelcebunen ta jaa hihbojascaiqui —hihcani.
23Jascahiton:
—Benahue —jato jaquin. Jahuiboya sca jaa patax queha joibo sca jato yohiquin:
—¿Jenquetsahaxon Satanasnen Satanas picotihiquin? 24Huesti mai mehax jaabo rahsibi rehtenananax ta queyoscatihiqui. 25Huesti xobo mehabo jaabo rahsibi rehtenananax ta jaabo queyoscatihiqui. 26Satanas hahbe Satanas betan rehtehahax cahen jaabo queyoscaan, hahri queyocani. 27Coshi jonin xoboho ta tsoabi yometsohti hihcoti hahtipahyamahiqui, hihbo nexayamahax. Hihbo nexaxon pari ta jahuen jahuaborabo bichintihiqui, jatihibi queyobahinnoxon. 28Yohicoin ta hen mato jai: jatihibi hohcha ta jonibo sohuatihiqui. Papa qui tiromahi yohuanaibo rahsi rihbi ta sohuatihiqui. 29Jascapahbo sohuaxon bi ta Dios Yoshin qui tiromahi yohuanaibo Papan jahuentianbi sohuatimahiqui. Jascapa hohcha ta jascabihi sca banetihiqui —jato jaquin.
30Jaa ta tiroma yoshinyahpa qui jaabo jai copi cahen jato jascajaquin.
Jesusen mama betan jahuen huetsabo
(Mt 12.46-50; Lc 8.19-21)
31Jahuen mama betan jahuen huetsabo sca nocoti. Jemanhihti janin nihxon Jesus quenamacanquin. 32Tsamajaquetax tsahotaibaan sca yohixonquin:
—Miin mamaya miin huetsabo ta jeman qui. Mia ta quenamacaniqui —hahcanquin.
33Jaan sca joi bichinquin:
—¿Tsoa heen mama quin? ¿Tsoa heen huetsabo quin? —hahquin. 34Tsahohahtancahuanaibo bejispaquexon sca:
—Neabo ta heen mama heen huetsabo qui. 35Papa queenai quescajanicahbo ta heen huetsa, heen choca, heen mama qui —jato jaquin.
Šiuo metu pasirinkta:
Marcos 3: kaq
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2008, Wycliffe Bible Translators, Inc. All rights reserved.