मर्कुस 7
7
रितिरिवाजक बारेयँ सिछ्या
(मति १५:१-९)
1एक दिन यरुसलेमकमाटे अइल फरिसि र धर्मगुरुसब येसुक चारिओर जम्मा भइल। 2उछिका येसुक कोलोउ-कोलोउ चेलासबेइ असुद्द हाथ अथबा हाथ नधोइकुन खइलाहार कुरा खइल उसबेइ देख्ल। 3किकेकने सभइ यहुदिसबेइ, खास करिकुन फरिसिसबेइ उसब्क बुबा-बाजेइ मान्तिन अइल रितिरिवाज अनुसार हाथ नधोइकुन खइलाहार कुरा नाखाओत्। 4उसब बजारकमाटे अइलपाछु नगोख्रिकुन केहाउ पुनु नाखाओत्। ओत्का मत्रइ नइजे कि उसब्क रितिरिवाज अनुसार कचुरा, घइला, कासक भडियासब र खाइके बोस्तेखना डासाल गुन्रिसमेत नचोखेइकुन नाचालाओत्।
5उहइगुनेइ फरिसि र धर्मगुरुसबेइ येसुके पुछ्ल, “तेउह्र चेलासबेइ बुबा-बाजेक रितिरिवाजके नमानिकुन किके असुद्द हाथेइ खइलाहार कुरा खइताहात्?”
6उपाछु येसुइ उसब्के कहिकेभइल, “यसइया अगमबक्ताइ कर्ल अगमबानि यस्न लेख्ल बाटइ, जोनो तोहेसब जस्न देखाओटिसब्के ठेक्कइ मिलित,
“‘इसे जातेइ मेह्राके ठरेइ मत्रइ मान कर्ताहात्,
तर मन चाहिँ मोइकते धेरइ टाढो बाटइ।
7 उसबेइ बेर्थयँ मेर आरधना कर्ताहात्,
किकेकने उसबेइ सिखालाहार सिछ्या त मानुसेइ देल,
आग्या मत्रइ हखइ।’
8 तोहेसब बाठो भइकुन परमेसोरक आग्याके छाडिकुन मानुससब्क रितिरिवाजके मान्ताहाउ।”
9ओनेनेइ उसब्के कहिकेभइल, “तोहेसब धेरइ बाठो भइकुन आफ्न रितिरिवाज मानिके लागि परमेसोरक आग्याके टार्ताहाउ। 10किकेकने मोसाइ कहल बाटइ, ‘आफ्न उइया र बुबाके मान करउ,’ हसे ‘उइया र बुबाक बिरोधयँ नइजेराम्र बोरालाहारके मारिके नइ पोरित।’ 11तर तोहेसब आफ्न उइया र बुबाके, ‘मोइ तेउह्रासब्के जे-जत्का साहेता करिके पोर्लाहार उसे नइ कुर्बान हखइ’ अथबा ‘उसे कुरा मोइ परमेसोरके चाढाइसक्ल’ कताहाउ कने, 12तोहेसब उख्राके आफ्न उइया र बुबाक लागि फेरि केहाउ करिके नादेओ। 13यस्के तोहेसब आफ्न रितिरिवाजके मानिके लागि परमेसोरक बचनके चाहिँ काम नइजेलाग्लाहार बानाताहाउ, हसे यस्नइ अरु कामसब पुनु तोहेसब करिराख्ताहाउ।”
असुद्द पार्लाहार कुरासब
(मति १५:१०-२०)
14उपाछु येसुइ भिडसब्के फेरि आफ्नेन्लघि बोलाइकुन कहिकेभइल, “मेर कुरा सभइ जेना मन लागाइकुन सुनउ र बुझउ। 15ओस्न केहाउ कुरा नइजे जोनो बाहारकमाटे मानुसभितर पोसिकुन उख्राके असुद्द पारिके सक्लाहार, तर मानुसकमाटे बाहार निस्कलाहार कुरासबेइ नइ उख्राके असुद्द पारित। 16[जोक्र सुन्लाहार कान बाटइ, उहाइ सुनुस्।”]#७:१६धेरइ जस्न भर पोर्लाहार ग्रिक स्रोतयँ इसे पद लेख्ल नापाहिँ। उहइगुनेइ इछिका यस्न [ ] कोठाभितर लेख्ल बाटइ।
17जब येसु भिडसब्के छाडिकुन घरभितर पोसिकेभइल, तब ओनेन्क चेलासबेइ इसे काथाक बारेयँ पुछ्ल। 18हसे येसुइ उसब्के कहिकेभइल, “किति तोहेसब अझइ पुनु नइजे बुझ्ल बाटउ? जोनो कुरा बाहारकमाटे मानुसभितर पोसित, उसे कुराइ असुद्द नापारइ कइकुन तोहेसब नाजानउ? 19किकेकने उसे मनभितर नपोसिकुन, पेटयँ पोसित र गुहु बनिकुन बाहार निस्कित्।” यस्के ओनेनेइ सभइ खइलाहार कुरासब सुद्द हखइ कइकुन बाताइकेभइल।
20ओनेनेइ फेरि कहिकेभइल, “जोनो कुरा मानुसक मनसे बाहार निस्कित, उहइ कुराइ मानुसके असुद्द पारित। 21किकेकने भितरसे नइ सभइ किसिमक नइजेराम्र बिचारसब, बेभिचार कर्लाहार, चोरालाहार, मानुस मार्लाहार, 22अनइतिक सम्बन्ध, लोभ कर्लाहार आँखि, छाडा, दुस्टता, ठग्लाहार, खिसि कर्लाहार, डाडे, कुरउटे, घमन्डि, मुर्ख र अपमान कर्लाहार, 23इसे सभइ दुस्ट कुरासब मानुसक मनसे नइ निस्कित, हसे उहइ कुराइ मानुसके असुद्द पारित।”
बेटिक बिस्वास
(मति १५:२१-२८)
24येसु उसे ठाउके छाडिकुन टुरोस र सिदोनपटि जाइकुन एक्टा घरयँ पोसिकेभइल। किकेकने इसे कुरा कोलोउयेइ थाहा झुनपाउस् कइकुन ओनेनेइ चाहाते रहत, तर ओनेन् लोकाइके नइजेसकेभइल। 25उहइ बेला एक्टि बेटिइ येसुक बारेयँ सुन्लि, हसे उछिका आइकुन ओनेन्क गोडयँ घोप्टो पोरिकुन सेवा लाग्लि, किकेकने उसे बेटिक नान्हि छाहिके भुत आत्मा लाग्ल रहइ। 26उसे चाहिँ सिरियाक फोनिके कलाहार ठाउयँ जर्मलि ग्रिक जातक बेटि रहि। उहाइ मेर छाहिम्कमाटे भुत आत्मा निस्काइदेओ कइकुन ओनेन्साङ बिन्ति कर्लि। 27येसुइ उसे बेटिके कहिकेभइल, “पइला आफ्न छावासब्के खाइके देउक्, किकेकने उसब्क रोटि आछ्रिकुन कुकुरसब्के देइके राम्र नाभओइ।”
28हसे उहाइ कहलि, “उसे कुरा त राम्र हखइ नि प्रभु, तर कुकुरसबेइ पुनु त छावासबेइ टेबुलहेठ झार्ल टुक्रासब खाइत।”
29येसुइ उख्राके कहिकेभइल, “तोइ यस्न कहलगुनेइ ढुक्क भइकुन घर जाउक्, तेर छाहिरकमाटे भुत आत्मा निस्किकुन जाइसक्ल बाटइ।” 30हसे उसे बेटि घर फर्किकुन जइतेखना उक्र छाहिक् निक भइकुन खाटयँ सुतिरहलि भेट्लि, किकेकने भुत आत्मा निस्किसक्ल रहइ।
नइजेसुन्लाहार र नइजेबोरालाहार मानुस निक भइल
31उपाछु येसु टुरोसकमाटे निस्किकुन सिदोन सहर भइतिन् डेकापोलिसक सिमाना माझसे भइकुन फेरि गालिल तालयँ जाइकेभइल। 32उछिका मानुससबेइ एक जेना नइजेसुन्लाहार र नइजेबोरालाहार मानुसके येसुकलघि आनिकुन, तेउह्र हाथ इक्र उप्र राखिदेओ कइकुन बिन्ति कर्ल। 33उपाछु येसुइ उख्राके भिडकमाटे अलगइ लेजिकुन, आफ्न पिङ्रि उक्र कानयँ घालिकेभइल र आफ्न पिङ्रियँ थुथ लागाइकुन उक्र जिभि पुनु छिइकेभइल। 34हसे ओनेनेइ सोर्गपटि चाहिकुन लाबो सास फेर्तिन उख्राके कहिकेभइल, “इफ्फाता,” जोक्र अर्थ हखइ “खुलुस्!”
35यस्न कहल बिथिकइ उसे मानुसक कान खुल्ल र जिभि चल्ल हसे राम्रसे बोराइके थाल्ल। 36उपाछु येसुइ उसब्के “इसे कुरा कोख्राहुके झुनकहउ” कइकुन आग्या देइकेभइल। तर ओनेनेइ जत्कासुकइ झुनकहउ कहते पुनु, उसबेइ झन बेस्के कहते हिठ्ल। 37इसे कुरा सुन्लाहार मानुससबेइ छक्कइ पोर्तिन कहिके लाग्ल, “ओनेनेइ सभइ काम राम्र कर्ल बाटत, ओनेनेइ नइजेसुन्लाहारके सुनिके सक्लाहार र नइजेबोरालाहारके बोराइके सक्लाहार पुनु बानाताहात्।”
Šiuo metu pasirinkta:
मर्कुस 7: DRY
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2024 (Active), Mother Tongue Translators Society and Wycliffe Bible Translators, Inc. All rights reserved.