मर्कुस 14
14
येसुके मारिके खोज्ल
(मति २६:१-५; लुका २२:१-२; युहन्ना ११:४५-५३)
1निस्तार पाब्नि र अखमिरि रोटि खइलाहार पाब्नि आइके दुइ दिन बाँकि रहइ। हसे मुक्खे पुजेहेरिसब र धर्मगुरुसबेइ ओनेन्के अरुइ थाहा नइजे पाउलाहार करिकुन झुक्काइकुन कस्के मारिके हबाहाइ कतिन् दाउ खोजिराख्ल रहत। 2तर उसबेइ कहल, “पाब्निक बेलायँ झुनकरउ, किकेकने मानुससबयँ बड्क खइला-बइला मच्चिके सकित।”
बेथानियायँ येसुक अबिसेक
(मति २६:६-१३; युहन्ना १२:१-८)
3येसु बेथानियायँ कोररोग निक भइल सिमोनक घरयँ जाइकेभइल। ओनेन खाइके बोसिकेभइल बेलायँ एक्टि बेटिइ सिङ्गमरमरक सिसिभोरि सुद्द जटामसिक महङ्ग अत्तर लेइकुन अइलि, र उहाइ उसे सिसि फुटाइकुन अत्तर येसुक मुडयँ खनेलि। 4उसे देखिकुन कोलोउ-कोलोउयेइ रिसातिन एक-आपसयँ कहल, “यस्न महङग अत्तर किके खेर घुघाल? 5इसे अत्तरके बेच्ल भइने चान्दिक तिन सय सिक्काकते पुनु धेरइ अइलाहारइ, र गरिबसब्के देइके सक्तिहाइ।” हसे उसबेइ उसे बेटिके झापार्ल।
6तर येसुइ कहिकेभइल, “छाडिदेओ, किके इख्राके किचकिच कर्ते बाटउ? इहाइ त मेर लागि राम्र काम कर्लि बाटि। 7किकेकने गरिबसब त सद्देहुन तेउह्रसबसाङ भइताहात् नि, जहे मन लागित साहेता करिके सक्ताहाउ, तर मोइ त तेउह्रसबसाङ सद्देहुन नाभओम्। 8इहाइ त जिति करिके सक्लि, उहइ कर्लि। मेर देहिके गाडिके लागि इहाइ आघुहिँसे सावाद बासालाहार तेल घसिकुन तयार पार्लि बाटि। 9साच्चिकइ, मोइ तेउह्रासब्के कहते बाटम, सन्सारभरि नइ जुछि-जुछि सुसमचार प्रचार भइत, उछिका इहाइ कर्ल इसे कामक सम्झना कर्ताहात्।”
यहुदा इस्करियोत येसुके पक्राइके तयार
(मति २६:१४-१६; लुका २२:३-६)
10येसुक बाह्र जेना चेलासब मद्धे यहुदा इस्करियोत ओनेन्के पक्राइके मुक्खे पुजेहेरिलघि जइल। 11यहुदाक कुरा सुनिकुन मुक्खे पुजेहेरिसब बेस्के रामातिन उख्राके पइसा देलाहार प्रतिग्या कर्ल। उपाछु ओनेन्के कस्के पक्राइदेम् कइकुन उहाइ मउका खोजिके थाल्ल।
निस्तार पाब्निक तयारि
(मति २६:१७-२५; लुका २२:७-१३; युहन्ना १३:२१-३०)
12अखमिरि रोटि खइलाहार पाब्निक पइला दिनयँ उसबेइ निस्तार पाब्निक लागि भेडाक पाठा भोक चाढाते रहत, उहइगुनेइ चेलासबेइ ओनेन्के पुछ्ल, “तेउह्र इच्छा किति बाटइ, र कुछि जाइकुन हामे तेउह्र लागि इसे पाब्निक भोज तयार पारउ?”
13हसे ओनेनेइ दुइ जेना चेलासब्के यस्न कइकुन पाठाइकेभइल, “तोहेसब बजारयँ जाओ, उछिका गाग्रियँ पानि बोकिकुन लेज्लाहार एक जेना मानुसके तोहेसब भेट्ताहाउ, हसे उक्र पाछु-पाछु जाओ। 14र जोनो घरयँ उसे पोसित, उसे घरक मालिकके कहुक्, ‘गुरुज्यु कताहात्, मेर चेलासाहिन निस्तार पाब्निक भोज खइलाहार पहुना कोठा कुछि बाटइ?’ 15हसे उहाइ तेउह्रासब्के साजाइकुन तयार पार्ल उप्रक तालाक बड्क कोठा देखाताहात्, उछिन्काइ हाम्र लागि भोज तयार पारउ।”
16उपाछु चेलासब जाइकुन बजारयँ पोस्ल, हसे ओनेनेइ जस्न कहिकेभइल रहत, ओस्नइ ओनेन्सबेइ भेटिकुन निस्तार पाब्निक लागि भोज तयार पार्ल।
17जब आन्धार भइते अइल, तब ओनेन् बाह्रइ जेनासाङ आइकेभइल। 18भोजयँ बोसिकुन खइतिन कर्तेखना येसुइ कहिकेभइल, “साच्चिकइ मोइ तेउह्रासब्के कहतम्, तोहेसबमद्धे मेरसाहिन खइलाहार एक जेनाइ मेह्राके धोखा देइत।”
19इसे कुरा सुनिकुन चेलासब बेस्के दुखि भइकुन पालइपालो ओनेन्के, “किति उसे मोइ हखम?” कहतिन् पुछिके थाल्ल,
20ओनेनेइ उसब्के कहिकेभइल, “तोहे बाह्र जेना मद्धे, जोनेइ यख्नि छिपायँ मेरसाहिन रोटि चोपिराख्ल बाटइ उहाइ नइ मेह्राके धोखा देइत। 21मानुसक छावाके त उक्र बारेयँ धर्मक कितापयँ लेख्ल अनुसार नइ भइत, तर धिक्कार भउस् उख्राके जोनेइ मानुसक छावाके धोखा देइत। उसे मानुस जर्मलकते त नइजे जर्मल भइने राम्र भइलारइ।”
अन्तिम भोज
(मति २६:२६-३०; लुका २२:१४-२०; १ कोरिन्थि ११:२३-२५)
22ओनेन्सब भोज खाइरहल बेलायँ येसुइ रोटि लेइकेभइल, र आसिक देइकेभइल, हसे टुटाइकुन ओनेन्के देतिन् कहिकेभइल, “लेओ, इसे मेर देहि हखइ।”
23हसे कचुरा लेइकुन धन्यबाद देलपाछु ओनेनेइ उसब्के देइकेभइल, र उसब सभुनि पिउल। 24हसे ओनेनेइ उसब्के कहिकेभइल, “इसे लउठा करारक मेर रकत हखइ, जोनो धेरइक लागि बुहाइके पोरित्। 25साच्चिकइ मोइ तेउह्रासब्के कहतम्, उसे दिनसमन मोइ दाखक फोरसे बन्ल कुरासब नापिओम्, जबसमन मोइ परमेसोरक राज्जेयँ उसे लउठा करिकुन नापिओम्।”
26उपाछु ओनेन्सब एक्टा भजन गिदाइकुन जइतुन डाँडायँ जाइकेभइल।
पत्रुसक इन्कारबारे येसुक भबिस्यबानि
(मति २६:३१-३५; लुका २२:३१-३४; युहन्ना १३:३६-३८)
27उहइ बेला येसुइ ओनेन्सब्के कहिकेभइल, “तोहे सभइ जेना पाछु हटिकुन जइताहाउ, किकेकने धर्मक कितापयँ यस्के लेखिल बाटइ, ‘मोइ चरुहासब्के मारिदेतम्, हसे भेडासब तितरबितर भइताहात्।’ 28तर मोइ जिइकुन उठ्नेपार, तोहेसब कते आघु गालिलयँ जइतम्।”
29हसे पत्रुसेइ येसुके कहल, “सभइ जेना पाछु हट्ने पुनु मोइ चाहिँ नाहटम्!”
30येसुइ उख्राके कहिकेभइल, “साच्चिकइ मोइ तेह्राके कहते बाटम्, आजु राति भाले दुइ चोटि बाजिके कते आघु तोइ मेह्राके तिन पल्ट इन्कार कर्तस।”
31तर उहाइ झन जोड देइकुन कहल, “तेउह्रसाहिन मोरिके पोर्ने पुनु मोइ तेउह्राके इन्कार नाकरम।” हसे अरु चेलासबेइ पुनु ओस्नइ कहल।
गेतसमनियँ येसुक पार्थाना
(मति २६:३६-४६; लुका २२:३९-४६)
32उपाछु येसु र ओनेन्क चेलासब गेतसमनि कलाहार ठाउयँ जाइकेभइल, र येसुइ आफ्न चेलासब्के कहिकेभइल, “मोइ पार्थाना करिलालइके तोहेसब इछिन बोसउ।” 33तर पत्रुस, याकुब र युहन्नाके चाहिँ आफ्नसाहिन लेजिकेभइल, र ओनेन् बेस्के दुखि भइकुन छट्पटाइके लाग्ल। 34हसे ओनेनेइ उसब्के कहिकेभइल, “मेर मन गाह्रे नइ दुखि भइकुन परानइ जइबक् जस्नइ भइल बाटइ। तोहेसब जग्लइ भइकुन इछिन बोसउ।”
35उपाछु ओनेन् चुत्कि ओताहाँ जाइकुन भुइयँ घोप्टो पोरिकुन मिलित कने आइके लाग्ल दुख मेरमाटे हटुस् कइकुन पार्थाना करिके थाल्ल। 36ओनेनेइ कहिकेभइल, “अब्बा, हे मेर बुबा तेउह्र लागि त सभइ कुरा सम्भब बाटइ। इसे दुखक कचुरा मेरमाटे उठाइकुन लेजिदेओ। तर पुनु मेर इच्छा नइजे कि, तेउह्रइ इच्छा पुरा भउस्।”
37येसु फर्किकुन उसे ठाउयँ अइतेखना उसब्के निन्दाइराख्ल भेटिकेभइल। ओनेनेइ पत्रुसके कहिकेभइल, “सिमोन, किति तोइ निन्दाइ हाल्ल? किति तोइ एक घन्टा पुनु जग्लइ बोसिके नासकस्? 38जाँचयँ नापोरिके लागि तोहेसब जग्लइ रहिकुन पार्थाना करउ। आत्मा त साच्चिकइ तयार बाटइ, तर देहि कने कम्जोर बाटइ।”
39ओनेन् फेरि जाइकुन आघुहिँक कुरा दोहोरेइकुन उछिन्काइ पार्थाना करिके भइल। 40हसे फेरि फर्किकुन अइतेखना ओनेनेइ उसब्के निन्दाइरहल भेटिके भइल, किकेकने उसब्क आँखि निन्देइ बेस्के लठ्ठिल रहइ, र ओनेन्के किति जबाफ देइके पर्लाहार हखइ, उसे नइजेजान्ल।
41ओनेन् तेस्रा पल्ट चेलासब्कलघि आइकुन कहिकेभइल, “किति तोहेसब अझइ पुनु आरामसे निन्दाइ रहल बाटउ? आबे भइल, चाहुक् मानुसक छावाके पक्रिकुन पापिसब्क हाथयँ जिम्मा देलाहार बेला आइसक्ल। 42उठउ, आबे जाहुँ! चाहुक्, मेह्राके पक्राइदेलाहार मानुस नजिकइ बाटइ।”
येसुक पक्राउ
(मति २६:४७-५६; लुका २२:४७-५३; युहन्ना १८:३-११)
43येसु बोरातिन-बोरातिन बाह्र चेलासबमद्धे यहुदा कलाहार चेलासाहिन लउह्रि र तरबार बोक्लाहार भिड एक्कासि उछिका आइपुग्ल। उसब्के मुक्खे पुजेहेरिसब, धर्मगुरुसब र अगुवासबेइ पाठाल रहत। 44ओनेन्के धोखा देलाहार यहुदाइ उसब्के यस्न इसारा देल रहइ, “जोनो मानुसके मोइ चुम्तम, उहइ नइ येसु हखइ, उख्राके धरिकुन सुरछा देतिन् लेजउ।”
45हसे उसे सोझइ येसु भइल ठाउयँ जाइकुन, “हे रब्बि!” कहतिन् चुम्ल। 46उपाछु उसबेइ येसुके पक्रिकुन हाथयँ हथ्कडि लागाल। 47उछिका येसुक नजिकइ ठोडेलाहार मद्धे एक जेनाइ तरबार थुतिकुन सभइसे बड्क पुजेहेरिक नोकरके हान्तेखना उक्र कान च्वाट्टइ काटिल। 48र येसुइ ओनेन्सब्के कहिकेभइल, “किके तोहेसब मेह्राके डाकुके जस्नइ तरबार र लउह्रि बोकिकुन धरिके अइल बाटउ? 49सद्देहुन मोइ मन्दिरयँ सिखातेखना, मोइ तेउह्रसाहिन रहम तइपुनु मेह्राके नइजेधर्ल, तर धर्मक कितापयँ मेर बारेयँ लेखिल कुरा पुरा भइके लागि तोहेसब मेह्राके धरिके अइल बाटउ।”
50उपाछु सभइ चेलासबेइ ओनेन्के छाडिकुन भाग्ल।
51तर आफ्न नाङ्ट देहिके मलमलक लुगाइ बेहेर्ल एक जेना तन्धेरि ओनेन्क पाछु लाग्ल। हसे उसबेइ उसे तन्धेरिके धरिके खोज्ल, 52तर उहाइ लुगा छाडिकुन नाङ्टइ भाग्ल।
येसु बड्क सभाक आघु
(मति २६:५७-६८; लुका २२:५४-५५,६३-७१; युहन्ना १८:१२-१३-१४,१९-२४)
53हसे उसबेइ येसुके सभइसे बड्क पुजेहेरि भइल ठाउयँ लेज्ल, जुछि मुक्खे पुजेहेरिसब, अगुवासब र धर्मगुरुसब जम्मा भइल रहत। 54पत्रुसचाहिँ टाढोहिँसे ओनेन्क पाछु-पाछु लाग्थिन्, सभइसे बड्क पुजेहेरिक आङ्नाहिँ जइल, हसे पालेसबसाङ बोसिकुन आगि तापिके थाल्ल। 55उछिका मुक्खे पुजेहेरि र बड्क सभाक अरु सदस्सेइ येसुके मारिके लागि ओनेन्क बिरोधयँ पर्मान खोज्ल, तर केहाउ पुनु नइजे पाउल। 56ओनेन्क बिरोधयँ धेरइ जेनाइ झुठो गवाहि देल। तर उसब्क कुरा नइजेमिल्ल।
57उपाछु कोलोउ-कोलोउयेइ उठिकुन ओनेन्क बिरुद्धयँ यस्न कहतिन् झुठो गवाहि देल, 58“इहाइ यस्न कहल हामे सुन्ल, ‘मानुसक हाथेइ बानाल इसे मन्दिर भत्काइदेतम, हसे तिन दिनिहिँ मोइ बिना हाथेइ अर्क मन्दिर बानाइदेतम्।’” 59तर इसे कुराइ पुनु उसब्क गवाहि नइजे मिल्ल।
60उपाछु सभइसे बड्क पुजेहेरि माझयँ ठोडेइकुन येसुके पुछ्ल, “तोइ कहिके पोर्लाहार कुरा केहाउ नइजे? इसे मानुससबेइ तेर बिरोधयँ देल गवाहि किति हखइ?”
61तर केहाउ जबाफ नदेइकुन येसु चुप्लालि बोसिकेभइल, फेरि सभइसे बड्क पुजेहेरि ओनेन्के पुछ्ल, “किति तोइ परमधन्य परमेसोरक छावा ख्रिस्ट हखस?”
62येसुइ कहिकेभइल, “हँ, मोइ नइ हखम, हसे तोहेसब मानुसक छावाके सक्तिसालि परमेसोरक दाइने हाथपटि बोसिरहल र बाद्रिसाहिन सोर्गकमाटे आइरहल देख्ताहाउ।”
63इसे सुनिकुन सभइसे बड्क पुजेहेरिइ आफ्निक लुगा चेत्तिन कहल, “आबे हाम्राके अरु साछिसब किके चाहित र? 64इहाइ परमेसोरक अपमान कर्ल तोहेसब सुनिहाल्ल। आबे तेउह्रसब्क बिचार किति बाटइ?”
हसे उसबेइ इख्राके मारिके नइ पोरित कहल। 65उपाछु कोलोउ-कोलोउयेइ ओनेन्के थुथेतिन्, ओनेन्क मुहु ढाकिकुन ठोक्तिन् कहल, “तोइ अगमबक्ता हखस् कने, लु कहुक् त तेह्राके कोनेइ ठोक्ल?” हसे सिपाहिसबेइ ओनेन्क जिम्मा लेइकुन पिटिके थाल्ल।
पत्रुसेइ इन्कार कर्ल
(मति २६:६९-७५; लुका २२:५६-६२; युहन्ना १८:१५-१८,२५-२७)
66पत्रुस हेठ आङ्नाहिँ भइल बेलाके सभइसे बड्क पुजेहेरिक नोकर्निसब मद्धे एक्टि उछिका अइलि, 67हसे उहाइ पत्रुसके आगि तापिराख्ल देखिकुन राम्रसे चाहातिन् कहलि, “तोइ पुनु नासरतक येसुसाङ रहस्, नइजे से?”
68तर पत्रुसेइ इन्कार कर्तिन कहल, “नइजे, तोइ किति कहते बाटस्, मोइ न त जान्ल आटम् न त बुझ्ल बाटम्।” हसे उसे बाहारक मुल केवारिपटि जइल, र उहइ बेलायँ भाले बाज्ल।
69पत्रुसके केवारिपटि देख्लपाछु उसे नोकर्निइ ठोडेलाहारसब्के फेरि कहिके थाल्लि, “इसे पुनु उसब मद्धेक एक हखइ।” 70तर पत्रुसेइ फेरि इन्कार कर्ल।
एकछिनपाछु ठोडेलसबेइ पत्रुसके कहल, “साच्चिकइ, तोइ पुनु उसब मद्धेक एक जेना हखस्, किकेकने तोइ गालिलि हखस्।”
71तर पत्रुसेइ आफ्निके सराप्तिन किरिया खाइकुन कहल यदि मोइ फटाहा बोराते आटम् कने मोरिजाउ, “तोहेसब जोक्र बारेयँ कहतिन् बाटउ, मोइ उख्राके नाचिनम।”
72उपाछु ओख्निहिँ दोस्रा पल्ट भाले बाज्ल, हसे येसुइ पत्रुसके कहिकेभइल कुराके सम्झल, “दुइ चोटि भाले बाजिके कते आघु तोइ मेह्राके तिन पल्ट इन्कार कर्तस।” हसे पत्रुस धुरुधुरु रोउल।
Šiuo metu pasirinkta:
मर्कुस 14: DRY
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2024 (Active), Mother Tongue Translators Society and Wycliffe Bible Translators, Inc. All rights reserved.