Yôhan Nau ngơi nhhơ
Nau ngơi nhhơ
Nau Mhe Mhan Ueh tĭng nâm Yôhan nkoch mbơh Brah Yêsu jêng nâm bu Nau Ngơi N'ho Ro ma Brah Ndu, jêng Nơm hŏ jŭr deh ta neh ntu plăch jêng săk kon bunuyh jêh ri gŭ ta nklang phung he (1:14). Nau Mhe Mhan Ueh tĭng nâm Yôhan ngơi rah vah, ndrom samƀŭt aơ dơi nchih gay bunuyh rŏ gĭt rbăng pô aơ Brah Yêsu jêng Nơm Tâm Rklaih tĭng nâm nau ton, Kon Brah Ndu, jêh ri bơh nau chroh tâm Brah Yêsu gay ma khăn păng dơn nau rêh n'ho ro (20:31).
Jêh nau ngơi nhhơ gĭt nanê̆ Nau Ngơi ngăn jêng Brah Yêsu, gưl bôk ndrom samƀŭt Nau Mhe Mhan Ueh tĭng nâm Yôhan nkoch mbơh lĕ nau mbên khlay ngăn mpơl Brah Yêsu jêng Brah Tâm Rklaih tĭng nâm nau ton, Kon Brah Ndu. Tĭng groi pakơi lĕ nau aơ jêng lĕ nau rblang ma lĕ nau tâm mpơl bơh lĕ nau mbên khlay ngăn. Tâm ndrom samƀŭt aơ đŏng nkoch nau bu sĭt chroh jêh ri jêng phung oh mon Brah Yêsu, ta nây geh đŏng phung ƀaƀă tâm rdâng jêh ri mâu chroh ma Păng. Lĕ kô̆ 13 tât 17 nchih tay âk râk ngăn nau tâm gop dơh dăch ta nklang Brah Yêsu đah phung oh mon tâm măng bu nhŭp Brah Yêsu, jêh ri lĕ nau ntĭm nti, Brah Yêsu n'hao nuih n'hâm khân păng êlor bu pâng Păng ma kđĭn ta si tâm rkăng. Lĕ kô̆ nglĕ dŭt nkoch bri rah vah nau kan bu nhŭp Brah Yêsu, phat dôih, nau pâng kđĭn, nau dâk rêh tay, jêh ri lĕ tơ̆ Păng tâm mpơl lah jêh Păng dâk rêh tay.
Nkoch bri ma huê bu ur me văng tĭr, bu ban dôl păng ƀư tih (8:1-11) dơi dơm tâm nau nkrum yorlah âk nau rblang ơm jêh ri lĕ nau rblang ơm lơn chalơi nau nkoch bri aơ, tâm âk nau rblang ntơm saơm êng dơm păng ta âk ntŭk êng êng.
Nau Mhe Mhan Ueh tĭng nâm Yôhan ngơi ktang ma nau rêh n'ho ro tâm Brah Krist, jêng du ndơ aƀaơ rơm prăp ma mbu nơm dơn jêh ri chroh Brah Yêsu jêng trong, nau ngăn jêh ri nau rêh. Du nau khlay ngăn tâm ndrom samƀŭt Nau Mhe Mhan Ueh Yôhan jêng nau dŏng lĕ rup vay geh nau tâm ntĭt tâm nau rêh gay ngơi ma lĕ nau nanê̆ tâm nau rêh huêng tâm ban ma dak, ƀănh, nau ang, bunuyh rmăk biăp jêh ri biăp, tơm krăk ƀâu jêh ri play păng.
KÔ̆ DĂP
Kô̆ lor lơn (1:1-18)
Y-Yôhan-Ƀaptist jêh ri phung oh mon lor lơn ma Brah Yêsu (1:19-51)
Nau Brah Yêsu pah kan mpơl (2:1 – 12:50)
Lĕ nar nglĕ dŭt văch dăch jêh ri ta Yêrusalem (13:1 – 19:42)
Nau dâk rêh tay jêh ri lĕ nau Brah Yêsu tâm mpơl (20:1-31)
Kô̆ nglĕ dŭt: lĕ tơ̆ tâm mpơl ta Galilê (21:1-25)
Šiuo metu pasirinkta:
Yôhan Nau ngơi nhhơ: CMO2023
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023 United Bible Societies. All rights reserved.