Yôhan 11
11
Nau Y-Lasar dâk rêh tay
1Geh du huê bunuyh ji, amoh păng Y-Lasar, ƀon tơm ta ƀon Bêthani, jêng ƀon H'Mari jêh ri ruh păng H'Mathê.#Luk 10:38-39. 2H'Mari aơ jêng nơm tŏ dak ƀâu kah ma Brah Yêsu jêh ri jut jâng ma sŏk păng nơm; nâu păng nơm Y-Lasar dôl ji.#Yôh 12:3. 3Pôri, bar hê oh ruh păng đă bu hăn mbơh ma Brah Yêsu khân păng lah: “Hơi Kôranh, băl may rŏng dôl geh nau ji.” 4Ƀiălah dôl Brah Yêsu tăng nau nây Păng lah: “Nau ji nây mâu ir tât khĭt ôh, ƀiălah gay geh nau chrêk rmah ma Brah Ndu, gay ma Kon Brah Ndu geh nau tâm rnê yor nau nây.” 5Brah Yêsu rŏng ma H'Mathê, ma oh păng jêh ri ma Y-Lasar. 6Pôri, nôk tăng bu nkoch Y-Lasar ji, Brah Yêsu gŭ đŏng ta nây bar nar. 7Pakơi nây, Păng lah ma phung oh mon: “He plơ̆ sĭt hom ta n'gor Yuđa.” 8Phung oh mon lah: “Hơi Nơm Nti, phung Yuđa joi klŭp May ma lŭ, mâm ƀư may ŭch sĭt ta n'gor Yuđa nây?” 9Brah Yêsu plơ̆ lah: “Di lĕ geh jât ma bar mông tâm ăp nar? Tơlah mbu nơm hăn tâm nôk nar mâu chêh ôh, yorlah păng saơ nau ang tâm neh ntu aơ. 10Ƀiălah mbu nơm hăn măng păng chêh, yor mâu geh nau ang.” 11Jêh ngơi nau nây Brah Yêsu lŏ lah: “Y-Lasar, mĭt jiăng he, lĕ bê̆ch jêh, ƀiălah Gâp ŭch hăn rlay păng.” 12Phung oh mon lah: “Hơi Kôranh Brah, lah păng bê̆ch, păng mra bah yơh.” 13Brah Yêsu ŭch lah nau nây gay ma lah Y-Lasar lĕ khĭt, ƀiălah phung oh mon nđôn lah Păng ngơi ma nau bê̆ch ngăn. 14Pôri, Brah Yêsu lah đŏng ma khân păng: “Y-Lasar lĕ khĭt jêh. 15Ƀiălah yor ma khân may, Gâp geh nau maak yor mâu geh Gâp ta nây gay ma khân may chroh. Aƀaơ aơ, he hăn tât ta păng.” 16Yor nây, Y-Thômas bu moh Điđim,#11:16 Điđim: geh ntĭt jêng deh kon bar. lah ma phung oh mon êng: “He hăn hom ta nây gay ma khĭt ndrel ma Păng đŏng.”
17Lah tât ta ntŭk nây, Brah Yêsu saơ bu hŏ tâp Y-Lasar tâm môch hŏ jŏ puăn năng jêh. 18Ƀon Bêthani ngai đah ƀon Yêrusalem klăp lah pe kilômet,#11:18 Nrn: Jât ma prăm êchtađơ. 19yor ri geh âk phung Yuđa hăn bonh leng H'Mathê jêh ri H'Mari yor nâu khân păng lĕ khĭt. 20Lah H'Mathê tăng Brah Yêsu hŏ tât ta nây, păng hăn chuă Păng, ƀiălah H'Mari hôm gŭ tâm ngih. 21H'Mathê lah ma Brah Yêsu: “Hơi Kôranh Brah, lah geh May ta aơ, nâu gâp mâu khĭt ôh. 22Ƀiălah gâp gĭt, nđâp aƀaơ ri, moh ndơ Nơm Nti dăn ma Brah Ndu, Brah Ndu mra ăn ma Nơm Nti.” 23Brah Yêsu lah: “Nâu ay mra dâk rêh tay.” 24H'Mathê lah: “Gâp gĭt nâu gâp mra dâk rêh tay tâm nau dâk rêh tay ta nar nglĕ dŭt.” 25Brah Yêsu lah ma H'Mathê: “Gâp jêng nau dâk rêh tay jêh ri nau rêh. Mbu nơm chroh ma Gâp mra rêh, nđâp tơlah păng khĭt kđôi lĕ. 26Bi mbu nơm rêh, jêh ri chroh ma Gâp mâu mra mâp khĭt ôh. Ay chroh nau nây?” 27H'Mathê plơ̆ lah: “Hơi Kôranh Brah, gâp chroh ma May jêng Brah Krist, Kon Brah Ndu, Nơm văch tâm neh ntu aơ.”
28Jêh lah nau aơ, H'Mathê sĭt, hăn kuăl H'Mari oh păng ma nau ndâp jêh ri lah: “Nơm Nti tât ta aơ jêh, Păng kuăl ay.” 29Lah H'Mari tăng nau nây păng dâk ro hăn ta Brah Yêsu. 30Nôk nây, Brah Yêsu ê hŏ lăp ôh tâm ƀon, Păng hôm gŭ ta ntŭk H'Mathê tâm mâp nây. 31Nôk phung Yuđa gŭ tâm ngih nây ndrel ma H'Mari, gay bonh leng păng, khân păng saơ păng ndil ndal dâk hăn luh, pôri khân păng hăn tĭng ro, yor nđôn lah păng hăn nhĭm ma nâu păng ta môch. 32Lah H'Mari tât ta ntŭk Brah Yêsu gŭ, păng saơ Brah Yêsu, păng chon mon ta jâng jêh ri lah “Hơi Kôranh Brah, lah May ta aơ nâu gâp mâu khĭt ôh.” 33Brah Yêsu saơ H'Mari nhĭm, jêh ri phung Yuđa hăn ndrel ma păng nhĭm tâm ban lĕ, Păng rngot tâm nuih n'hâm jêh ri ôp: “Mbah ntŭk khân ay tâp păng?” 34Khân păng lah: “Hơi Kôranh Brah, dăn May hăn uănh.” 35Brah Yêsu nhĭm. 36Yor ri, phung Yuđa lah: “Uănh ri, păng rŏng hâu ngăn ma Y-Lasar!” 37Ƀiălah ƀaƀă bunuyh tâm phung khân păng lah: “Păng nây hŏ pơk măt ma bunuyh chieh, mâm dĭng Păng mâu dơi ƀư ma bunuyh aơ mâu ăn khĭt?”
38Brah Yêsu rngot đŏng tâm nuih n'hâm, hăn tât ta môch ro. Nây jêng du mlâm trôm bu rdâl ma lŭ toyh. 39Brah Yêsu lah: “Rlă lơi lŭ toyh aơ.” H'Mathê, oh bu ur bunuyh khĭt, lah: “Hơi Kôranh Brah, păng lĕ ƀâu ôm jêh, yorlah păng bê̆ch ta aơ hŏ puăn nar jêh.” 40Brah Yêsu lŏ lah: “Gâp mâu hŏ mâp lah ma ay hĕ, lah ay chroh mra saơ nau chrêk rmah Brah Ndu?” 41Pôri, khân păng rlă lơi lŭ toyh nây. Brah Yêsu n'gơr măt ta klơ jêh ri lah: “Ơ Mbơ̆, Gâp tâm rnê ma May, yorlah May hŏ dơn nau Gâp. 42Gâp gĭt lĕ Mbơ̆ dơn nau Gâp ƀaƀơ, ƀiălah Gâp lah nau aơ yorlah geh âk ngăn bunuyh gŭ jŭm ta aơ, gay ma khân păng chroh ma Mbơ̆ hŏ njuăl Gâp văch.” 43Jêh lah nau nây, Brah Yêsu kuăl huy: “Ơ Y-Lasar, luh hom!” 44Bunuyh khĭt hăn luh, jâng ti hôm kât ma bok njor, muh măt nkŭm ma bok. Brah Yêsu lah ma khân păng: “Sâm doh ma păng, jêh ri ăn păng hăn.”
45Âk phung Yuđa hăn chop khâl H'Mari, saơ nau Brah Yêsu ƀư, khân păng chroh ma Păng. 46Ƀiălah geh ƀaƀă bunuyh tâm phung nây hăn văch ta phung Pharisi, nkoch bri ma khân păng lĕ nau Brah Yêsu ƀư nây.
Nau tâm nchră gay tâm rdâng đah Brah Yêsu
47Yor ri, phung Kôranh ƀư brah toyh jêh ri phung Pharisi rgum Mpôl Kôranh Phat Dôih, jêh ri lah pô aơ: “Mâm he mra ƀư? Bunuyh nây ƀư âk ir nau mbên khlay. 48Lah he ăn păng ƀư tay tâm ban pônây, pôri lĕ rngôch bunuyh mra chroh ma păng, jêh nây phung Rôm mra văch lơh pit in ntŭk nây nđâp ma bri dak he.” 49Ƀiălah geh du huê bunuyh tâm phung khân păng jêng Y-Kaipe, kôranh ƀư brah toyh lơn tâm năm nây, lah ma khân păng: “Khân may mâu gĭt rbăng du ntil nau ôh! 50Khân may mâu gĭt vâl pô aơ, ueh lơn du huê bunuyh khĭt ntrok an ma phung ƀon lan, đah nau ƀư rai tât ma lĕ phung ƀon lan.” 51Nau ngơi nây mâu geh tă bơh păng, ƀiălah păng jêng kôranh ƀư brah toyh lơn tâm năm nây, păng mbơh lor ma nau Brah Yêsu mra khĭt ăn ma lĕ phung ƀon lan, 52mâu di knŏng ma phung ƀon lan nây dơm, ƀiălah gay rgum lĕ phung kon sau Brah Ndu hŏ chah rai pru pra jêng tay du mpôl. 53Ntơm bơh nar nây, khân păng tâm chră gay nkhĭt Păng.
54Yor nây, Brah Yêsu mâu hăn mpơl ôh ma phung Yuđa, ƀiălah Păng hăn tâm n'gor dăch bri rdah, tât du ƀon toyh kuăl jêng ƀon Êphraim jêh ri gŭ ndrel ma phung oh mon ta nây. 55Rƀŭn Nau Găn phung Yuđa dăch jêh, âk ngăn bunuyh tă bơh n'gor bri nây hăn ta ƀon Yêrusalem gay ma ƀư kloh êlor năng rƀŭn. 56Nôk nây, khân păng joi Brah Yêsu jêh ri gŭ dâk tâm ôp ndrăng khân păng tâm ngih brah: “Mâm nau khân may mĭn? Păng mâu mra văch râng nau rƀŭn?” 57Phung kôranh ƀư brah toyh jêh ri phung Pharisi ntăm jêh: tơlah mbu nơm gĭt ntŭk Brah Yêsu gŭ, ăn păng mbơh ma bu gĭt, gay khân păng nhŭp Păng.
Šiuo metu pasirinkta:
Yôhan 11: CMO2023
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023 United Bible Societies. All rights reserved.