Fịrị Ḅara 7
7
Sitivin Ẹ́gẹ́rẹ́
14
4Opu igwagwaḅọ ma warị Sitivin gbíla, <<Mịná owiapụ pa i sịbị sẹ nyẹ ma karakárányẹ?>> 2Sitivin pághám, <<Mịnaapụ na daapụ na, ọmịnị i pughuu! Ḅẹẹ, ipine Nyáná Tamuno ọ ḅụ pa Ebraham wámịna tádóḅọ diem, ọ pa Mesopotamiya ḅụ ngáarị sáá, na ọ pa Haran mugha sáá. 3Warị ọ ḅẹẹ, <Ị wárị wárịso, pịghị ị́yẹ́ ama wáriso sị a pa ị die bẹ angaá ma muu.>
4<<Anịgo, ọ warị ori ama Kaldiya wárịso sị muu Haran ḅụ ngaam. Ebraham daa ḅo fịị sa, Tamuno warị ọ mịẹsị o nwángị ḅo mị́sa ọmịnị ngaa ama ma ḅụ kóró. 5Anịsáa ma ḅụ Tamuno gbẹ́rẹ́ kálá kiri mpara sọ na pa Ebraham pịrịgha, ọ ḅụọ kuu la kịrị sọ nyanagha, kụ́ma Tamuno mininim ḅẹẹ ọ pa ọ pịrịbẹm, ḅẹẹ anị fịnị ori na o furobie págháḅoapụ pịrịbẹm. Tamuno mịma minini sáá Ebraham na awọ nyanagha. 6Mịma anị Tamuno dugho ọ pịrịnyẹ: <Ị furobie págháḅoapụ mú jẹ́ ámá ngáabẹm, nnị omoni sọ́bẹm, nnị pịghị kụ́rá ndẹ́ẹ pa si ḅara pa nnị na ngáabẹm. 7Kụ́ma a ḅẹ́rẹ́kọ ọmịnị omoni sọ pịrịapụ ma sịbị ọ́gọ́nọ gbánabẹm, anịsáa ma ḅọ́rọ́maẹrẹ ị furobie págháḅo awọ ma susi i pịrịbẹm mịnga ma ḅụ.> 8Tamuno warị saghị Ebraham ḅarabie sua tọ́ngọ pẹ́lẹ́ mịẹmịẹnyẹ ma ḅẹẹ anịị nnị pa ọḅọọ ma ilíghíma suabẹnyẹ. Ebraham warị Aizik tọ́ngọ pẹ́lẹ́ ori inine a dii láa sáá. Aizik ọ tụwọ Jekọpụ tọ́ngọ̄ pẹ́lẹm. Jekọpụ ẹ́rẹ́so ḅa ḅọ, wámịna fúroawọ ḅụ ori oyi mmẹẹ́ findi awọ tọ́ngọ pẹ́lẹ́m.
9<<Jekọpụ owiapụ awọ warị ḅo tọ́rụ́akụ nyána nna mị́naḅọ owitụ́wọ Josẹf pịrị, warị anị ḅụ ḅọ́rọ́ ọ pa omoni dẹrị Ijipiti ḅụ. Kụ́ma Tamuno ọ nana imi 10warị ọ dụaḅọ́rọ́ma ori ḅụḅáláḅálá mamgba ḅụ. Josẹf Ijipiti ámányánáḅọ tórúku sẹ sáá, Tamuno tọ́rụ́kụrụkụ́rụ́ na ori níminyẹ ọ ḅụ imii, Ámányánáḅọ ma warị ọ pa Ḅẹ́rẹ́tọ́ḅọ mịẹ sẹ ma ḅụ na pịghị ámányánáḅọ warị mamgba ḅụ.
11<<Anị sáá ma ḅụ ḅuruḅa ḅo ḅom Ijipiti na Kenaan ḅụ sị opu tọ́rụ́siarị dighinyẹ, wámịna tádọ́apụ fị́nyẹ dọ́ghụm kụ́ma ine fị́nyẹ arịḅogha, 12Jekọpụ náa sáá ḅẹẹ n fị́nyẹ dẹrịarị Ijipiti ḅụ, ori ọrẹ awọ wámịna tádọ́apụ fịrịmam, nna parị muunyẹ anị ngaa. 13Nna mmẹẹ́ kárámá sáá Josẹf ọ ḅụ pa ori a mịnaapụ diem Ijipiti ámányánáḅọ warị ḅo Josẹf wárịapụ nimi. 14Josẹf warị oku pa ọ daa Jekọpụ fịrịmaa ḅẹẹ ori na ọ warị gbọrụ túminị́ tẹ́si oyi findi na sọ́nọ́ ḅẹẹ nnị kị́nị́mamgba Ijipiti ḅoo. 15Jekọpụ Ijipiti múm ori na ori awọ fịnị fịị angaá. 16Nnị nna dua dighiákịm sị anị dipi Sikem ḅụ Ebraham igbii pa fẹ dupu Hamo ḅụ.
17<<Sáá ḅo kikia sáá ḅẹ́ Tamuno o minini Ebraham pịrị minini nyẹ ma mịẹ, wámịna kịẹbịpị opuma duḅamam Ijipiti ḅụ. 18Ọ ḅụkụnọma, Josẹf nimigha ámányánáḅọ saghị taám Ijipiti ḅụ. 19Ori oḅori pa wámịna tádọ́apụ sim, pịghị nnị pa tọ́rụ́siarịma, ọ pịghị mịẹm nnị nna ịwọma yii awọ dighi tọ́rụ́si nụ́ngọbie sị awọ ma anị ḅụ ḅọ́rọ́ fịị.
20<<Mị́sa ma, anịị nnị Mosis yii sáá, opuma ibi tụ́wọ, tẹ́rẹ́ akalụ́ anịị nnị ọ pa wárị wárii sị ọ didighi nyẹ. 21Nnị mịẹsị nnị nụ́ngọbie ọ wáriso sáá, ámányánáḅọ ndụ́ḅa obi ḅo yiim, a tụ́wọ ḅara. 22Nnị ibiḅaa dáwọnyẹ pa ọ dáwọ́mam Ijipiti ḅụ ori ọ́ kụrọ tumḅọ, pịghị ibi ẹ́gẹ́rẹ́ pụghọ nyáná.
23<<Ọ kụ́rá mmẹẹ́ si la sa, o ḅẹm ḅẹ́ o mú ọ jẹa Izirẹlịawọ fịnị angaá muu. 24O ḅo gbẹ́rẹ́ḅọ arịm Ijipiti ḅo mbasiarịḅo, ọ warị sọmamụ sughubi sị Ijipiti owitụ́wọ ma fom ḅa. 25(O sim ḅẹẹ ori a túminị́ akanyaḅobẹm ḅẹẹ Tamuno ọ pa omoni ḅarabie nnị duaḅọ́rọ́mabẹm, kụ́ma nnị akanyaḅogha.) 26Ene ḅá, o ḅo mmẹẹ́ Izirẹlịawọ arịm owusọarị ọ warị ḅoo nnị ọlọ, diin mịẹ ḅụ, ḅẹẹ, <O pughu, ọmịnị mmẹapụ kọkọ Izirẹlịawọ, o tẹ́ go mị ḅara pa owusọarị?>
27<<Kuma o jẹa ḅo pụ́nụ́maarịḅọ ma Mosis suma ngaa pịrịm ḅẹẹ, <Tụ́ọ ị pa wa táarịḅọ na wámịna ḅẹ́rẹ́kọḅọ mịẹ?> Ọ warị o gbíla 28Ị́ i ḅá dọghụ, ị Ijipitiḅọ ma ḅá ḅara ma biaéné? 29Mosis mịma náa sa, anịị o mangị so nyẹ Ijipiti ḅụ sị mú Midiyan ama ḅụ angaá, anị angaá anị ori ọrẹ mmẹẹ́ owiapuawọ yii nyẹ.
30<<Kụ́rá amẹẹ sị ḅo ḅọ́rọ́ sa, gbẹ́rẹ́ sookumuḅọ ọ ḅụ pa Mosis die dọghụarị piri kọ́rịfịnịbie elesiri ḅụ Sainai tụ́ndụ́ na kikia ngaa. 31Mosis árịnyẹ ma ọ ḅụ́gbérépumam, ọ warị kikia mú sị ibima anị dighi, kụ́ma Kị́nị́nyánáḅọ pụghọ anịị o náanyẹ. 32Irị anịị ị́yẹ́ tádọ́apụ tẹ́ghẹ̄ Tamuno ma, Ebraham, Aizik na Jekọpụ. Ḅáláfa Mosis oju sẹ́ghimam sị ori ine tọ́rụ́ saghị dighigha.
33<<Kị́nị́nyánáḅọ warị ọ ḅẹẹ, <Ị́yẹ́ agbaa ma sii, ḅẹẹ i sẹ́fịnị angaá ma anịị tọ́ntọ́ kiri. 34A dighimam pịghị árị nnị iyẹa túminị́ pa árịarị mbasị tọ́rụ́siarịma. A nna kụ́rọ owu pụghọ naamam a kóróḅomam ḅẹẹ a n dụaḅọ́rọ́ma. Mị́sa ḅoo, a sima ị pa Ijipiti fịrịmabẹm.>
35<<Mịị anịị Izirẹlịawọ sịghị gbẹ́rẹ́ Mosis ma, nnị o gbíla sa ḅẹẹ, <Tụọ ị pa sẹ́ táaḅọ na ḅẹ́rẹ́kọḅọ mịẹ wa pịrị?> Ori anịị Tamuno fịrịma sẹ́ táaḅọ pịghị dụaḅọ́rọ́maḅọ, ọ ḅụ pa o die sookumuḅọ ma ḅárásua ḅụ ḅọ́rọ́, dọghụarị piri ma bie. 36O túminị́ ma táa pághámaḅom ọ ḅụ́gbérépuma na tọ́rụ́ nẹ́ngịma fịrịnwangị sáá, Ijipiti bie na pịghị Áwụ Tọ́rụ́#7.36 Mịma anịị Ányị́nyá Tọ́rụ́, ịrụa ányị́nyá ma ḅụ bia kórómaẹrẹ, anị mịẹm tọ́rụ́ saghị áwụ bia. ma ḅụ na pighi elesiri ma ḅụ kụ́rá a mmẹẹ́ si pa.
37<<Mosis anị dugho Izirẹlịapụ ma pịrịḅọ ḅẹẹ, <Tamuno gbẹ́rẹ́ ikiakoroḅọ pa ọ fịrịmabẹm, ori i fịrịma ḅara, ọmịna ama gbẹ́rẹ́ḅọ.> 38Ori anịị Izirẹlịapụ elesiri ma ḅụ fịnịapụ ma na fịnịḅọ, ori anịị wámịna tádọ́apụ ma na fịnịḅọ na pịghị ẹ́gẹ́rẹ́ ọ pịrị sookumuḅọ ma na Sainai tụ́ndụ́ ọgọnọ o Tamuno ḅara dumafịnị ọkụ́ ma daaḅom sị ḅọ́rọ́ma wa pịrị.
39<<Kuma wámịna tádọ́apụ mini Mosis bịpị puughugha; nnị o suma ngaa pịrịm, biiarị ḅẹẹ nnị ine pịghịma Ijipiti mú. 40Nnị warị Erọn ḅẹ, <Ḅara pa ine ẹ́gẹ́rẹ́bịgha tamuno tẹ́mẹ́ wa pịrị, tórúku so wa pịrịbẹnyẹ, wa nimigha, Ijipiti wa pághámaḅo Mosis ma ọ ḅụ pághámaa nyẹ.> 41Nnị warị gbẹ́rẹ́ ine ẹ́gẹ́rẹ́bịgha obiri kịkanyẹ tẹ́mẹ́, warị igwagwaá anị pịrị, warị fị na ḅuu nyána nnị ḅara na tẹ́mẹ́nyẹ ma pịrị. 42Anịgo Tamuno n dighi tọ́rụ́sim, warị n saghị pa pịrị sị nnị saghị sobie fịnị ḅálōló ma tẹ́ghẹ̄, n gịẹ kóróma ḅara ikiakoroapụ ma diri ḅẹẹ:
<< <Izirẹlịapụ, Irịgha, ọ nama ḅá igwagwaá pịrịḅọ
kụ́rá mmẹẹ́ si elesiri ḅụ.
43Tụ́ma ọ Moleki tẹ́ghẹ̄arị wárị ma
anịị o dighiákị nyẹ,
ọ pịghị ọmịna tamuno Refan dighiákịm,
mịnanyẹ ma anịị,
ọmịnị ḅara pa tẹ́mẹ́ si tẹ́ghẹ̄arị nyẹ,
Anịgo a o deesi Babịlọn ḅọ́rọ́ ngaa mubẹm.>
44<<Diearị warị ma ḅẹẹ, Tamuno nnị na imi, wámịna tádọ́apụ ma anị nyanam, nnị anị namam Tamuno dugho Mosis pịrị ḅara ḅẹẹ ori anị nama, anị fịnị sị n pa Mosis die ḅara. 45Ọḅụkụ́nọma, wámịna tádọ́apụ warị ma daakịapụ ma nna daapụ ḅara, anị dighiákịm nnị Jọsụwa na mú sị mú kiri ma akị Tamuno deesi amaapụ ma ḅara. Anị pịghị anị angaá fịnị warịị ḅo Deviti sáá laam. 46Ori Tamuno tọ́rụ́kụrụkụ́rụ́ nyánaḅom, warị Tamuno bii ḅẹẹ ori ọ wáriso si ọ wárị nama Jekọpụ Tamuno pịrị. 47Kuma Solomọn, anị ḅo wárị nama ọ pịrịḅọ.
48<<Kụ́ma Sóghólóḅa ḅọ ma túminị́ ḅara pa nama wárị ḅụ ngaa ngaagha, ikiakoroapụ ma dugho ḅara.
49<<Kị́nị́nyánáḅọ ḅẹm, <So anị ị́yẹ́ imine,
kiri anịị ị́yẹ́ ḅụọ gbánā yọ.
Ọ tọ́rọ fịnị wárị nama i pịrịbẹ?
50Ịrị i ḅara na mịnanyẹ mamgba tẹ́mẹ́gha?>
51<<Dighi nị ọmịna sịbịkụ́rọ la ḅara!>> Sitivin pa dugho tórúku muarị, <<Tamuno nímighaapụ Tẹ́mẹ́ fịnị ḅara anịị ọmịna tẹ́mẹ́ fịnị ḅara, ọmịna biri pụụ Tamun fịrịma oku ma pịrị ḅara! Ọmịna tádọ́apụ fịnị ḅara anị ọ fịnị ḅara ọ mịnị Tọ́ntọ́ Tẹ́mẹ́ ma puughugha. 52Gbẹ́rẹ́ ikiakoroḅọ sọ ofori, ọmịna tádọ́apụ n tọ́rụ́ pa, siiarịmagha ḅọ. Nnị Tamuno oku muapụ gbolomanyẹ dugho pághámaḅo. Mị́sa ọmịnị ọ dẹ́rịfịmam pighi ọ timiḅamam. 53Ọmịnị anịị sookumuapụ saghị kóróma Tamuno ólóghó ma dakórómaapụ, anị sọ, ọ pa mịnị anị osigha.>>
Nnị Sitivin Gbiḅa Ḅara
54Ámáḅẹ́rẹ́dugho ogboapụ ma Sitivin pughuarị ḅara, ori ẹ́gẹ́rẹ́ ma ḅo opuma nna igánimam muu nna tẹ́mẹ́bie la si nnị aka túrú ọ pịrịm. 55Kụ́ma, Sitivin Tamuno Tọ́ntọ́ Tẹ́mẹ́ ḅụ biiḅọ tọ́rụ saghị so dighim sị Tamun ipine ma arịị, sị Jizọs árị ọ sẹ angaá Tamuno amaḅara ngá. 56Ọ warị ḅẹẹ, <<O dighii! A findi so arịm, a pịghị Tumḅọ yii Tụwọ ma arịm sẹ́fịnịarị angaá Tamun ámáḅara ngaa.>> 57Opu owu pụghọ pa, ámáḅẹ́rẹ́tọ ogboapụ ma ḅara pa nna biripụ́ma sị ilúghum, nnị kị́nị́mamgba anị gbẹ́rẹ́kiri mangị ọ ḅụ korom. 58Nnị warị o suma ámá ma bie págháma, warị mgbọ́lụ pa o gbii, onyésẹapụ ma warị ọgọnọ nnị suabịtẹ pa Sọl pa sị gbẹ́rẹ́ owitụ́wọ ḅárásua. 59Nnị pa mgbọ́lụ ma pa o gbiarị sáá, Sitivin tẹ́ghẹ̄m sị ḅẹẹ, <<Inyanaḅọ Jizọs i tẹmẹ daákịị.>> 60Ọ warị ẹkpẹrẹkị sị pụghọ saghị owu ḅẹẹ, <<Kị́nị́nyánáḅọ mị siiamịẹnyẹ ma pa nna sịbị sẹ ma.>> Ọ mịma dughofamam sị fịị.
Šiuo metu pasirinkta:
Fịrị Ḅara 7: IBY
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2024 Luke Initiative for Scripture Translation