Mateghusi 2
2
Mudhingwero wawafumu hokudiva
1Jesusi gha pwire kushamurukera muBetelehema muJudeya, mumayuwa ghafumu Herodesi. Munyima dhomushamurukero wendi, ko kukuma muJerusalema awa ha monine ditungwedhi muDiva, 2no hepurire eshi: “Kupi nga mu shamurukera fumu waWajuda? Yoyishi nga tu mono ditungwedhi dyendi, yo tu n̂eyera na tu mu kanderere.”
3Apa gha yi yuvire fumu Herodesi nawakaJerusalema waheya, ha tutukwire thikuma. 4Ko kukongwedha kwendi hapristeri hohakuru nawakamarukwaro hodiko gha wepure eshi, kupi mbo ha mu shamurukera Kristusi. 5Ha mu hutha kwawo eshi: “MuBetelehema muJudeya, yoyishi kemo ya pwire kutjanga kwamuporofeta eshi:
6‘Owe Betelehema, ghoditunga dyaJuda,
kadi ghomumbiru
pakatji kawaraghuri waJuda.
Yoyishi mumoye mo mbo gha shwagha mukamiti
oyu mbo gha kara mudithi ghodiko dyange dyaIsragheli.’ ”
7Munyima Herodesi ghethire hamoni hoditungwedhi mughudhindo no kuwepura eshi, muthivaka munye dya hokokire ditungwedhi. 8Ha wa tumu kuBetelehema noman̂ando eshi: “Mu yende mu ka mu shane thiwana mwanuke, ene ngeshi mu ka mu wane, ho mwa kuna yi ni dimukithe. Name ho na kukone kuyenda ni ka mu kanderere.”
9Pakumana kuyuva yafumu, ko kufunguruka kwawo ene mumone, ditungwedhi di ha monine, dya wa twarire kate kashishama pandhugho dhi gha karire mwanuke. 10Apa ha monine ditungwedhi ha shambererire thikuma. 11Ko kwingena kwawo mundhugho no ha wanine mwanuke naMaria ghonyina, gho ha tongamenine no kumukanderera. Ha rongorora yikutu yawo no ha mu kundire noghushwi ghuno. Mangondo, ghungongorwa nomira.
12Yoyishi Nyambi gha wa shingire muyirota eshi mbadi ha kona kuhuka kwaHerodesi, ko kuhuka kwawo nondhira dhadhonadho kuditunga dyawo.
Matjirero ghokuEgiptena
13Pakuhuka kwawo, gha hokokire muengeli waFumu kwaJosefu muyirota ghuninga eshi: “Pinduke no ghu tumbure Mwanuke naNyina ghu tjirere kuEgiptena no ghu ka kare koko kate mbo ni kutongwere. Yoyishi Herodesi ghana kara nodighano dyokushana mwanuke no gha mu paghe.”
14Ha pinduka Josefu mughuthiku ghogho no gha shimbire mwanuke nanyina no ha yendire kuEgiptena. 15Ko gha ka karire kate kufa Herodesi eshi, yi rikanye eyi gha ghambire Fumu pamuporofeta eshi:
“MuEgiptena mo netha Mwanange.”
Mapaghero ghawanuke
16Apa gha dimukire Herodesi eshi, hamoni hoditungwedhi ne hana mwangera, ko kufudhakana kwendi noghupata. Ko kutuma kwendi hamashorondate muBetelehema nomumukunda ghoghuhe, ha ka paghe harumeghana homyaka dhiwadi nawambiru‐mbiru thika di gha yuvire pakwipura hamoni hoditungwedhi.
17Kemo dha rikanyine n̂ando edhi gha ghambire muporofeta Jeremiya eshi:
18“Diywi hana kuyuva muRama
madiro nothingwedhima thothikuru,
Rageli ghana kutokotera hanendi
no mbadi ghana kushana mahengawero,
yoyishi hana pu keho.”
Mahukero ghokuEgiptena
19Munyima dhokufa kwaHerodesi, ko kuhokoka muengeli waFumu muEgiptena kwaJosefu muyirota, 20no gha ningire eshi: “Pinduke no shimbe mwanuke nanyina no ghu huke kuditunga dyaIsragheli, yoyishi hanu wa ha shanine moyo wamwanuke ne hafa keho.”
21Ko kupinduka kwendi no gha shimbire mwanuke nanyina ha huke kuditunga dyaIsragheli. 22Apa gha yuvire eshi Argelaghusi ne mupanguri mudyango dyawihe Herodesi, gha yapire kuyenda ko. Ene pa gha mu rawerire Nyambi muyirota, ko kuyenda kwendi kuthiko thaGalileya. 23Ha ka kuma ko no gha ka tungire mudighumbo dyodina dyoNasareti. Eshi yi rikanye kemo eyi gha ghambire muporofeta ngeno: Mbo hana mutoyo eshi Mukanasareti.
Šiuo metu pasirinkta:
Mateghusi 2: MHW1986
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Mbunga dhoBayibili dhaNamibia (Bible Society of Namibia) 1986