Lukasi 24
24
Muvumbukero waJesusi
(Mat 28:1–10; Mark 16:1–8; Joh 20:1–10)
1Murughura pamathiku‐thiku muShundaha, ko kwimana hakamadi ha yende kumbira nothende oyu ha kurongererire. 2Ha ka wanine diwe dyokuthero dhombira ne dina pu kugharumuna ko. 3No apa hengenine mo, mbadi ha wanine mo yirama yaFumu Jesusi. 4Awo mbadi ha dimukire eyi sha ghayare, kapupi ko kumona kwawo harume hawadi ha nemana noyivata yokurwedhima. 5Po ha yaperire thikuma, no ha fumberire marupara ghawo kate pamuve. Harume wa ha wa tongwerire eshi: “Nye muna kushanena muyumi mwawafu? 6Mbadimo muno, ghana vumbuka mwawafu mu ghayare vene eshi, nye gha ghambire nenu apa gha karire muGalileya. 7Gha ningire eshi: ‘Mwanamunu ghana kupwa kuyandja munyara dhawaringi‐ringi, ha mu pamarere. Ene, mudiyuwa dyoghuhatu mbo ghana vumbuka.’ ”
8Nawo ha vurukire n̂ando dhendi, 9no ha shwaghire kumbira ha ka thimwetwedhe yoyiheya kwawashadikumi noyofotji no kwawamweya. 10Hakamadi wa ne haMaria Magdalena naJohanna naMaria, ghonyina Jakobusi. No hakamadi hamweya nawo ha ka tongorire yinu yofotji kwawapostoli. 11Ene yithimwetwedha yi, ya karire kukwawo yira yitongora vene no mbadi ha tawire kwawakamadi. 12Ko kwimana Petrusi gha dhondoke kumbira. Apa gha kokokire mo, ha mono kwendi mahina vene. Ho gha tetukire thikuma no gha hukire kudighumbo.
Mwingeneno ghomuEmaghusi
13Mudiyuwa dyodyo, ko kukara hawadi mundhira ha yende kuEmaghusi, dighumbo dyomuhanyamo ghomakilometeri dikumi nomawadi pepi naJerusalema. 14Awo ha karire mundhira ghukuvureka yoyinu yi ya hokokire. 15Oku shime ha karera mukukuvureka no kuthinganyeka‐thinganyeka mahimeno ghawo, ko kuwakokerera Jesusi thinda, no gha yendire pofotji nawo. 16Ene meho ghawo mbadi gha tjinunine kumudimuka. 17Ho gha wepurire eshi: “Yinye yi muna kudhegheterera no kuyenda ghukuvureka?” Awo ne ko kwimana nomarupara ghotoko‐toko. 18Yofotji ghopapawo ghodina dyoKleghofasi gha mu huthire eshi: “Yowe pithoye ghomugenda muJerusalema, ghokudhira kudimuka eyi nga yi hokoka mumayuwa ghaya ghana tundu ko ndi?”
19Ko kuwepura kwendi eshi: “Yinu munye?” Awo ha mu huthire eshi: “Yinu yokwaJesusi ghomukaNasareti, muporofeta ghongcamu muman̂ando nomuyitenda kughutho waNyambi nawanu. 20Oyu ha yandjire hapristeri wetu hohakuru nawakamuragho wawo, pakumutetera ndhango dhokufa no kumupamarera kuthikurushe. 21Atwe twa kuruperire eshi, aye ne yomukakukomonona Haisiragheli. Ene yoyiheya yi, dyarero ne dyodiyuwa dyoghuhatu kutunda pa ya hokokire yinu yi. 22Karo hakamadi hamweya hopapetu, hana tu tokotitha. Yoyishi murughura hana yendi kumbira, 23ene mbadi hana ka wana mo mwimba. Apa hana ka tunda ko, hana na tu tongwera eshi, haengeli hana wa hokokera, wo hana wa tongwera eshi muyumi. 24Hamweya hopapetu nawo ko hana yendi kumbira, no hana tu tongwera thika di hana ghamba hakamadi, Aye ne mbadi hana ka mu mona mo.”
25Aye ha wa tongwera eshi: “Mwathuta mwe no mwakadirombwatjima! Mbadi muna kutawa yoyihe eyi ha tongorire haporofeta ndi? 26Kristusi ne kadi wa kunyanda muyinu yi, ndani po mbo ghengena muthishe thendi ndi?” 27Munyima gha tangire kuwatjwathanitha kutunderera kwaMosesi, nawaporofeta noyitjanga yoyiheya kuyinu yokuhata kukwendi.
28Apa ha kokerire kudighumbo di ha tambire, aye gha yendire yira wa kupiterera. 29Awo ne ko kumuthineneka ghuninga eshi: “Kare kukwetu, yoyishi tamba runguro nodiyuwa ne dina tokera.” Naye gha tawire no ghengenine gha ka kare nawo. 30Pakukara nawo kuthidyero, gha tumburire ghuroto no gha tumerire, gha ghu yondorire no gha ghu wa taperire. 31Popo, ko kuvishuka meho ghawo no ha mu dimukire. Aye ne ko kudhongonoko kumarupara ghawo. 32Ha ghambathana kwawo eshi: “Mbadi dhina yumbaghuka mitjima dhetu apa tuna ghambaghura nendi mundhira, no apa ghana tu tjwathanitha yitjanga ndi?”
33Ko kufunguruka kwawo wangu popo ha huke kuJerusalema. Ko ha ka wanine hashadikumi noyofotji nawamweya pofotji. 34Awa ha ka wa tongwerire eshi: “Yashemwa Fumu ne nga vumbuka no nga kuhokora kwaSimoni.”
35Nawo ko kuwatongwera eyi ha monine mundhira, no ngepi di gha kudimukuthire kukwawo pakuyondora ghuroto.
Muhokokero waJesusi kwawakathishongero
(Mat 28:16–20; Mark 16:14–18; Joh 20:19–23; Yitenda 1:6–8)
36Oku shime ha karera mukughambaghura yinu yi, ko kwimana Jesusi mukatji kawo, no gha ningire kukwawo eshi: “Thiraro thi kare nenu!”
37Awo ha tutukwire no ha yapire thikuma, gho ha ghayarire eshi, thirumba hana kumona. 38Ha wa tongwera eshi: “Nye muna kwomapera kemo, no nye dhina kutamangerera mitjima dhenu? 39Mu mone mumakandeke ghange nomumapadhi ghange, yoYame nothinda yu. Mu ni kwate no mu mone. Yoyishi thirumba mbadi tha kara noyipo noyishokora, thika kenge di muna kunimona Me.”
40Oku shime gha karera mukughamba kemo, ko kuwaneghedha makandeke ghendi nomapadhi ghendi. 41Ene muyishamberera yawo nomuyitetuka, mbadi ha konine kutawa shime. Aye ha wa tongwera eshi: “Ko thi di kukwenu thokudya ndi?” 42Ko kumupa kwawo kathi kokupona. 43Naye gha tumburire no gha dire kuthitunumeho thawo.
44Popo ko kuwatongwera eshi: “Ethi ne thothidimukitho thoman̂ando agha na mu tongwerire apa na karire nenu. Eshi yoyihe yi pwe kuyaritha, eyi ha tjangire kukwange mumuragho waMosesi nawaporofeta nomumipisalemi.”
45Ko kuvishura maghano ghawo eshi ha kone kutjwathana yitjanga. 46Munyima ha wa tongwera eshi: “Kemo ya pwa kutjanga: Kristusi gha nyande, no mudiyuwa dyoghuhatu mbo ghana vumbuka mwawafu. 47MuDina dyendi mbana yuvitha mapirukero no mathigherero ghomaharwero, kumako ghomahe, kutunderera kuJerusalema no kumweya. 48Amwe ne yamwe mwatunongo hoyinu yino. 49Ene mu dimuke eshi mbo na mu tumena yitapa yaTate eyi na mu turekera. Amwe ne mu kare momuno mumbara, kate mba mu rongerere mangcamu ghokuwiru.”
Mudhineno waJesusi kudiwiru
(Mark 16:19–20; Yitenda 1:9–11)
50Kutunda po, ko kuwatwara kate kuBetaniya. Ha ka yeyura moko ghendi no gha wa kandadhekire. 51Oku shime ha wa kandadheka, ko kunyangutuka gha wa tunde, no ha mu dhinekire kudiwiru. 52Awo ha mu kandererire no ha hukire kuJerusalema noyishamberera yoyikuru. 53Omu mo ha ka karire mayuwa ghomahe mutembeli ghukugha Nyambi.
Šiuo metu pasirinkta:
Lukasi 24: MHW1986
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Mbunga dhoBayibili dhaNamibia (Bible Society of Namibia) 1986