Markos 11
11
Yeesus Nugus balih Yerusaalem oroba
(Maatiyos 21:1-11; Luukas 19:28-40; Yohannis 12:12-19)
1Kado Yerusaalemih kab-yerhxiinih Oolac koomalle geytimta Beetfage kee Beetcaniyalle yemeetin gedda, Yeesus ishi katattaynitko lamma dhirhiyeyaako: 2“Tamaa sin nifidde suganta dikille tedeyinyaako, orobtan gedda wuli yumudhdhuwe cindhaa okolotta, kaddih walaa inketti akko korinnixeya geytoona kitin. Iftixantaaki talle baha. 3Akkinnanti: ‘Aymih tayim abak taniini?’ sinak yerhxemko, ‘Maddari kaa farheh kinni, akkanih lel talle kaa yadabbo kinni’ akko erhexa” akko yerhxe. 4Usun lel yedeynih yumudhdhuwe cindhaa okolotta irolle arax afalle geyenyaako, yiftixin. 5Amalle daw-terhxeh tinemko gari lel: “Ayim abak taniini, cindhaa okolotta aftixuk taniini?” akko yerhxin. 6Usun lel Yeesus akko yerhxeh yinem akko yerhxin, usun lel yadawna ten xaben. 7Usun lel amaa cullutta Yeesus fanah baaheenih, sinni natsul bukalle akko hayenyaako, usuk akko defeye. 8Mango mari sinni natsul araxadde akah sidishen, aki mari lel garabko yigricin dharhaa le xakuk akah sidishen. 9Amaa afa kee sarradde akko aduuk tine mango xiyaw lel: “Yalla xamdishinna! Maddari migacalle yamiiteti dhaacole kinni!#Zaabur 118:26 10Tamiite ni abba kin Dawud nigsinna dhaacole kinni! Yalla xamde takkoo agani carshelle!” arhxuk andhadhdhaxak yinin.
11Usuk Yerusaalem orobeh lel maqhdas caredde orobe. Gura-mizgalle kulux-yerhxeh ummannim yublek sarrah lel, baarho dhumteh tineyaako, amaa lamman kee tamanlih Beetcaniya fanah yedee.
Yeesus indacartö abaara
(Maatiyos 21:18-19)
12Malammit max, usun Beetcaniyaako awcuk, usuk safriite. 13Waacinaako wuli dharhaa-le indacartö yubleyaako, wulim akko geyam kee yablo alle yedee. Alle yemeete gedda, indacaari waqhte kuuk miyinemhi sabbatah dharhaa kibah inkim akko migeyo. 14“Kamboh walaa inketti daro kok beete wayo” lel akko yerhxe. Kaa katattaynit lel yoobbin.
Yeesus maqhdas care yatsrige
(Maatiyos 21:12-17; Luukas 19:45-48; Yohannis 2:13-22)
15Yerusaalemille lel yemeetin. Usuk maqhdas caredde orobeh, amaa maqhdas caredde aabixuk kee dhaamak tine xiyaw inkoh yeyyeeceh, solaadi yaybiddile marih thawlal kee xamaama aabixuk yine marahi kuraasi yeydedebbe. 16Walaa inkim yooqhociinih amaa maqhdas careeko tillaaboona lel walaa inkettah masmaxo. 17Ten aydurusuk lel: “‘Yi cari umman diikah salaat careh decsiimo kinni’#Isayas 56:7 yarhxiinim tunkuttubeh mitane? Atin laakin garaacenti gonna akko abteenih tanin” akko arhxuk yine. 18Sheekhat manabottit kee sercat dhiiceenit yoobbiinih, akah kaa yaylayniikah wagiyak yinin. Kaa aydarasalle amaa mango xiyaw cibrah rabeenimhi sabbatah lel kaako mashshiiten. 19Baarho dhumte gedda lel amaa daafooko yewcin.
Caamulti indacartö
(Maatiyos 21:20-22)
20Dhaxiine tillaabak lel amaa indacartö rimid fanah kafteh yublin. 21Bithroos lel yizzikkireh: “Mudarris, ubul! Amaa atu abarte indacartö kafteh tane” akko yerhxe. 22Yeesus lel: “Yallah imin. 23Inkoh tamaa arhxinnannim takko kinamhi shakke ishi afcaadodde hayekkah, takko kinamah yaamineh, ta koomak: ‘Takkeeko aduwaaki badadde ciddit’ arhxinnantiyah akah takko kinam rummah sinak arhxiyuk ane. 24Amaydo, dhaacitteenih esserinnannim kabbatteenim balih imina, sinah takko kinam lel sinak arhxe. 25Tassallawna ugutinnan gedda lel, carshelle geytima sin Abba sin umaani sinalle xabo ciloh, umman tiyaako aallinnannim alle xaba. [26Atin alle xabe wayteenimko laakin carshelle geytima sin Abba gantah sin umaani sinalle xabo maki” yerhxeh alle yedebbe.]
Yeesus reeza esserodde gaxte
(Maatiyos 21:23-27; Luukas 20:1-8)
27Usun lel malammih Yerusaalemille yemeetin. Maqhdas caredde orobak, sheekhat manabottit, sercat dhiiceenit kee naba mari alle yemeetiinih: 28“Awlih reezah kinni tayim abak tanitom, hido ta reeza koh toxoyem miya kinni?” akko yerhxin. 29Yeesus: “Anu lel wuli essero sin essero kiyo, radde yoh tedebbiinimko, anu lel tayim awlih reezah abak aniyom sinah warisho kiyo. 30Yohannis aythammaq carsheeko kuuk yine woole xiyawko? Yoh edebbaa” akko yerhxe. 31Usun lel sinne-sinneh taginah waanishak yinin: “‘Carsheeko’ akko nerhxemko: ‘Aymih kaa aamine wayteeni?’ nok yarhxo kinni. 32Laakin: ‘Xiyawko’ akko nerhxemko...” Amaa mango xiyaw inkoh Yohannis rummaahit nabiih kaa abluk yiniinimhi sabbatah, amaa xiyawko mashshiiten. 33Amaymih Yeesusuk: “Minaarhige” akko yerhxin. Usuk lel: “Anu gantah tayim awlih reezah abam sinah warisho makiyo” akko yerhxe.
Šiuo metu pasirinkta:
Markos 11: SCC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2024 Wycliffe Ethiopia