Luukas 4
4
Yeesus cakana
(Maatiyos 4:1-11; Markos 1:12-13)
1Yeesus lel Quddus kin Ufayeh yemmeegeh Yordaanosko gaxeh, Ufayeh lel zibolle yimmirrixe. 2Marootom lellectiya ibliisih yimcikkine. To lellecidde lel inkim mibeetinna. Amaa lellec bakite gedda lel safriite. 3Ibliis lel: “Yallih Barha tekkemko, ta dhaak ‘Folo tik’ akko erhex” akko yerhxe. 4Yeesus lel: “‘Xiyawti foloh bisa mimaram’ tunkuttubeh kinni” yerhxeh alle yedebbe.
5Ibliis lel xaftalle kaa yeyyeeceh, umbuka uduuniyat nigsinnan inki waqhtelle kaa yuybulluwe. 6Ibliis lel: “Inkoh ta reeza kee tee nabne koh axawo kiyo. Yottah tomxowwemhi sabbatah inneh farhe tiyah tee axaye. 7Amaydo, yi nifille yoh tucbudemko tayim inkoh kum yakko kinni” akko yerhxe. 8Yeesus lel: “‘Maddara ishi Yallah ucbud, kayyah bisa ukhdum’ yarhxiinim tunkuttubeh kinni”#Gabbaacime Sercat 6:13 yerhxeh alle yedebbe.
9Usuk lel Yerusaalem fanah kaa yiymirixeh, maqhdasti carih bukahi erherhak hayeh, “Yallih Barha tekkemko, guballe ishe cid. 10‘Ku dhawrho, ku zacabah ishi malaykut yeemereh’#Zaabur 91:11-12 11‘Sinni gabubuh xaf ku ishoona kinon, amaymih ku ibi dhayittodde gomfoyto maki’ tunkuttubemhi zacabah kinni” akko yerhxe. 12Yeesus lel: “‘Ishi Yalla tascakkano kolle mitane’ yarhxiinim tane” yerhxeh alle yedebbe. 13Ibliis lel cakanan inkoh abayshe gedda, mece waqhte geyandah kaa xabe.
Yeesus ishi ciyyo erherhisha
(Maatiyos 4:12-17; Markos 1:14-15)
14Yeesus lel Ufayi xaylah Galiilalle gaxe. Kaa wari lel umbuka amaa wakalille faax-yerhxe. 15Usuk lel ten sunagoogedde aydurusuk, umman tenko lel nabne geye.
Yeesus Naazretille xinnitima
(Maatiyos 13:53-58; Markos 6:1-6)
16Usuk alle carsime Naazret fanah lel yemeete, Sambat lellec lel ishi baso balih sunagoogedde orobe, yaqhraw yerhxeh lel ugute. 17Nabii Isayas maqhaddamat lel akah yomxoye. Amaa maqhaddamat faake gedda lel:
18-19“Baaxentit Mece Ware aybassaro
doorot assakat yoh abemhi sabbatah,
Maddari Ufayi yi bukalle yane.
Tindhibbirhemih muuca warroysho,
inti-malit mablo geyshisho,
tunzullumemih finja axawo,
Maddari mecaani adde temeete iggida warroysho
yi fareh yane”#Isayas 61:1-2
yarhxiinim alle tunkuttube cara geye.
20Amaa maqhaddamat alifeh lel amaa xattiimeenalle yedebbeh defeye. Amaa inkoh sunagoogedde tinemhi intit lel kayyadde kafeh yine. 21Usuk lel: “Kaafa Kutuub atin aabbuk yikmileh yane” akko yarhxo erherhishe 22Inkoh lel akah yishhidiinih kaa afko awcuk yine nicmat kalimaatah cibrah raben. “Tati Yoosuf barha makini?” lel yerhxin. 23Usuk lel: “Ta aymassal yok tarhxoona kitiinimih thummut kiyo: ‘Ko xaakimo, ishe urus!’ Kafarnaxuumulle abte aye kok noobbem, ta ishi dikille ab” akko yerhxe 24Kataysheh lel: “Walaa inki nabii ishi dik hi daafolle mikabbaatimam, rummah sinak arhxe. 25Rummah sinak arhxe, Eliyaas waqhtedde, caran adooxa iggida kee lixa alsa alfiimeh umbuka baarholle sirii culul yine gedda, Israa-eelille mango gubon yinin. 26Eliyaas laakin, Tsiidoonti Tsaareftalle tine gubna kin numa fanah kibah, tenko inketta fanah mifarritiminna. 27Nabii Eliisac waqhtedde lel, Israa-eelille mango saknittem yinin, laakin Suuriyaati Nacamaan bisa kibah tenko tii mansaffayinna” yerhxe.
28Tayim yoobbin gedda, amaa sunagoogedde tinem inkoh kurah yemmeegin. 29Uguteenih lel daafooko irolle kaa yeyyeecin. Kaa boolishoona ciloh lel ten daafo alle siraaximteh tine xangalhi gimam fanah kaa beyen. 30Usuk laakin ten fanko tillaabeh yedee.
Yeesus najaasa-le ufaye le xiyawto urusa
(Markos 1:21-28)
31Galiilaati daafo Kafarnaxuum fanah lel oobe. Sambatah lel ten aydurusuk yine. 32Reezaalih waanishemhi sabbatah, kaa aydarasah yussuxuttutin. 33Sunagoogedde wuli najaasa-le jinnetti ufaye le xiyawti yine. Wac-yarhxe andhaxah zeereh lel: 34“Aa! Ko Naazret Yeesuso, ayim nottaalih lito? Atu notta taylaw temeete? Anu miyatto kitom ku aarhige. Atu Yallih Quddus kin tiya kito” yerhxe. 35Yeesus laakin: “Sik-erhexaaki, akko ewec!” yerhxeh kaa yoskoolofe. Amaa jinnetti ten fanadde kaa cideyaako kaa dhafekkah akko yewce. 36Tekke lel, inkoh yussuxuttutiinih sinne-sinneh waanishoona erherhishen: “Ta waani ayim kinni? Amayim lel najaasa-le ufayit reeza kee xaylah yaamire, usun lel yawcin” yerhxin. 37Wari lel kaa zacabah umbuka amaa wakalelle faax-yerhxe.
Yeesus mango mara urusa
(Maatiyos 8:14-17; Markos 1:29-34)
38Usuk lel uguteyaako sunagoogeeko yewceh Simcoon caredde orobe. Simcoon ballö lel sirii lacnah laxutteh tine. Usun lel teyah kaa esseren. 39Tee bukalle daw-yerhxeh lel amaa lacna yoskoolofe gedda akah xabte. Ishi akkanih ugutteh lel ten takhdamo erherhishshe.
40Ayro dhumak tine gedda, yemfeleele laxuuh laxuute mara lem inkoh kayya fanah baahen. Usuk lel tittiyah ishi gaba alle oobisheh ten uruse. 41Zeeroh: “Atu Yallih Barha kito” arhxuk, junuun yakkeedo mango maraako yewce. Usuk laakin ten yoskoolofe, usun Masiix kinam kaa yeerhegiinimhi sabbatah, waanishaanamko ten deese.
Yeesus Sunagoogedde yayduruse
(Markos 1:35-39)
42Maaxi maaxe gedda, Yeesus zibo kin makaano fanah yedee. Mango xiyaw lel kaa wagiyaa yinin. Kaa fanah yemeetiinih lel akko yadiyemko kaa yibbirhin. 43Usuk laakin: “Taymih farritimemhi sabbatah, aki daafofulle yakkeedo Yallih Mece Ware aybassaro yolle tane” akko yerhxe.
44Usuk lel Yahuudiyaati sunagoogitidde warroyshaanam katattayshe.
Šiuo metu pasirinkta:
Luukas 4: SCC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2024 Wycliffe Ethiopia