मत्ति 22
22
बिहु भात्यारको तुलना
(लुका १४:१५-२४)
1इसु आरोङ एम्बालाइहेङ तुलना गेलाइता दोअ्हि, 2“सादेलको सारभिहेङ एमि राजादोफा दाजिलि द्वाङ, जाइ ताइको चानको बिहु भात्यार त्यार पाहि। 3कालाउ भात्यारता नेउता पिका द्याङगेलाइहेङ काइलि ताइको कामत्यागेलाइहेङ दिङगिल्हि, कालाउ एम्बालाइ लोलि माकिअ्हि।
4“आरोङ वा बो कामत्यागेलाइहेङ एसा दोअ्तेङ दिङगिल्हि, ‘नेउता पिकालाइहेङ दोअ्सु, का काङको भात्यार त्यार पाका हिघा, काङको पियागेलाइ रो तोइका तोइका गुपुसगेलाइ सेअ्का हि। गोताङ सामानगेलाइ त्यारका हि, बिहु भात्यारता लोसु।’
5“कालाउ बुङ एम्बालाइ वास्ताङ मापासिङ एमि ताइको मिलिङभारि रो भेनेङ ताइको पाइकारभारि हानेहि। 6दाइकालाइ चाहिँ वाको सिपालाइहेङ रिम्तेङ मारेम्का बेभार पातेङ एम्बालाइहेङ सेअ्हि। 7कालाउ राजा चेरताम्पातेङ ताइको सिपाल्हाइ दिङगिल्तेङ इङको ज्यानमारागेलाइहेङ सेअ्लि लागाइहि रो एम्बालाइको पुर चोअ्पिहि।
8“कालाउ वा ताइको सिपालाइहेङ दोअ्हि, ‘बिहु भात्यार त्यार हि, कालाउ बुङ नेउता निङकालाइ भतेर चालि लायकको माजेङहि। 9इदोङखातिर नेलाइ मुल दामागेलाइता हानेसु रो जाइजाइहेङ तिङस्वाना, एम्बालाइहेङ बिहु भात्यारता नेउता पिसु।’ 10कालाउ कामत्यागेलाइ मुल दामागेलाइता हानितेङ निङका झोको रेम्का मारेम्का झाराङहेङ जोम्पाहि रो बिहु साअ् बान्सालाइहोइ पोङघाहि।
11“कालाउ बुङ जेलाउ राजा बान्सालाइहेङ खाङलि दोअ्तेङ लिअ्ता लोहि, कालाउ वा बिहुता होङलि गोइका धाबा माहोङका एमिहेङ तिङहि। 12वा इङकोहेङ हिअ्हि, ‘सानाइति, बिहुको धाबा मालागाइसिङ ना हेसापा इता लिअ्ता लोन्हा?’ इङको हाइदोङ दोअ्लि मादोहि। 13कालाउ राजा ताइको कामत्यागेलाइहेङ दोअ्हि, ‘इङकोको खुरखोकोइ धेउतेङ इङकोहेङ बाहार कितिकितिकाता थाल्पिसु। जेता द्याङगेलाइ खारावा रो तासि रेअ्तावा।’#मत्ति ८:१२; २५:३०; लुका १३:२८
14“न्हुअ्सो इसु दोअ्हि, काइगिल्का हेन्जाङ हि, कालाउ बुङ साल्तेङ दिङगिल्का आतुइसा हि।”
तिरो तिरिका बारेता हिअ्का
(मर्कुस १२:१३-१७; लुका २०:२०-२६)
15कालाउ फरिसिगेलाइ हानितेङ इसुहेङ वाकोङ काथाता वासिहेङ हेसापा फासेपालि दोअ्तेङ मतो पाहि। 16एम्बालाइ ताइको चात्यागेलाइहेङ हेरोदको द्याङगेलाइदोफा इसुकोता दिङगिल्हि। एम्बालाइ दोअ्हि, “ओइ मास्टर, केलाइ गेन्हाखे, ना जातिङको हिन्हा रो द्याङगेलाइहेङ परमेस्वरको जातिङको काथा धिरपाखेना। ना हासुङदोफा माथिखेना, ना द्याङगेलाइको र्हाइ खान्तेङ काथा बुङ मापाखेना। 17इदोङखातिर केलाइहेङ दोअ्, रोमि माहाराजा कैसरहेङ तिरो तिरिलि मुनासिप एइ ना माको?” 18कालाउ बुङ इसु एम्बालाइको चालबाजि गितेङ दोअ्हि, “ओइ चिम्काटा, कासेहेङ हाइपालि जाचेसुखेना? 19खोइ तिरो तिरिका टाका कासेहेङ तिम्पासु।” कालाउ एम्बालाइ वाकोता एलोङ टाका चुमाहि। 20इसु एम्बालाइहेङ दोअ्हि, “इदोइ छापा हासुको एइ, कालाउ हासुको मिङ खोपेका हि?” 21एम्बालाइ इसुहेङ दोअ्हि, “कैसरको।” कालाउ वा एम्बालाइहेङ दोअ्हि, “इदोइखातिर जे कैसरको हि, इङको कैसरहेङ पिसु। जे परमेस्वरको एइ, इङको परमेस्वरहेङ पिसु।” 22इदोइ हिङतेङ एम्बालाइ भारभुसाइहि रो वासेहेङ लाअ्तेङ हान्हेहि।
सिकासो सिन्हुका बारेता हिअ्का
(मर्कुस १२:१८-२७; लुका २०:२७-४०)
23इङकोङ दिना सिकालाइ सिन्हुतेङ माल्होखे दोअ्का सदुकिगेलाइ इसुकोता लोतेङ एम्बालाइ वासेहेङ हिअ्हि,#साल्तेङ दिङगिल्का २३:८ 24“मास्टर, मोसा दोअ्का हि, हिदिङ द्याङ चानचामिन्दि माकोसिङ सिनु वाको ओने दादाको बेअ्हेङ चुमातेङ दादाको खाल जाअ्पालि गोयाङ।#नियम २५:५ 25एला केलाइको माझाता न्हिअ्मि दादाओनेगेलाइ हिघाखे। जेठा दादा बिहु पाहि, कालाउ बुङ चान चामिन्दि माजेङपासिङ सिहि। एन्सा जेङलाउ माहिला ओने ताइको भाउजिहेङ ताअ्हि। 26वा बुङ जेठा दादा भाइपाङ चान चामिन्दि माजेङपासिङ सिहि। एन्साङ पातेङ माहिला ओने भाइपाङ साहिँला रो बो ओनेगेलाइ बुङ ताइको भाउजिहेङ ताअ्हि। कालाउ बुङ एम्बालाइ बुङ चाना चामिन्दि माजेङपासिङ सिहि। 27एम्बालाइ झाराङ सिकान्हुअ्सो इङको बेबाल बुङ सिहि। 28इदोइभाअ्सिङ न्हुअ्दिनाता सिकालाइ सिन्हुकान्हुअ्सो इदोइ न्हिअ्मि दादाओने मध्येता इङको बेबाल हासुको बेअ् ज्यावा? हाइदोनु इङको झाराङको बेअ् जेङलिदोका हिघाहि।”
29इसु एम्बालाइहेङ दोअ्हि, “नेलाइ माङखाता हिसुन्हा, हाइपानु नेलाइ धरमकिताब रो परमेस्वरको सरबङ मागेसुखेना। 30सिकालाइ सिन्हुकान्हुअ्सो द्याङगेलाइ बिहु मापाखे, ना बिहु पापिखे, कालाउ बुङ एम्बालाइ सादेलको सादेलचरभाइपा जेङखे। 31कालाउ बुङ सिकालाइ सिन्हुतेङ ल्होका बारेता परमेस्वर नेलाइहेङ हाइ दोअ्का हि, इङको नेलाइ धरमकिताबता पर्हेका मान्थुसुन्हा? 32वा दोअ्का हिघाहि ‘का आब्राहामको परमेस्वर, इसहाकको परमेस्वर रो याकुबको परमेस्वर हिघा।’ एन्साङ परमेस्वर सिकालाइको परमेस्वर माको, कालाउ बुङ सिन्हुकालाइको परमेस्वर हि।”#दामालाअ्का ३:६ 33इदोइ हिङतेङ द्याङगेलाइ वाको बिद्याता भारभुसाइ हि।
झाराङखान्तेङ बारा हुकुम
(मर्कुस १२:२८-३४; लुका १०:२५-२८)
34इसु सदुकिगेलाइहेङ सिपा पाहि दोअ्का हिङतेङ फरिसिगेलाइ वाकोता जोम्हि। 35एम्बालाइता एमि धरम मास्टर इसुहेङ जाचपाका ठहरहोइ वासेहेङ हिअ्हि, 36“मास्टर, नियमता झाराङखान्तेङ बारा हुकुम हिदोइ हि?” 37इसु वासेहेङ दोअ्हि, “‘ना परमप्रभु ताइको परमेस्वरहेङ ताइको गोताङ कोन्धाङहोइ, ताइको गोताङ आत्माहोइ रो ताइको गोताङ मनहोइ माया पा।’#नियम ६:५; लुका १०:२७ 38झाराङखान्तेङ बारा रो लाङ हुकुम इदोइ हि। 39न्हे बुङ इसिकाङ हि, ‘ना ताइको भेर्पाकोहेङ ताइमिहेङ भाइपाङ माया पा।’#लेबि १९:१८ 40गोताङ नियम रो आगाधुइकालाइको बिद्याको कसि दोङ इदोइ न्हे हुकुमगेलाइ हि।”
ख्रिस्टको बारेता हिअ्का
(मर्कुस १२:३५-३७; लुका २०:४१-४४)
41जेलाउ फरिसिगेलाइ जोम्का हिघाहि, कालाउ इसु एम्बालाइहेङ हिअ्हि, 42“ख्रिस्टको बारेता नेलाइ हाइ दोअ्सुखेना? वा हासुको खाल हि?” एम्बालाइ इसुहेङ दोअ्हि, “दाउदको खाल।” 43इसु एम्बालाइहेङ दोअ्हि, “एन्सानु दाउद पुनित हाङसासो हाउसाला निङतेङ ख्रिस्टहेङ ‘प्रभु’ दोअ्तेङ हेसापा काइलि दोहि? वा दोअ्खे:
44‘परमप्रभु काङको प्रभुहेङ दोअ्हि,
ना काङको दाम्पाहा योम,
जेलाउ थिकापा का नाङको दुस्मनगेलाइ
नाङको खोकोइको पाइतालालेता माताअ्ताङका।’#ले ११०:१
45“एसापा दाउद ख्रिस्टहेङ ‘प्रभु’ दोअ्नु, वा हेसापा दाउदको खाल जेनावा कुनु?” 46कालाउ हासु बुङ जावाफता ए लवज धुइलि मादोहि। इङको दिनासो हासुङ वाकोदोफा हिअ्लि लुर मापाहि।
Šiuo metu pasirinkta:
मत्ति 22: DHIM
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2024 (Active), Wycliffe Bible Translators, Inc. All rights reserved.