मत्ति 15
15
चलन मानेका बारेता बिद्या
(मर्कुस ७:१-१३)
1कालाउ आधेमि फरिसिगेलाइ रो धरममास्टरगेलाइ यरुसलेमसो इसुकोता लोतेङ हिअ्हि, 2“नाङको चात्यागेलाइ खालसो चलितेङलोका चलनगेलाइ हाइपालि मामानेखे? हाइपानु एम्बालाइ चाकालाम्फा ताइको खुर माझाखे।” 3इसु एम्बालाइहेङ दोअ्हि, “नेलाइ बुङ ताइको चलनगेलाइहेङ मानेलिको भाअ्सिङ हाइपालि परमेस्वरको हुकुम मामानेसुखेना? 4हाइदोनु परमेस्वर दोअ्का हि, ‘ताइको आबा आमाइहेङ मानभाउ पासु, रो ताइको आबा आमाइहेङ मारेम्का काथा दोअ्खे इङकोचाहिँ सेअ्लिगोयाङ।’#दामालाअ्का २०:१२; २१:१७; नियम ५:१६; लेबि २०:९ 5कालाउ बुङ नेलाइचाहिँ ताइको आबा आमाइहेङ, ‘नेलाइहेङ पिलि गोइका गोताङ परमेस्वरहेङ पिलिदोहोइका, इदोइखातिर नेलाइहेङ पिलि माद्वाङका दोअ्सुखेना।’ 6एसापा ताइको आबा आमाइहेङ मान पालि मागोयाङ दोअ्तेङ नेलाइ ताइको चलनभारि लागितेङ परमेस्वरको हुकमहेङ बेकामको बान्हाइसुखेना। 7ओइ चिम्काटागेलाइ, यसैया आगाधुइका यसैयाको दोअ्का काथा नेलाइदोफा जिसिकाको उसिकाङ मिलिखेः
8‘इदोइ द्याङगेलाइ कासेहेङ नुइहोइ खिनिङ मान पाखे,
कालाउ बुङ एम्बालाइको मन काभारि मान्थु।
9एम्बालाइ बित्थाता कासेहेङ बाखिन्खे,
कालाउ बुङ एम्बालाइको नियम द्याङगेलाइको धिरपाका थिति खिनिङ हि।’#यसैया २९:१३ ”
द्याङगेलाइहेङ अपुनित पाका काथागेलाइ
(मर्कुस ७:१४-२३)
10इसु द्याङगेलाइहेङ ताइकोता काइहि रो एम्बालाइहेङ दोअ्हि, “काङको काथा मनपातेङ हिङसु रो गेसु, 11जेदोङ चाका चिज नुइसो दुल्खे, इङको द्याङहेङ अपुनित मापाखे। कालाउ बुङ जेदोङ काथा नुइसो बाहार ओल्हेखे, इङको द्याङहेङ अपुनित पाखे।”
12इदोइन्हुअ्सो चात्यागेलाइ लोतेङ वासेहेङ दोअ्हि, “हाइ ना गेहोइना? फरिसिगेलाइ नाङको दोअ्का काथा हिङतेङ चेरताम्पाका हि।” 13इसु दोअ्हि, “सादेलता हिका काङको आबा माथिङका गोताङ सिङ उअ्न्हावा। 14एम्बालाइहेङ लाअ्पिसु, इङको कान्हा आगुवागेलाइ हि। कान्हा कान्हाहेङ थोङगिल्नु, इङको न्हेमिङ खाराता वालावा।”#लुका ६:३९
15पत्रुस इसुहेङ दोअ्हि, “केलाइहेङ इदोइ तुलनाको माने दोअ्पि।” 16वा दोअ्हि, “हाइ नेलाइ एलाबुङ गेनाङ मान्थुसुन्हा? 17हाइ नेलाइ मागेसुखेना, जेदोङ चिज द्याङगेलाइको नुइसो दुल्तेङ हेमेङलिअ्ता थुकाखे रो इङको ओल्हितेङ बाहार हानिखे। 18कालाउ बुङ द्याङको नुइसो बाहार ओल्हेका काथा वाको कोन्धाङसो ओल्हेखे रो इदोइ दोङ काथाहोइ द्याङहेङ अपुनित बान्हाइखे।#मत्ति १२:३४ 19हाइपानु कोन्धाङसो दोङ आसाति ठहर, सेअ्लि, दुस्चर, दुराचार, खुलि, असत दासि रो बादनामि बाहार ओल्हेखे। 20इदोइ काथागेलाइसो चाहिँ द्याङहेङ अपुनित पाखे। कालाउ बुङ खुर माझासिङ चालाउ वासेहेङ अपुनित मापाखे!”
कनानि बेबालको खान्धुर
(मर्कुस ७:२४-३०)
21कालाउ इसु इन्तासो ओल्हेतेङ, टुरोस रो सिदोनको माउजाभारि हानेहि। 22इङको माउजासो एमि कनानि बेबाल लोतेङ र्हिकाइतेङ दोअ्लि तेङहि, “ओइ प्रभु, दाउदको चान, कासेहेङ दाया पा। काङको चामिन्दिहेङ मासान मारेम्फाङ सान्ताइका हि।” 23इसु इङकोहेङ हाइदोङ जावाफ मापिहि। वाको चात्यागेलाइ लोतेङ वासेहेङ बिम्ति पाहि, “यासेहेङ दिङगिल, हाइदोनु इङको र्हिकाइतेङ केलाइहेङ पिताइदोङखे।” 24इसु दोअ्हि, “कासेहेङ ते राम्का भेराभाइपा इस्राएलको जात्याको द्याङगेलाइहेङ साघाइलिको भाअ्सिङ खिनिङ परमेस्वर आबा दिङगिल्का हि।” 25कालाउ बुङ इङको बेबाल लोतेङ वाको आगाता तिर्हो थोतेङ दोअ्हि, “ओइ प्रभु, कासेहेङ साघाइ।” 26इसु दोअ्हि, “जामालाइको तोले र्हुतेङ खियागेलाइहेङ थालपिलि ते मुनासिप माज्याङ।” 27इङको दोअ्हि, “एइ प्रभु, कालाउ बुङ खियागेलाइ बुङ ते ताइको गिर्हि चालाउ हुल्का आइथि चाखे।” 28कालाउ इसु इङकोहेङ दोअ्हि, “ओइ बेबाल, नाङको खान्धुर बाराका हि। नाङको लाल्सा पाकाभाइपा नासेहेङ ज्याको।” इङकोको चामिन्दि इङकोङ पहर एल्हि।
इसु द्या हाजार द्याङगेलाइहेङ चापाका
(मर्कुस ७:३१; ८:१०)
29इसु इन्तासो ओल्हेतेङ गालिल चावान्दिको काम्बे जेङतेङ हानेहि रो आरदाङर्हुता ताङतेङ इन्ता योम्हि। 30कालाउ द्याङगेलाइको चेअ्सु वाकोता लोहि। एम्बालाइ ताइमिदोफाङ चुमाका कुज्या नेङगारा, कान्हा, लाटा रो बो हेन्जाङहेङ वाकोता चुमातेङ ताअ्पिहि रो वा एम्बालाइ झाराङहेङ एल्पाहि। 31कालाउ इन्ता हिका लाटागेलाइ धुइका, कुज्या नेङगारागेलाइ एल्तेङ तेका रो कान्हागेलाइ तिङका तिङतेङ द्याङगेलाइ भारभुसाइहि कालाउ एम्बालाइ इस्राएलको परमेस्वरहेङ बाखिन्हि।
32कालाउ इसु ताइको चात्यागेलाइहेङ ताइकोता काइतेङ दोअ्हि, “का इदोइ द्याङगेलाइहेङ खाङतेङ दायाघा, हाइदोनु एबालाइ कादोफा हिका नानि सुम्नि जेङहोइ। एला एबालाइदोफा चालि हाइदोङ मान्थु। का एबालाइहेङ म्हितुपाङ दिङगिल्लि माभोखा। माकुनु एम्बालाइ दामाताङ झाका लोनावा।”
33चात्यागेलाइ इसुहेङ दोअ्हि, “इसिका बारा चेअ्सुहेङ इदोइ निरजन थामेता चापालि केलाइ हितासो चाकाआनेमाने निङलि?” 34इसु एम्बालाइहेङ दोअ्हि, “नेलाइदोसा हेअ्लोङ तोले हि?” एम्बालाइ दोअ्हि, “न्हिअ्लोङ तोले रो आधे म्हुम्हुइका हाया खिनिङ हि।”
35इसु द्याङगेलाइहेङ चाउरता योम्लि हुकुम पिहि। 36इङकोन्हुअ्सो वा इङको न्हिअ्लोङ तोले रो हाया र्हुतेङ परमेस्वरहेङ च्याबास पिकान्हुअ्सो पेङतेङ चात्यागेलाइहेङ पिहि। कालाउ चात्यागेलाइ द्याङगेलाइहेङ बाखाराइ पिहि। 37एम्बालाइ झाराङ घाइपाङ चाहि रो दाइका टुकारागेलाइ जोम्पालाउ न्हिअ् डालो जेङहि। 38बेबाललाइ रो जामालाइबिना चाकालाइ वाबालाइ खिनिङ द्या हाजार हिघाखे। 39कालाउ द्याङगेलाइहेङ दिङगिल्कान्हुअ्सो इसु नाउता धोल्तेङ मगादानको माउजाभारि हानेहि।
Šiuo metu pasirinkta:
मत्ति 15: DHIM
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2024 (Active), Wycliffe Bible Translators, Inc. All rights reserved.