Ruuta 3
3
Baan ŋga Rutə a tsaa səɗə Bowaz gakəy asəkərə
1Ma ka əndə'i uusəra, Na'omi a ba ka maɗanatə Rutə: «Uuzənaaki, ka ɗan nə nyi gazhə'waan ŋga alə ka hə ha ŋga əpisəka. 2Kə shii hə o'i ma Bowaz, ənə njuun ka slənən da makki slənaakəy, ŋga yi rəŋwə niin. Ənshin davəɗə nə bu'u aləkəmaaraakəy a ran. 3Ma ɗanəku, yiɓuu, ha ɗavə urədya aashiku, ha ŋgavə kəjerənaaku ətə pale də dagwaan, ha dzə aa ran ka hatə ciikəya ɗa dəga; amma, gaha ɓaarii naakuna se maɗa uugi cə zəmən da san. 4Maɗa kə gi cə ka baan, tsaamətə rəgwa səɗəkəy ŋga'ə, ha əntsahə aaɓiikəy, ha pake ka sə ŋga ləkutəginaakəy, ha baan aɓii səɗəkəy. Ma daba'əkəy, cə saakəy na ba ka hə sət ɗanəku.» 5Rutə a ba ka ki: «Ka ɗan nə nyi makə sənə bii hə ka nyi pat.»
6Rutə a dzə aa ran ŋga Bowaz, kya ɗa patən ŋga sət bii sərəhwatə ka ki ɗan. 7Bowaz a zəm, ca sa, kə uuɗii səkəkəy, ca dzə ka baan dadagərə madzaadza aləkəmaara. Wata Rutə a əntsahə aaɓiikəy də samma. Makə ne ki ka rəgwa səɗəkəy, kya baan davə. 8Ma ətsə a hada vəɗa, kə və'ihə Bowaz də kwasən, ca zhi'ugi ca gwaŋe ka nəkəy, ca ne ka min pərəɓə aɓii səɗəkəy. 9Ca ləgwa: «Wu saŋ ənaa?» Əŋki ki: «Nyi Rutə, mavaaku. Nəhuu tə mavaaku, acii hə nə maluwaaki.»
10Bowaz a ba ka ki: «Uuzənaaki, wa Yaawe a ɗa ka hə ŋga'əən da barəkaan. Kə ɗii hə ŋga'ə, ma sən ɗii hə əndzə'i, kə pale ka ətə ɗii hə ŋga təkuŋwan. Poshə hə kəy nəku ka uuɗə dagwiitə da gəna, taa maaghiin. 11Ma əndzə'i, uuzənaaki, gaha ŋgwalə taa mi, ka ɗan nə nyi gazhə'waan ŋga ɗa ka hə sət mwayi hə pat, ənjə pat kə shii tii o'i miitə da məghərəvənatə nə hə. 12Ha'ə tanyi, maluwə nə nyi ka hə, tə'i nyi da baawəɗa ŋga ba uushə anəku, amma, tə'i əndətə kədəhə da hə pale ka nyi. 13Baawə zəku'i, ma dorə pəderən, ka nenaaŋwə maɗa ka shin nə cə ka ŋgərən tə hə. Maɗa kə shi cə, ŋga'ə, maɗa poshə, wanyin ka ban ka hə akuŋwacii Yaawe ka ŋgərən nə nyi tə hə. Baawə zəku'i.»
14Kya baan davə aɓii səɗəkəy ca'ə pəderən. Kya maɗətə ha wurəwura acii poshə Bowaz mwayi ka ənja puləgi o'i kə gi min aaɓiikəy aa ran. 15Ma taabu'u kaa kya palə, ca ba ka ki əs: «Kirawə bəra'in ŋga kadəmbulaaku, ha tərəpa.» Kya tərəpa, ca gəlavə ka ki aləkəmaara taasa kuwa, ca əjivə ka ki, təya ŋgərəvə ka ki aanətə, ca ənətə aasəkə vəran. 16Makə mbu'i ki aasii, sərəhwatə a ləgwa əŋki ki: «Hə ənə tanyi nii uuzənaakya?» Rutə a dzəgun ka ki sət ɗii tii pat da sət bii Bowaz ka ki. 17Kya tsakə ban: Cə vii ka nyi aləkəmaara, ca ba ka nyi: «Poshə hə ka ənən ciin zaɓə aaɓii sərəhwaaku.»
18Na'omi a ba ka ki, uuzənaaki, ma əndzə'i, gərawə, ha tsaam makə sət na ɗa aakuŋwa, acii poshə əndətsə na əpi səkə maɗaam cə kə luupaa tə hə ənshin.
Šiuo metu pasirinkta:
Ruuta 3: Ruth BGD
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
All rights reserved