Yowana 3
3
Niikodeemu kaataarira Yeesu
1꞉Aariga ariwo omutangasha wumwi mukuru wa Abhayawudi, ari Mufarisaayo,#3:1 Mufarisaayo. Ringira riingʼana Abhafarisaayo mu-Mangʼana Amakomeeye. riisiina ryaye ˆnaatogwa Niikodeemu. 2Rusuku rumwi, ˆnaagenda ku-Yeesu iri ngeta, ˆnaamubhwira ati, “Mwiyigisha, kimenyere ati awe uri mwiyigisha unu usookere ku-Nyamuwanga, kwa okubha atariwo omuunu unu kaatura okukora ebhimenyegesho bhinu awe owukora, Nyamuwanga akabha atari amwi nawe.” 3Yeesu ˆnaamusubhya ati, “Enikubhwira ekimari ati, omuunu ateebhuuywe orwa akabhiri,#3:3a Ringira Yowana 1:13. atakutura okwingira mu-bhukama bhwa Nyamuwanga.”#3:3b Mu-bhukama bhwa Nyamuwanga. Ringira riingʼana Obhukama bhwa Nyamuwanga mu-Mangʼana Amakomeeye. 4Niikodeemu ˆnaabhuusha Yeesu ati, “Omuunu kaatura kutiki okwibhurwa kweki aakokooye? Kaatura okusubha mu-nda ya nyira, amare eebhurwe kweki?”
5Yeesu ˆnaamusubhya ati, “Enikubhwira ekimari ati, omuunu ateebhuuywe na amanji na Mwoyo Omutaakatiifu, atakutura okwingira mu-bhukama bhwa Nyamuwanga. 6Kinu ekiibhurwa na omubhiri, kyone ekibha mubhiri, nawe omwoyo omuyaaya ogwibhurwa okusooka ku-Mwoyo Omutaakatiifu. 7Siga okuruguura kwa okubha naakubhwira ati, ‘Omwendwa mwibhurwe orwa akabhiri.’ 8Mwoyo Omutaakatiifu kaasusana na omuyaga, gweki oguyemba nguja enu ogwenda. Owutura okuungwa oruyiriro rwagwo, nawe utakutura okumenya enu ogusooka na enu oguja. Nikwo kutyo gari ku-muunu woonewoone unu eebhuuywe na Mwoyo Omutaakatiifu.”
9Niikodeemu ˆnaabhuusha Yeesu ati, “Amangʼana gayo agatura kutiki okubha-wo?” 10Yeesu ˆnaamusubhya ati, “Awe uri mwiyigisha unu uri na ekibharo muno mu-kyaro kya Ijirayeeri, amangʼana gayo utakugamenya? 11Enikubhwira ekimari ati, rinu kimenyere niryo ekyaika, na rinu ꞉kyarorere niryo ekibhwira abhaanu. Nawe emwe mutakwikirisha ganu ekibhabhwira. 12Raabhe naabhabhwira amangʼana ga mu-kyaro anu, nawe emwe mutakugeekirisha. Woori omuuja okwikirisha kutiki nikabhabhwira amangʼana ga mu-rwire? 13Na atariwo muunu woonewoone unu aragendere mu-rwire. Nawe Omwana wa Adaamu niwe ꞉eekire okusooka mu-rwire.
14“Rwa kutyo Musa ꞉eemusiishe ekisusano kya ekisoro ku-nsi ya orukungu,#3:14 ꞉Eemusiishe ekisusano kya ekisoro ku-nsi ya orukungu. Musa ꞉aaroosiishe ekisusano kya ekisoro kya ekisisira, ˆnaakituura kw-iti iiguru, insonga abhaanu bhakakiringira bhawore. Ringira Obhubhasi 21:4-6. nikwo kutyo Omwana wa Adaamu keendwa eemusibhwe, 15insonga abhaanu bhoone kutyo bhanu abheekirisha bhabhe na obhurame bhunu bhutakuweera okuturira ku-mwene.”
16Nyamuwanga ꞉eendere muno abhaanu bhoone kutyo abha mu-kyaro. Obhwendi bhuyo mbukora ˆnaatuma omwana waaye omumwemwe, insonga omuunu woonewoone unu kaamwikirisha asige okubhura, tari abhe na obhurame bhunu bhutakuweera. 17Nyamuwanga ꞉ataatumire Omwana waaye mu-kyaro, ati aramurire abhaanu, tari abhaanu bheerusibhwe okuturira ku-mwene. 18Unu keekirisha Omwana wa Nyamuwanga atakuramurirwa. Nawe omuunu unu atakumwikirisha, aamarire okuramurirwa, kwa okubha ateekirisiishe riisiina rya Omwana omumwemwe wa Nyamuwanga. 19Na inu niyo indamuro, ati, obhweru bhwijire mu-kyaro,#3:19 Ringira Yowana 1:4-5. abhaanu mbeenda ekisuute okukira obhweru, kwa okubha ebhikorwa bhyebhwe ni bhibhiibhi. 20Abhaanu bhoone kutyo bhanu abhakora ebhikorwa ebhibhiibhi, abhabhiiyirirwa obhweru bhuyo. Bhatakwenda okuuja ku-bhweru insonga ebhikorwa bhyebhwe ebhibhiibhi bhyasiga okumenywa. 21Nawe abhaanu bhoone kutyo bhanu abhakora ekimari, abhaaja ku-bhweru, insonga ebhikorwa bhyebhwe bhirorwe ati bhikorerwe okuriingʼaana na kutyo Nyamuwanga keenda.
Yeesu na Yowana Omubhatiisha
22Mmbe, gayo ꞉geejire gaawa, Yeesu na abheeyigira bhaaye mbeemuka ayo mbagenda ku-nsi ya Ebhuyawudi. ˆNaasaraarira nabho eyo, ˆnaabhatiishaga abhaanu. 23Yowana woone ꞉aariga ˆnaabhatiisha abhaanu Ayinooni eyo, ayeeyi na mw-igunguri rya Saarimu, kwa okubha eyo niwe amanji ꞉gaariga gari maafu. Na abhaanu ꞉bhaariga mbagenda ku-Yowana abhabhatiishe. 24Mu-kabhaga kayo, Yowana ꞉aariga akyari okutuurwa mu-jeera.
25Rusuku rumwi, abheeyigira bha Yowana mbaamba okubhambashaanya na Omuyawudi wumwi iiguru ya gintungwa gya okwiyesha.#3:25 Okwiyesha. Ringira riingʼana Okwera mu-Mangʼana Amakomeeye. 26Niwe mbagenda ku-Yowana, mbamubhwira ati, “Mwiyigisha, omuunu unu ꞉aariga ari na awe ku-ngego ya oruuji rwa Yorodaani, unu ꞉waakibhwiriiye amangʼana gaaye, Omwene woone kaabhatiisha. Na abhaanu bhoone kutyo abhamuuja-ko!” 27Yowana ˆnaabhasubhya ati, “Omuunu atakutura okuramira engʼana ryoneryone, raabhe atayaaywe na Nyamuwanga okusooka mu-rwire. 28Emwe ni emwe ꞉mwoonguuywe nimbabhwira ati ‘Anye nitari Kiriisitu, tari Nyamuwanga ꞉aantumire nitangate, Kiriisitu akyari okuuja.’ 29Omwenga ni wa omugabhusi. Anye niri rwa insendekereja ya omugabhusi, niyambaaye ku-mbarika yaaye, na enijomerwa muno okuungwa riisi ryaye. 30Mmbe obhujomerwa bhwani bhwakuumira. Eyeendwa Yeesu abhe iiguru, nawe anye nibhe emwaro.”
Amangʼana ga unu asookere mu-rwire
31Unu kaaja okusookerera mu-rwire, ari na obhuturo okukira abhaanu bhoone kutyo. Unu kaasookerera mu-kyaro, obhusimukwa bhwaye ni bhwa mu-kyaro, kaaika amangʼana ga mu-kyaro munu. Nawe unu kaaja okusookerera mu-rwire, ari na obhuturo okukira abhaanu bhoone kutyo. 32Omwene, ganu ꞉aarorere na okuungwa, nigo kaabhwira abhaanu. Nawe atariwo muunu unu keekirisha amangʼana gaaye. 33Omuunu woonewoone unu keekirisha amangʼana gaaye, kaamenyegesha ati Nyamuwanga ni wa kimari, 34kwa okubha Nyamuwanga ꞉aatumire Yeesu insonga aaike amangʼana gaaye. Nyamuwanga amuyaaye Mwoyo Omutaakatiifu atari na dengo. 35Ese Mwana eendere Omwana waaye, na amuyaaye obhuturo ku-bhiinu bhyone kutyo. 36Omuunu woonewoone unu keekirisha Omwana wa Nyamuwanga, kaanyoora obhurame bhunu bhutakuweera. Nawe unu atakumwikirisha, uyo ataribhunyoora, tari Nyamuwanga arigenderera okumubhiiyirirwa.
Šiuo metu pasirinkta:
Yowana 3: kya
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2023, Wycliffe Bible Translators, Inc. All rights reserved