Jɔn 2
2
Yezu vei kadiri Kana ne
1Da yatɔ dɛ dem déem na yi to, ba maa wora ba ke kadiri Galili teo kodwoŋi ne, ko yere mo Kana. Yezu nu maa tɔge o wora. 2Ba déem bwoŋi Yezu de o kwaga tɔgena bam mo se ba de ba da. 3Ba na wora to, sa-soŋo kom ba na jege ba nyɔ to ma ti. Yezu nu ma ta ded‑o o we, “Ba daa ba jege sana se ba nyɔ.” 4Yezu ma leiri o we, “A nu, nam yage a yera. Amo maŋa kam ta wo yi.” 5O nu wom laam ma ta de wodi-keira bam o we, “O ná tage kolo maama, se á ke.”
6Kambi-zɛ seredo déem maa zege da. Kikeiri-bia finlei naa fintɔ mo wó su se dedoa. Se ya maŋe se zege da mo se nɔɔna taa mae se wo na bam ba se ba jea de ba nɛ, ne Juu tiina chullu tem na bere tei to. 7Yezu ma ta de wodiu keira bam se ba mɔ na ba su kambi sem ni. Ba ma mɔ ba pɛɛle se ni. 8O daa ma ta-ba o we, ba laam mɔ kambi sem wone ba ja ba vo ba pa wolo na nii kuri dem baŋa ne to. Ba ma seene ba ke konto. 9O ma nyɔ na bam, dedaane ba maŋe ba ji sa-soŋo mo. O ma yeiri sana bam konto na nwoŋi mɛ, ye wodi-keira balo na mɔɔne na bam to mo yei. Nɔɔno wolo na nii kuri dem baŋa ne to laam ma bwoŋi kan-baro wom o ta ded‑o o we, 10“Nɔɔno maama yeini o pa sa-ŋona mo yiga ye ba nyɔ. Ba laam ná yeini ba nyɔ ba su, o ma pa-ba sa-yɔɔ se ba nyɔ. Nmo nam kwei sa-ŋona bam n zege, se n laam daare n kwei n pa debam kwaga ne. Ko kuri mo bɛ?”
11Mo Yezu na dɛ yiga o ke wo-kenkagele delo. O déem ke-de Galili teo Kana wone mo, se ko bere nɔɔna o na jege dam delo to. O kwaga tɔgena bam na nɛ to, ba ma ke ba wo-dedoa ded‑o.
12Konto déem na kɛ to, Yezu, de o nu, de o nyaana, de o kwaga tɔgena bam ma vo Kaparenia ba ke da fenfee da.#Matiyu 4:13
Yezu na zo Wɛ diga kam o ke kolo to
Matiyu 21:12-13; Maake 11:15-17; Luka 19:45-46
13Ko déem ma daare fee se Juu tiina di ba kuri delo yere na ye Atɔgebabaŋa to. Yezu ma zaŋe o vo Jerusalem. 14O na yi da to, o ma vo o zo Wɛ diga kam. O ma na nɔɔna na jege naane, de pei, de kunkwon-puura ba yeiga ka konkɔlɔ kom ne. Nɔɔna balo na leini sabia to de maa jei da. 15O ma kwei ŋone o ma ke fena, ye o daare o zeili pei sem de naane dem maama pa de nwoŋi lela. O ma ja sabu-leinna bam tabollo o pipiri o de tega ne pa se ba sabu-mumugu kom jage. 16O ma daare o ta nɔɔna balo de na yeigi kunkwon-puura bam to o we, “Nam kwei-ba á ja á nwoŋi ywo-seeni. Amo bá sɛ se á pa amo Kwo Wɛ sɔŋɔ kom taa ye pipiu jeiga.”
17Yezu na ke tei konto to, o kwaga tɔgena bam ma guli ko na popone Wɛ tɔnɔ kom ne tei ko we, “Amo tiini a toŋe de yi-seena a pa nmo wara-jei sem mo.”#Lei 69:9
18Juu tiina bam laam ma bwei Yezu ba we, “Bɛ ŋo wo-kenkagele mo nmo wó ke se ko pa dé maane we nmo jege chwoŋa se n zeili nɔɔna bam konto?” 19Yezu ma leiri-ba o we, “Abam ná mage Wɛ diga kanto maama á de tega ne, amo wó jwoori a kwei da yatɔ mo a ma lɔ-ka a zege.”#Maake 14:58 20Ba laam ma ta ba we, “Ba kwei bena finna-yaredo (46) mo ba ma ba lɔ Wɛ diga kanto ba ti. Nmo nam lage n ke tɛ mo n ma da yatɔ yerane n ma‑n pa ka zege?” 21Yezu nam na ŋɔɔne Wɛ diga kam taane konto to, ko ye o tete yera yam taane mo o taga. 22Ko déem na tu ko yi maŋa kam Yezu na tega, ye o jwoori o bi da yatɔ dɛ ne to, o kwaga tɔgena bam laam guli o na tage tei to. Ba ma sɛ kolo na popone Wɛ tɔnɔ kom ne to de Yezu ni taane dem.
23Yezu déem ma maŋe Jerusalem ne se o tɔge o di Atɔgebabaŋa kuri dem o ti. Nɔɔna dedɛ ma na wo-kenkagela yalo o na ke to, pa se ba da o yere ŋwaane ba ke ba wo-dedoa ded‑o. 24Yezu déem nam wo yage o wo o pa-ba, kolo ŋwaane o yei nɔɔna maama na ye tei to. 25O maa ba lage se nɔɔn-nɔɔno bere‑o nabiina na ye tei to, o na maŋe o yei kolo na wo nabiinu maama bochare ne to ŋwaane.
Šiuo metu pasirinkta:
Jɔn 2: KBG
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2020, Ghana Institute of Linguistics, Literacy and Bible Translation (GILLBT)