Lɔgɔ Sabba 1
1
Lɔga Bere Kèghendonɛa Ba Ko Tumu Ko Zugo Ko Aha Kumulɔng
1Bere sabbɔ Tumu ghendono ba ko tumu. 2Na ngakaldonu ba bere iho hɔlɔng. Na iho ke na bo rudhinɛna iho gɛrrɛng gɛrrɛng na ba kumulɔng ulubbɛa ꞉ma na anna mugur. Na Kuloya Tumu ɛlɛlɛwannɛna ma tundɔ.
3Na koo Tumu seu, “Ba any kete hɔli!” Na teu. 4Na gɔnyu bhɛa hɔldin anɛa challi. Na ngɛru. Na hɔldin ojju bhichang, mugur ojju bhichang. 5Na hɔldin tɔgɔdhɛsɛ sara na eliu “kali,” na mugur eliu “bar.” Na bho baru na aru na ngaunggonu te unga sabbune.
6Na koo seu, “Any kɔtɔlɔ bhee ku tolu ngɛrnɛnɛ ma.” 7Na koo ngɛru. Na ma gen tɛldi bay, gen tɛldi tumɔ. 8Na bhɛa ku tolu tɔgɔdhɛsɛ sarre kèe “tumu.” Na bho baru na aru na ungo te ramman.
9Na koo seu, “Ngamaya ɛl bayte any kegendɛ na han gen kete dhɔrɔgɔsi,” na bhugnyɛsɛ damiyaa yokkonɛa. 10Na hana dhɔrɔgɔsa tɔgɔdhɛsɛ sarre kèe “ba.” Na hana muginɛnɛa ma tɔgɔdhɛsɛ sarre kèe “yirsɛna.” Na aru bhɛa anɛa challi. 11Na seu, “Ba any kichilday kɛna lɔmma kawarɛ ko ahaa kàmma tayɛn kari.” Na teu. 12Na ba childay kɛna lɔmma kawarɛ ko ahaa kàmma tayɛn kari. Na aru bhɛa anɛa challi. 13Na bho baru na aru na ungo te sizzi.
14Na nɔng seu, “Tumu tundɔ any kɔtɔlɔ gala waldɛa na kàtaktɛ bar ko kali na karaktɛ bɛrgunya ko oynya.#1.14 Tuga Hibiru se, “...na karaktɛ bɛrgunya ko kaliɛna ko oynya.” 15Na kɛtɛldi tumɔ na keterinyi ba.” Na teyo. 16Na tegenyo gala waldɛa bo bibiyo ramman na kona keteriny ba kaliyɔ, kona keteriny ba barɔ. Na tegenyo munyunya sɛgɛn. 17Na ibha ngagalda bu waldɛye na ojju tumɔ na keterinyi ba. 18Na kona kalliyɛy bar, kon kalliyɛy kali na kɛngɛrɛ mugur ko hɔldin. Na aru bhɛa anɛa challi. 19Na bho baru na aru na ungo te wush.
20Na seu, “Ma any kɔtɔlɔ ahaa bo mɛra bhakkɛa toye. Na shɔa ko yɔk any kɔtɔ tumɔ.” 21Na tegenyo guchurɛna bo bibiyo bhakkɛa ma toye ko urgusa ko ahaa ma toyne gen ko shɔa doriyo doriyo. Na aru bhɛa anɛa challi. 22Na tuhu na sɛɛsɛ, “Ahaa bhakko ma toye, bhɛldɛ na tɛhɛtɛy ko maa yirsɛnnuny. Na shɔa ko yɔk any kɛbhɛldɛ bay na kete mɛri.” 23Na bho baru na aru na ungo te hayna.
24-25Na seu, “Ba any kɔtɔlɔ ahaa kìwoo ko kɛginyaa dusuny ko ahaa silolnɛna bay bay ko ga chicho chicho gen doriyo doriyo.” Na damiya senɛa tegenyo kɛginyaa dusuny ko ahaa kìwoo ko ahaa silolnɛna bay bay ko ga chicho chicho gen doriyo doriyo na teyo. Na aru bhɛa anɛa challi. 26Na koo seu, “Ga kètegenydo zugo ɛya na, na kɛ̀tɛhɛyɛ ko agge. Na kɔtɔlɔmɔ buyn na kalliyɛy ngaahaya ɛl bayte kumulɔng, urgusa ko shɔa ko ahaa kìwoo ko ahaa silolnɛna bay bay ko ga chicho chicho gen kumulɔng.”
27Na Tumu tegenyo zugo ɛya nɛnɛ. Na kona te may, kona te ngahi. 28Na tuhu na sɛɛsɛ, “Bhɛldɛ na tɛhɛtɛy ko ba. Na ba any kete na nu. Na ahaa ɛlla bay kumulɔng alliyɛy ꞉iggeu. 29Ngaahaya ɛl bay ngaya chillɛ ku kɛnɔye ko ngalanyda lɔmmɛ kawarɛye, any ke amissɛte kajjung na ammoye. 30Na kɛginyaa dusuny ko ga kìwoo ko shɔaa bansɛa tumɔ ko ahaa silolnɛna bay bay ko ga chicho chicho gen kumulɔng, yɔk any kɛghɛ lanya ko bhalloga na kete amissɛte nɛ ammɛye.” Na teu. 31Na aru ahaa ghendono bhoy hunde a challi gooreye. Na bho baru na aru na ungo te illɛy.
Šiuo metu pasirinkta:
Lɔgɔ Sabba 1: SUQ
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©2023 Suri Translation Project which is a project of the Ethiopian Evangelical Church Mekane Yesus