मत्ती 9
9
दरांगा रअ रोगी ठीक करनअ
(मरकुस 2.1-12; लूका 5.17-26)
1तेहुकी यीशु किस्ती में चढ़ी करे समुन्द्रा रे पारा फेरा बे नाठअ, होर आपणे नगरा में आउअ। 2होर हेरा, कई लोका दरांगा रे एकु रोगी मांजे पैंदे चुआकी करे तेऊ सेटा बे आणु। यीशु त्यारा बुशाह हेरी करे, तेऊ दरांगा रे रोगी बे बोलू, हे शोहरूआ, होसला डाह; तेरे पाप माफ होई। 3एता मे कई शास्त्री सोचु, यह तअ परमेश्वरा री निंदा करा। 4यीशु त्याह रे मना री गला जाणी करे बोलू, तमे लोका आपणे-आपणे मने बुरा बचार किबे करा? 5ठीक कैह साहा? यह बोलणा, तेरे पाप क्षमा होई, या यह बोलणाा उठ होर हांड फिर। 6पर एतकी तणी की तमे जाणा कि महा मणशा रे शोहरू धरती पैंदे पापा क्षमा करने रा अधिकार साहा। तेबा तेऊ दरांगा रे रोगी बे बोलू, उठ आपणे मांजे चुआक, होर आपणे घरा मे नाहं। 7सह उठी करे आपणे घरा बे नाठअ। 8लोका यह हेरी करे डरी होर परमेश्वरा री महिमा करदे लागे जूणी मणशा बे एडा अधिकार दिंना दा साहा।
मत्ती शादणअं
(मरकुस 2.13-17; लूका 5.27-32)
9तखा का जेह नाही करे यीशुये मत्ती ना रअ एक मणश चुंगी घरा री चौकी में बेठअदअ हेरू, होर तेऊ बे बोलू, महा पीछे इच्छ। होर सह उठी करे तेऊ पीछे नाठअ। 10जेबा सह घरे रोटी खांदअ बेठअ तेबा बहू चुंगी मांगण आले होर पापी इच्छी करे यीशु होर तेऊरे चेले संघे रोटी खांदे बैठे। 11यह हेरी करे फरीसी तेऊरे चेले बे बोलू, थारअ गुरु चुंगी मांगण आले होर पापी संघे किबे खांदा? 12यह शुणी करे यीशु तयाबे बोलू, बईद भले चांगे बे नांई पर बमारा बे जरूरी साहा। 13एतकी तणी तमें नाहीं करे एतका अर्थ सिखा: हाऊं बलिदान नांई पर दया चाहंदा। किबेकि हाऊं धर्मी बे नांई, पर पापी शादअ आउअ साहा।
ब्रता रअ प्रश्न
(मरकुस 2.18-22; लूका 5.33-39)
14तेबा यूहन्ना रे चेले तेऊ सेटा इछी करे बोलू, कैह बजा साहा की हामे होर फरीसी एतरे ब्रत करा, पर तेरे चेले ब्रता नांई करदे? 15यीशु तयाबे बोलू, कैह बराती, जेबरे तणी लाडअ त्याहे संघे साहा, शोक करी सका? पर सह धयाड़ इहंणी जेबा लाडअ त्याका अलग करनअं, तेऊ वक्ते त्याह ब्रत करने । 16पुराणे झिकडे पैंदे पूराणे झिकड़े री शाटी कोहे नांई लाउंदे, किबेकि सह शाटी तेऊ झिकड़े कुछ होर खींचा, होर सह ज्यादा चीरा। 17होर लोका नउंआँ अगुरा रा रस पूराणी मशका में नांई भरदे, किबेकि एडा करने में मशका फूटा, होर अगुरा रा रस बहंदा होर मशका नष्ट हुँदा; पर नउंआँ दाखरस नउंईं मशका में भरा होर दुहे बची रहंदा।
मुईन्दी शोहरी होर बमार बेटड़ी
(मरकुस 5.21-43; लूका 8.40-56)
18सह त्याह संघे एया गला थी लागद कि भाला एकी सरदारे तेऊवे झुकी करे नमस्ते करी होर बोलू मेरी शोहरी एब्ररे मुईन्दी साह पर तूह हांड़ी करे तेसा पैंदे आपण हाथ ढाह तेबा सह जिऊंदी दी हुणी। 19यीशु उठी करे आपणे चेले संघे तेऊ पीछे हांड़ी। 20होर हेरा, एक बेटड़ी जासु बारह बर्षा का लोहू बहणे रा रोग थी, पीछा का इच्छी करे तेऊरे झिकड़े रअ पूंझ छुंहूँ। 21किबेकि सह आपणे मने बोला थी, अगर हाऊं तेऊरे झिकड़े ही छुली तेबा हाऊं ठीक हूँणी। 22यीशु फिरी करे भाली होर बोलू, पुत्री नांई डरे ; तेरे बुशाहे तुह ठीक करी। पर सह बेटड़ी तेभरी ठीक होई। 23जेबा यीशु तेऊ सरदारा रे घरे पुजू होर वीणा बाज़णे आले होर भीड़ हुल्लड़ मचाउंदी हेरी, 24तेबा बोलू, पीछे हटा, शोहरी मुंईं नांई, पर सूती दी साहा। एता में त्या तेऊरे मज़ाका करदे लागे। 25पर जेबा भीड़ बागे काढी, तेबा तेऊ मितर नाहीं करे शोहरी रअ हाथ ढाकु होर सह जिउंदी होई। 26होर एसा गला री चर्चा तेऊ सारे देशे फैली।
दुई काणे बे दृष्टिदान
27जेबा यीशु तखा का जेंह नाठअ, तेबा दुई काणे तेऊ पीछे यह पुकारदे चली, हे राजा दाऊदा री संतान, हामा पैंदे दया कर! 28जेबा सह घरे पुजु, तेबा त्याह काणे तेऊ सेटा बे आउए, होर यीशु तयाबे बोलू कैह तमा बुशाह साहा कि हाऊं तमा ठीक करी सका? त्याहे तेऊबै बोलू, ओह प्रभु! 29तेबा तेऊ त्याह री आछी छुहीं करे बोलू, थारे बुशाह रे साबे तमाबे हो। 30होर त्याह तेबरी हेरदे लागे। यीशु तयाबे चिताई करे बोलू, साबधान, कोहे भी एसा गला नांई ना ज़ाणे। 31पर त्याह निखल़ी करे सारे देशे तेऊरे एउ कामा रा प्रचार करू।
एक कालअ ठीक करणअं
32जेबा त्याहे दुई आंधे मन्श बागे नाहंदे ही, तेबा हेरा, लोका एकु कालअ जासु में दुष्टात्मा भी थी, तेऊ सेटा बे आणू; 33होर जेबा यीशुये दुष्टात्मा काहडी, तेबा कालअ मन्श बोलदअ लागअ। एता में भीड़ परेशान होई करे बोलू, इस्राएला में एडा कधी नांई हेरू। 34पर फरीसी बोलू, यह तअ दुष्टात्मा रे सरदारा री सहायता का दुष्टात्मा काहडा।
मजदूर थोड़े साहा
35यीशु सभी गलीला रे नगर होर ग्राएं फिरदअ रहू होर त्यारे प्रार्थना घरा मे शिक्षा दीनद रहू होर राज्य रा सुसमाचारा प्रचारा करदअ होर हर तरहा री बमारी होर कमजोरी ठीक करदअ रहू। 36जेबा तेऊ भीड़ हेरी तेबा तेऊ लोका पैंदे दया आई, किबेकि त्याहा भेडा बराबर साहा जासकअ कोई रखबालअ नांई आंधअ, ब्याकुल होर भटकी दे साहा। 37तेबा तेऊ आपणे चेले बे बोलू, पाके खेच बहू साहा, पर मजदूर थोड़े साहा। 38एतकी तणी खेचा रे मालका बे बिनती करा कि सह आपणे खेचा काटणे बे मजदूर भेजे।
Šiuo metu pasirinkta:
मत्ती 9: ISJNT
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.