Rôm̃i 2
2
1Gô ntyugu yi Pentekôte waôdu w’avegagi dataṉa pe mbôra mô. 2V’igamba ny’agwaṉa aṽyeṉ’inyôy avila g’ôrôṽa egolaṉi g’inyôy ny’ômpung’ôyoli, n’ayônyi nyô nagô yôdu y’avegagi waô dwaṉa pa barugebaru. 3N’awôm̃unyi gôre waô iṉèm̃è keraṉa pa, egolaṉi g’iṉèm̃è y’ôgôṉi, n’alwaṉi yô gôr’ôm’edu gôre waô. 4N’ayônyi waôdu n’Iṉiṉ’Iṽya, avakilya gô kamba n’inkambiṉi sinyèṉè, ga nt’avenyô waô n’Iṉiṉ’Iṽya ngulu yi kamba.
5Avegagi dwaṉa pa gô Yerusalèm Iju, aṉaga w’azaviṉagi Anyambyè, avila gw’aṉongo môdu mi re gô ntye. 6Na gw’ayogaṉô inyôy mènyoṉo, alataṉ’aṉag’awenge, am̃ama konde ôm’edu ayogyô waô wi kamba ni nkambiṉi yèmè. 7N’am̃ami waôdu am̃ama, awulyaṉa inè: Vônaṉi, aṉaga wiṉo wi kamba, waôdu aranga mongi Galile? 8Ntiṉa nde yi jogo zwè ôm’edu e kambe nkambiṉi yazômè, y’ayanyô zwè? 9Parti, Maday, Elam, na waô wi dwaṉa gô Mesôpôtamya, ni Yuda, ni Kapadôsya, ni Pontus, n’Azya, 10ni Frijya, ni Pamfilya, n’Egipt, na gw’inkôṽa si Libya pyèrè ni Sirèn, na waô w’avili gô Rôma, Iju n’aṉongam̃a ta, 11ni Krèti n’Arabe, ntiṉa nde yi jogo zwè waô wi kamba ni nkambiṉi yazô ijanja si ngulu s’Anyambyè? 12N’am̃ami waôdu, alôṽe mpaga, awulyaṉa inè: Ôsam̃u wiṉo wi pivya sèṉi? 13Ndô am̃ori w’azèlyagi awulya inè: Wi re jonga p’iv’inyoṉa.
14Vovo Pyère agum̃aṉi, ayè n’igôm̃i nyi rôm̃i n’erôm̃i em̃ori, arômbiṉ’inyôy nyè, awulinya waô inè:
Aṉwè aṉôm̃e wi Yuda, n’aṉwèdu yi dwaṉa gô Yerusalèm, myaṉ’ôsam̃u wiṉo, ko pôganyôṉi agambi mam̃! 15Aṉaga wiṉo wi zele bongô pa, ga nte pikilya ṉwè, konde nyiṉo n’igwèra ny’ararô ny’ôwenja. 16Ndô nyiṉo n’igamba ny’awulyô n’ôvogisi Yôèl inè: 17E be twa gw’intyugu iṉum̃uṉa, buly’Anyambyè, inè, mi be jir’Iṉiṉi nyam̃ gw’izôṉe yôdu; awaṉi waṉi aṉôm̃e n’awaṉi waṉi antô wi be poga, n’awanjo maṉi mi be jeṉ’isam̃u yi mamô, n’aṉèro saṉi wi be jinô inyinô. 18Na gw’intyugu mèsoṉo, mi be jir’Iṉiṉi nyam̃ gôr’inyôngô sam̃ iṉôm̃e, na gôr’inyôngô sam̃ inyantô, ko waô poga. 19Mi be tum̃inya kè isam̃u yi mamô gw’igôṉô ny’ôrôṽa ni lemba gô ntye, ntyiṉa, ôgôṉi, n’ôlumbôtôṽa w’ôtutu; 20nkômbe yi be kalwe mpiri, n’ôgwèli wi be kalwe ntyiṉa, ntyugu ya Rerè, ntyugu mpôlô mèyoṉo n’ônjèlènjèlè ṽyagaga ro. 21E be twa inè, ôm’edu e be dagiṉ’ina nya Rerè e be sungiṉô.
22Aṉôm̃e w’Israèl, vôganyôṉ’agamba miṉo! Yesu yi Nazarèt, ôṉôm̃e mè w’arum̃inyô n’Anyambyè gôre ṉwè ni lemba, n’isam̃u yi mamô ni lingilyô y’avangyô n’Anyambyè vo yè gô garegare yaṉi, ga nte mya ṉwè aṉwèmè; 23ôṉôm̃e mè avenyô ga nt’agenjyô ni nt’avegag’imya s’Anyambyè gô mya isam̃u ya bôsô, aṉw’aṽanyi yè gô krosi, ayôṉizè n’ago m’ivavisi. 24Ndô Anyambyè arôngunyi yè avila gw’ijuwa, avuruṉè igôrô y’ijuwa, konde alwaṉe nè, ayè ko simbyô ne sô. 25Konde David e bulya g’ômwanji wè inè: My’ayeṉi Rerè g’ôzô wam̃ pèkèpèkè, konde are g’ôgo wam̃ ôṉôm̃yè, inè, my’azugyazugyô. 26Yeṉo ayeṉi ôrèm̃i wam̃ mbya, n’ôṉèm̃è wam̃ w’ayeṉ’igeṽa; ôzôṉe wam̃ kè wi be dwaṉa n’igum̃u, 27konde awè ze tig’iṉiṉi nyam̃ gw’ilômbô, ge wè tig’Ômi wo wi nkèrè gô jeṉ’iboṉa. 28Ô re myeza pa myè impoṉo s’em̃èṉo, ô be jônya myè n’igeṽa g’ôzô wo.
29Awarera, mi ga wulinye ṉwè buku, g’ômwanja wa reri yazô nônga David inè, ayuwi, aṽèṉô kè, n’ôrôngiṉô wè wi p’are na zwè kwanga ṉèṉo wiṉo. 30Yeṉo gô re nè, ayè ôvogisi, amyeṉi nè, Anyambyè aliwô apangiṉi na yè arang’ôrangô inè, e be dwaṉiz’ôm̃ori avila gôr’awaṉi wè gw’eki zè, 31ayè njeṉag’igamba egômbe ṽyagaga ro, agambi g’ômwanja w’itôngunyô si Krist inè, e ze tigô gw’ilômbô, na inè, ôzôṉe wè w’ayeṉ’iboṉa. 32Wiṉo ne Yesu y’arôngunyô n’Anyambyè avila gw’ijuwa, n’azwèdu azwè n’iyeṉi y’igamba. 33Sambô ayè pendyô pa n’ôg’ôṉôm̃yè w’Anyambyè, awong’Iṉiṉ’Iṽya avila gôre Rerè ny’avanganyô yè, ayira nyô ga nte jeṉa ṉwè nyô ni nte jogo ṉwè nyô. 34Konde David e pa panda g’ôrôṽa, ndô ayèmè e bulya inè: Rerè awulinyi Reri yam̃ inè: Lwaṉa baru g’ôgo wam̃ ôṉôm̃yè, 35kaô my’apang’ilôvalôvi yo iyariṉô ny’agôlô mo. 36Sambô nagô y’Israèl yôdu yi ga mye rèti inè, Anyambyè are panga pe Yesu yiṉo y’aṽanyô ṉwè gô krosi, Rerè ni Krist ta.
37Waô jogo p’agamba miṉo, w’arum̃yô gw’irèm̃a, n’awulinyi waô Pyère ni rôm̃i mori inè: Awarera, azwè ga lende sèṉi?
38N’awulinyô waô ne Pyère inè: Ṉigaṉi nkôndi, ko batizôṉi ôm’edu gôre ṉwè gw’ina nyi Yesu‐Krist, gw’inyeza s’ibe, gambèṉè aṉwè be pô Iṉiṉ’Iṽya. 39Konde ômpangaṉô wi re gôre ṉwè, na gôr’awaṉi waṉi, na gôre waôdu wi re bô, vangaṉe ntangô mpôlô yi be fweyô ne Rerè Anyambyè yazô gôre yè. 40N’azômbyi yè n’agamb’amèṉè am̃enge arevuṉa waô, awulya inè: Zungiṉôṉi avila gw’ivôm̃a nyiṉo ny’arègo.
41Na waô w’ayivir’igamba nyi Pyère w’aṽatizyô; na gô ntyugu mèyoṉo agundyô gô ntangô y’iṉèngi pyèrè ni ntozèny s’aṉaga ntyarô.
42Alwaṉagi waô jolajola gw’inènja si rôm̃i, agangaṉaga ta gw’imoguṉa si mpèmba na gw’ikambiṉa egômbe zôdu. 43N’aṽyeṉ’itya gôr’ôm’edu, n’isam̃u yi mamô imyenge ni lemba y’alendyô ne rôm̃i. 44Na waôdu w’aṽekelyi w’avegagi mbôra mô, alwaṉa ni yom̃i yaô yôdu ta. 45N’agôlagi waô aṉivi maô n’agumbi maô, n’ageragi waô yom̃a y’alèngyô waô gôr’aṉaga waôdu, ôm’edu nt’avegagi yè n’isolo. 46Ni ntyugw’edu w’alwaṉagi n’ôrèm̃’ômô gô nagô y’Anyambyè, amoguṉe mpèmba gw’inagô saô, n’awongagi waô inyi saô n’igeṽa n’ôrèm̃’ômbya, 47nsum̃inyag’Anyambyè, n’azum̃inyô waô kè n’aṉaga waôdu. N’agundi Rerè ntyugw’edu gô mandô mongi wi sungiṉô.
Šiuo metu pasirinkta:
Rôm̃i 2: MYE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Published by the British and Foreign Bible Society in 1927.