Luka 20
20
O Pilicay to Pakayniay i Nika Citodong ni Yis
(Matay 21.23-27; Maroko 11.27-33)
1Yo ccay a romi'ad pasifana' ci Yis to finawlan i Fangcalay Pita'ongan a patnak to Nga'ayay Ratoh. Itiya i, ira ko kakridan no citodongay to ta'ong ato pasifana'ay to Rikec ato kalas no niyaro' a miraod i ci Yisan 2a milicay, <<O maan ko sakacitodong Iso a midmak tonini? Cima ko papidmakay Tisowanan tonini a sakacitodong saw? Pasowalen kami!>> han nangra.
3Saka, paca'of sa ci Yis i cangraan, <<Li'ayawen Ako a milicay kamo to ccay. Paca'ofen Kako, 4o nipipaino' ni Yohani i, o nano Kawas ano ^ca i, o nano tamdaw haw?>> han Ningra.
5Satapang sato a malaliyaliyang cangra a somowal, <<Samaanen ita ko pipaca'of hakiya? <Ano nano Kawas,> ano han ita a pasowal i, <Ano hatira i, nawiro caay paso'lin kamo i ci Yohanian?> asa ci Yis i titaanan. 6Nikawrira, <Ano nano tamdaw,> ano han ita a pasowal i, o papaloen no finawlan to fokloh kita a mipatay. Nawhani o pali'ayaway to sowal no Kawas ci Yohani saan ko nika tanektek no paso'lin nangra,>> saan cangra. 7Orasaka, <<Ano nano nima i, caay ka fana' kami,>> han nangra a paca'of ci Yis.
8Ta pasowal sa ci Yis i cangraan, <<Ano hatira i, caay pasowal Kako i tamowanan to nika o maan ko sakacitodong Ako a midmak tonini,>> han Ningra.
O Tinako to Tatiihay a Mifoloday
(Matay 21.33-46; Maroko 12.1-12)
9Do^do sa i, pasowal ci Yis i cangraan to ccay a tinako. Sowal sa, <<Ira ko ccay a misafadisoso'ay a tamdaw. Pacaliw han ningra ko mifoloday to pisafadisoso'an ningra. Ta lomowad cingra a talaraay a palafang to pinapina a folad. 10Yo maraodto ko pilitodan to fadisoso' i, ocoren ningra ko koli ningra a patayra i mifoloday a papiala to lilam ningra. Nikawrira, paloen noya mifoloday konini a koli a pawakawak a papinokay. 11Ocoren haca no tawki no pisafadisoso'an ko roma a koli. Nikawrira, haenen nangra a mipalo cingra a mipakangodo, ta pawakawak han cingra a papinokay. 12Sakinatolo to i, ocoren haca no tawki no pisafadisoso'an ko ccay a koli. Nikawrira, padoka' han no mifoloday cingra ta malaplap a mapasadak. 13Sowal sa koya tawki no pisafadisoso'an, <Samaanen ako ko dmak hakini? Ocoraw ako ko kaolahan ako a wawa. Latek kangodoen nangra cingra kiya,> saan. 14'Arawhani, yo ma'araw noya mifoloday konini a wawa no tawki no pisafadisoso'an i, sasowasowal sa cangra, <O mamirocok to omah no tawki no pisafadisoso'an konini a tamdaw. Patayaw ita cingra. Ta o no mitato konini a omah ningra,> saan. 15Saka, rpet han nangra koya wawa a pasadak a mipatay i papotal no pisafadisoso'an.
<<Ano hatira i, maanen noya tawki no pisafadisoso'an ko dmak i mifoloday hakiya? 16Caay ka^ca o tatayra cingra a mipatay cangraan. Ta o papatoroden ningra i roma a mifoloday koya pisafadisoso'an,>> han ni Yis.
Mitngil ko tamdamdaw tonini i, <<O awaawaay aca ko matiniay a dmak!>> saan cangra.
17Nengneng sa ci Yis i cangraan a somowal, <<Ano hatira i, oya
<O kinafalah a fokloh no misaloma'ay a tamdaw i,
malata'enenganto no loma'>
sanay a matilid i Fangcalay Cudad i, o maan ko tatodong norira saw? 18O tahafikoday tonini a fokloh a tamdaw i, o mamafonal a malaaped. Ano onini a fokloh ko matfaday i tamdaw i, o mamalaaped a malaklak koya tamdaw,>> han ni Yis.
O Pakayniay i Pipasata to Hongti no Loma a Licay
(Matay 22.15-22; Maroko 12.13-17)
19Kita ko nisowalan tonini a tinako saan ko pasifana'ay to Rikec ato kakridan no citodongay to ta'ong saka, sapirpetan saan cangra ci Yisan itiya. Nikawrira, matalaw cangra to finawlan. 20Saka, misa'imer cangra to kanga'ayan a romi'ad a mitala. Ocoren nangra ko pinapina a mipa'alofoan a tamdaw a misamatiyaay o so'linay ko faloco' a tamdaw a papilicay i ci Yisan to sapirpetaw to kamoraraw no sowal Ningra. Onini i, o sakanga'ayaw nangra a mipatorod Cingraan i mikomoday a tamdaw a papitfoc. 21Licay sa konini a misamangahay i ci Yisan, <<Singsiaw, mafana' kami to nika o matatodongay ko pipasowal ato pipasifana' Iso ato caay paska Kiso to cimacima a tamdaw, mararid a so'lin ko pipasifana' Iso to sowal no Kawas i tamdaw. 22Pasowalen kami, o pisongila' a pasata i hongti no Loma i, o maliyangay to Rikec ita haw?>> han nangra.
23Nikawrira, mahapinangto ni Yis ko pisa'fit nangra saka, sowal sa i cangraan, 24<<Patiri'en Kako to ccay a tinali! O nima a faco, o nima a tilid konini saw?>> han Ningra.
<<O no hongti no Loma,>> han nangra a paca'of.
25Saka, sowal sa ci Yis i cangraan, <<Ano hatira i, o no hongti no Loma a maamaan i, patikoen i hongti no Loma. O no Kawas a maamaan i, patikoen i Kawas,>> han Ningra.
26Awaay a marpet nangra ko patlac no sowal ni Yis i ka'ayaw no finawlan. Fahka' cangra to nipipaca'of ni Yis saka, trep sato cangra.
O Pakayniay i Nika Lomowad a Ma'orip nai Patay a Licay
(Matay 22.23-33; Maroko 12.18-27)
27O romasato, tayra a miraod i ci Yisan ko, <<Awaay ko lomowaday a ma'orip nai patay a dmak,>> yasanay a Satukay a tamdaw a milicay i Cingraan. 28Sowal sa, <<Singsiaw, matilid ni Mosi ko sowal to saki titaanan toya, <Ano ira ko mapatayay ko kaka, ano caho ka ciwawa koya nisidayan ningra a fafahi i, o kakalafafahien no safa koya nano fafahi no kaka ningra a pawawa to malotloc no kaka ningra,> saan. 29Ira i 'ayaw ko papitoay a malikaka to matiniay ko dmak. Cifafahi ko sakakaay. Caho ka ciwawa i, mapatayayto. 30O sakatatosa i, cifafahi toya maponengay a nano kaka a fafahi. 31Oya sakatatolo i, cifafahi toya fafahiyan. Mahaen cangra a papito a cifafahi toya fafahiyan. Caho ka ciwawa i, mapatayayto. 32Saikoray sato i, haloyato a fafahiyan a mapatay. 33Ano hatira i, ano kalomowadanto a ma'orip nai patay i, cima ko cacifafahi toya fafahiyan saw? Nawhani papito cangra a cifafahi toya fafahiyan,>> han nangra.
34Pasowal sa ci Yis i cangraan, <<O nonini a hkal a tamdaw i, cifa'inay, cifafahi cangra. 35Nikawrira, o matatodongay a lomowad a ma'orip nai patay a micomod i kakarayan i, caayto ko caciramod. 36Caayto ko mamapatay, o mamatiyato o coyocoyoh cangra. O wawato no Kawas cangra, nawhani o nalomowaday a ma'orip nai patay cangra. 37O pakayniay i nika 'orip no mapatayay i, mapahapinangto ni Mosi i sowal ningra toya malikatay a fadal ko nika o Tapang i, <O Kawas ni Apraham, o Kawas ni Isak, o Kawas ni Yakop> ko Tapang saan. 38O tatodong nonini a sowal no Kawas i, o pa'oripay ko Kawas to mapatayay a tamdaw sanay. Saka, o Kawas i, o Kawas no ma'oripay, caay ko Kawas no mapatayay,>> han ni Yis.
39Pasowal sa ko papinapina no pasifana'ay to Rikec, <<Singsiaw, nga'ayay ko sowal iso,>> han nangra. 40Nanitiya a paskato ko tamdaw a milicay i ci Yisan to salicay.
O Pakayniay i ci Kristoan a Licay
(Matay 22.41-46; Maroko 12.35-37)
41Kirami, pasowalen ni Yis cangra, <<Nawiro o tloc ni Tafiti han no tamdaw ci Kristo saw? 42O sowal ni Tafiti i nitilidan ningra a 'Olic i,
<Pasowal ko Tapang to Tapang ako,
kamaro' i kawanan Ako,
43tangasa i papihinokopan Ako to 'ada Iso i pasaripa'an Iso,> saan.
44<O Tapang> han ni Tafiti Cingra a mitahidang. Ano hatira i, maanen ni Kristo a malatloc ni Tafiti saw?>> han Ningra.
O Pitoro' ni Yis to Pasifana'ay to Rikec
(Matay 23.1-36; Maroko 12.38-40)
45Yo mitngil ko finawlan a ma^min to sowal ni Yis i, pasowal ci Yis i nisawawaan Ningra, 46<<Pina'on kamo to pasifana'ay to Rikec. Maolah cangra a ciriko' to kakaya'ay a misarakarakat. Maolah cangra a mata'ong no tao i kalali'acaan. O romasato, maolah cangra a maro' i micidekay a kamaro'an i kasa'opoan a loma' ato tadamaanay a kamaro'an i pitahkaan. 47'Afasen nangra ko loma' no maponengay. O sapa'araw aca ko nipitolon nangra to kakaya'ay a pitolon. Saka, caay ko sasamadahen no Kawas ko nipitfoc i cangraan,>> han Ningra.
Šiuo metu pasirinkta:
Luka 20: AMIS2019
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© The Bible Society in Taiwan, 2019