मति 7
7
आरुगेलाइहेङ न्याय मापासु
(लुक 6:37-38,41-42)
1येसु आरोङ दोअ्काताङ हानिहि, ओबालाइहेङ न्याय मापासु कालाउ आबा परमेस्वर बुङ नेलाइहेङ न्याय मापाङ। 2हाइपालिपानु जेसाङ नेलाइ आरुगेलाइहेङ न्याय पासुखेना, एन्साङ पातेङ नेलाइहेङ बुङ परमेस्वर न्याय पावा। परमेस्वर नेलाइ दोफा ठिक इन्सिकाङ ब्यभार पावा, जेसा नाअ् आरुगेलाइ दोफा पाखेना।
3नादोङ ताइको सानाइतिको एनोङ आतुइका दुसिका चुम्तेङ हाइ पालि वाको न्याय पाखेना, जाइ वाको मिसियाँको धुला भाइका हि, कालाउ ताइको बा-बार्का दुसिका माखाङखे, जेदोङ वाको मिसियाँता हिका धेङग्रा भाइका हि। 4जेलाउ नाअ् लिता बार्का दुसिका हि पानु, ताइको खान्तेङ म्हुइका दुसिका हिका द्याङहेङ साघाइलि माभोअ्। 5ओइ कपटिगेलाइ! लाम्फा ताइको बार्का दुसिका सुधार पाअ्, कालाउ न्हुसो नाअ् पुर्न रुपहोइ गोताङ सोमोइ इन्ता नाअ् ताइको सानाइतिको मिसियाँको धुला ओल्लेपालि द्वाना। कालाउ आरुगेलाइको आतुइका दुसिका सुधाराइतेङ साघाइलि द्वाना।
6उङको द्याङगेलाइहेङ परमेस्वरको बचन माहिङ पासु जाइ हिङलि माकिखे। जेसापा नाअ् इसिका पाखेना पानु, या इसिका जेनाङ जेसाङ हिदोइ बुङ पबित्तरो आमेने खियागेलाइको आगाता थाइगिल्लि, माकुनु या भाइका पायाको आगाता मोति थाइगिल्लि, जेदोङ इम्बालाइ याङगिल्लावा कालाउ नासेहेङ चिकावा।
ह्रेसु भोसु कालाउ ढक-ढक पासु
(लुक 11:9-13)
7नेलाइहेङ जेदोङ गोइका हि इङको परमेस्वर दोफा ह्रेसु कालाउ वा नेलाइहेङ प्यावा, भोसुते निङस्वाना, ढकढकाइसु नेलाइको भाअ्सिङ फिनु हेअ्प्यावा। 8हाइपालिपानु जाइ ह्रेखे वा दोङ निनावा, जाइ भोखे वा दोङ निङखे, जाइ ढकढकाइखे, वाको भाअ्सिङ हेअ्नावा।
9नेलाइ मध्येसो हासु बुङ ताइको चानहेङ तोले ह्रेनु उन्ठुइ माप्यावा। 10एसाङ पातेङ हासु बुङ ताइको चानहेङ हाया ह्रेलाउ बिस हिका पुय्याँ माप्यावा। 11नेलाइ मारेम्का जेङतेङ बुङ ताइको चान-चामिन्दिगेलाइहेङ रेम्का आनेमानेगेलाइ पिलि गिसुखेना पानु, झन स्वर्गता हिका नेलाइको परमेस्वर आबा वाको दोफा ह्रेकालाइहेङ झन हेथे रेम्का आनेमानेगेलाइ प्यावा। 12ओदोङ भाअ्सिङ नेलाइ दोफा द्याङगेलाइ हिसिका पाका मन्दा तासुखेना, कालाउ नेलाइ बुङ द्याङगेलाइ दोफा इन्सिकाङ पासु, इदोइ दोङ मोसाको व्यवस्थाता कालाउ परमेस्वरको बक्तागेलाइ लेखेका काथागेलाइको आर्था हि।
चे:का कालाउ फाराका फिनु
(लुक 13:24)
13परमेस्वरको सासनता हानिका दामा चे:का फिनु हि। हाइपालिपानु फाराका दामा कालाउ बारका फिनुसो नरकता चुम्पुखे, कालाउ इदोइ दामा पाहा हानिकालाइते हेन्जा हिखे। 14हाइपालिपानु आतुइका फिनु कालाउ चे:का दामा चाहि मासुकाका हिखे, कालाउ इङको दामासो आनान्त कालको जिबनता थुकापाखे। इदोइ दामासो हानिकालाइ आतुइसा खिनिङ हि।
सिङ कालाउ वाको सेका फल
(लुक 6:43-44; 13:25-27)
15धाताइका बक्तागेलाइसो चङख जेङतेङ हिसु, जाइ हान्ति मापाका भेडाको भेसता भाङगाइतेङ लोखे, कालाउ खात्तिता इम्बालाइ हान्ति पाका स्याइलेगेलाइ दोङ हि, कालाउ इम्बालाइ द्याङगेलाइहेङ झाअ्मिरेखे। 16नेलाइ ओबालाइको काम पाकासो नाल्लि दोस्वाना। हाइ द्याङगेलाइ चुइको झुन्जिसो आङगुर, कालाउ सिउडिको सिङसो आन्जिर पेखे रो माको, इम्बालाइ मापेखे? 17एन्साङ पातेङ गोताङ रेम्का सिङ रेम्का सेका पिखे। कालाउ मारेम्का सिङ मारेम्का दोङ सेका सेखे। 18एनोङ रेम्का सिङ मारेम्का सेका मासेपाखे, कालाउ मारेम्का सिङ रेम्का सेका मासेपाखे। 19रेम्का फलपाकल मासेपाका गोताङ सिङ पाल्तेङ उन्धिपाखे कालाउ मेता जुखे। कालाउ धाताइका परमेस्वरको बक्तागेलाइहेङ बुङ एसापाङ दन्ड प्याङ। 20एसापा नेलाइ धाताइका आगमबक्तागेलाइ ओबालाइको पाका कामसो दोङ नाल्लि दोस्वाना।
21कासेहेङ प्रभु-प्रभु, दोअ्का गोताङ द्याङ परमेस्वरको सासनता दुल्लि मानिनाङ। कालाउ जाइ दोङ स्वर्गता हिका काङको परमेस्वर आबाको इच्छा पाखे। इम्बालाइ दोङ इन्ता दुल्लि निनावा। 22न्यायको दिनाता हेन्जा द्याङगेलाइ कासेहेङ द्वावा, प्रभु-प्रभु, हाइ केलाइ नाङकोङ मिङता आगमबानि मादोअ्न्हाहि रो? कालाउ नाङकोङ मिङता केलाइ इङको भुत-आत्मागेलाइ माओल्लापानाहि रो? कालाउ नाङकोङ मिङता इस्तुङ भारबुसाइका कामगेलाइ मापानाहि रो? 23का नेलाइहेङ हेलाउ बुङ नाल्का मान्थुघा, का नेलाइहेङ झालाफालापा दोअ्ताङका, नेलाइ इङको दुस्ट काम पाकालाइ कासो दुरे हाने।
न्हे खालको साअ्को जग
(लुक 6:47-49)
24ओदोङ भाअ्सिङ हासु बुङ द्याङ काङको दोअ्का काथागेलाइ हिङखे कालाउ पाखे, वा दोङ बुद्दिमान द्याङ भाइका ताइको साअ् उन्ठुइको बल्लियाका जोक ह्रुता धाम्खे। 25कालाउ इन्ता बारका वाइ लोहि, बाने बुङ लोहि, कालाउ दुर भेरमा बुङ लोहि कालाउ इङको साअ्ता थुन्हाहि, कालाउ बुङ इङको साअ् मालोङहि, हाइपालिपानु इङको साअ् उन्ठुइ ह्रुता धाम्का हिघाहि। 26हिदोइ बुङ द्याङ काङको काथा हिङखे कालाउ बुङ माकिखे, उङको एनोङ मुर्ख द्याङ भाइका, जाइ ताइको साअ् बाला ह्रुता धाम्हि। 27कालाउ वाइ लोहि, बाने बुङ लोहि कालाउ दुर भेरमा बुङ लोहि कालाउ इङको साअ्ता थुन्हाहि, कालाउ इङको साअ् ह्रानातेङ भत्ता-भुङग जेङहि।
28जेलाउ येसु इङको काथा दोअ्लि दोतेङ द्याङगेलाइ वाको धिरपाका हिङहि झाराङ वाको धिरपाकाता भाङ-भाङहि। 29हाइपालिपानु येसु इम्बालाइहेङ मोसाको व्यवस्था धिरपाका द्याङगेलाइ भाइपा माको, वाते इसिका सिक्स्यक हि, कि वाको खाबाराता धिरपाघाहि।
Šiuo metu pasirinkta:
मति 7: DHINT
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Dhimal New Testament, by The Love Fellowship is licensed under Creative Commons Attribution-ShareAlike 4.0 License.