Luka 23
23
A Wunak Yesu nggen Bilatusaa
(Mat 27.1-2,11-14; Mar 15.1-5; Yoh 18.28-38)
1Pang nzup maa angaa lǝngaa nung maa angaa Yahudu a wunak Yesu nggen Bilatusaa. 2Shee a ɗǝ kǝ ryakghaa Yesu nung, a sheeki ka, “Wo sok ma kǝng yarsa aɗoo maa swaa war. Ng ɓana war ka, ‘Ko ɗǝ kǝ naa Kaisar pyar ndar rak, ng sheeki ka, meni Kǝristi, Ruu.’ ”
3Shee Bilatus yiɓǝn ma ka, “Woni ruu maa angaa Yahudwa?”
Shee Yesu pal ma ta ka, “Ng kaɓan ni, kee mang kaa shee pan.”
4Pang Bilatus ɓan amushori maa sungwarin Vitor ɗǝ ɓum maa sum kyaa ka, “Ng sok sum mari ɗǝ ram rak.”
5Nzup ɗǝ kaɓan a ɗak ta, a sheeki ka, “Ɓwak nanzu aɗoo maa sum maa ɗǝ maksa mee ta nzup maa ndarng Yahudiya. A ɓee kap awuna mee ri kǝshii Galiliyaa ni, pang a ɓee taa gang tǝɓii ri.”
6Kǝ Bilatus yir kaɓan, yiɓǝn ka, “Sum mari ki ng mu Galili nyaa?” 7Kǝ Bilatus yok ka sum ki mu ndar kǝ Hirudus wuraki ni, Shee ton ma ta Hirudusaa, kǝng mee kǝshii Urushalimaa ni taa yisa kyaa.
8Kǝ Hirudus ɓee Yesu, shee aɗoo mee katli, tung ka fedna kǝng yaraki ka kǝ sok ɓyaa mee. Ɓwak yir awenaa ta shii myaa, rud ka kǝ ɓee Yesu kǝng shaa banji maa wuu. 9Hirudus yibsǝn Yesu awuna pyak, nzup ɗǝ kaɓan Yesu pal ma ta rak. 10Amushorin maa sungwarin Vitor ɗaa angaan maksan shiiring Musa a lǝr nggena kaa ryakghaa ma nung ɗǝ tura ka shii yaa duk. 11Shee Hirudus ɗaa fuu maa pok mee a ɗǝ kǝ shiishala ma, a yara ma ɗǝ njeli. Shee a ryak maa kǝrɓǝt maa ruu, pang a por ton maa wunak Bilatus maa. 12Mari ni vii mang kǝ gaat ng kaa Hirudus ɗǝ Bilatus nak amar, tung ka ta yisan dǝbaryaa a mee shamaki ɗaa ɗakghai rak.
A Kom Nung shiin Wunan Yeswaa
(Mat 27.15-26; Mar 15.6-15; Yoh 18.39—19.16)
13Shee Bilatus tokshii amushori maa sungwarin Vitor ɗaa ruu ɗaa sum, 14shee ɓan yen ka, “Yin wutaak maa sum ri ka, ng yarsa aswaa war tung ka kaa bii awung kǝ amushorin ndar sheeki rak. Ta nggen yina nzup, ng ɓasa anung kǝ yin sheeri ta shii myaa, ng sok ma ɗǝ ram maa wung kǝ yin sheeraki rak. 15Hirudus maa sok ma ɗǝ ram rak, pang por ton ma wutaak tǝɓii ta waraa. Ɓyaan, shii awuɗakghai yaa mang kǝ sham kǝ kuu rak. 16Tung kaɓan ng ryakghaa kaa ruushii ma kǝng foo ma.” [17Nzup yisan Lakng Nyera, Bilatus ng ɗǝ fwaa yen maa sum gaat ta kǝshii maa angaan kaa shii ram kaa puksa jaarum maa mang kaa sum kwarshii.]
18Nzup ɗǝ kaɓan ɓum maa sum ki a byakshii nung a sheeki ka, “Wun ma! Foo war maa Barabas!” 19(A ɓwak ryak Barabasaa jaarum maa, tung nanzu aɗoo maa asum ta ndara a shii rom, pang wun sum.)
20Bilatus ruɗaki kǝ foo Yesu, shee ɓan ɓum maa sum ki nung tǝkwak. 21Nzup ɗǝ kaɓan a ɗǝ kǝ byaksa nung a sheeki ka, “Gwomji ma ta koning gandalangaa! Gwomji ma ta koning gandalangaa!”
22Ɓan yen nung mang kǝ taat ki, shee ka, “Tung ya paa? Yeni vishii maa wung kǝ shii paa? Ng sok ma ɗǝ ram kǝ gang mang kaa wuna ma rak. Ng ryakghaa kaa ruushii ma ni kǝng foo ma.”
23Nzup ɗǝ kaɓan a byakshii nung shadshan a sheeki ka, kaa gwomji ma kooni gandalangaa. Tung byaksan nung yen ki, ryak kǝ Bilatus yir yen. 24Shee Bilatus shii yen maa awun kaa aɗoo yen ruɗaki. 25Shee foo yen maa sum mang kaa ruɗaki kǝ foo yen maa, sum ki kǝng kǝshii jaarum maa, nanzu aɗoo maa sum a shii rom pang wun sum. Nzup ɗǝ kaɓan nayen Yesu kaa shii awung kaa ruɗaki ɗǝ mee.
A Gwomji Yesu Koning Gandalangaa
(Mat 27.32-44; Mar 15.21-32; Yoh 19.17-27)
26Kaa ta wura nayang Yeswaa, a sham ɗǝ Siman mu Sarayin, kǝ war fan ndar yena, ng ta gwarshaa lǝra kǝshii banjin ndar kyaa. A cir koning gandalangaa ki foong maa, a ryak ma kǝ bii Yesu ɗǝ mee. 27Aɓum maa sum kaa byaa maa, ayii yen ta kǝshii yena kaa shiidnaki, a foosa wuri ɗǝ shiirka maa ɗoo tung mee. 28Yesu shiiɓǝl yis mee ta yena pang ɓan yen ka, “Yin naa yiin Urushalima kǝ yin shiidn tung min nak! Shidnan tung shii yin ɗaa awan yin. 29Tung ka, ayisa ta taa kyaa mang kǝ asum shee ka, ‘Angaan nggen kal ni, ayiin kǝ a tashii rak, ɗǝ teelin kǝ yel fan nak ɗǝ njerng kǝ fan soo yaa rak.’ 30Ta ayisa kyaa asum
“ ‘A ɓaa agenak ka, “Piran ta shii waraa!”
A ɓaa duuduu ka, “Puk war!” ’#23.30 Hos 10.8.
31Ng awuu mari ni sokghaa kǝtǝr kǝng laani, ta ɓyaa yinaa ng mee ni kori nakghaa kacee ni paa?”
32Asum mɓaa, kǝ a ɗaa angaa ram ni, a wunak yen ɗǝ Yesu tung ka kaa naa gwomji yen koning gandalangaa. 33Ng kaa ta gang ta arang kaa tokghaaki ka, “Tǝbongrong shii,#23.33 Tǝbongrong shii: Dakng kaa tok maa ka, “Tǝbongrong Shi.” Mee ni ka agenak ki war tǝbongrong shiin sum ni.” tǝɓang ɓang ni pang a naa ta gwomji ma koning gandalangaa, a gwomji angaa ram kyaa ta koning gandalangaa ket, gaat ta kwak tǝsheenaa gaat ta kwak melang myaa. 34Yesu shee ka, “Ɗǝ min, porshii aram yen kaa furyang, tung ka a yok awung kaa shaaki rak.” Shee a kapshii kǝrɓǝt mee shiin tyan pwaryaa.
35Asum kyaa Shambal pang a ɓyaaki. Amushori maa Yahudu a ɗǝ kǝ ɓaa ma nyaknyak, a shee ka, “Ɓwak a dǝshaa. Kǝ ɓwak shii mee ng mee ni Kǝristi mang Vitor, mung kǝ Vitor tee ma.”
36Afuu maa pok yeni maa a tari pang a ɗǝ kǝ rinza ma ta ket. A na ma min nzaram ka kǝ soo.#23.36 Ng warangaa ni kǝshiin And 69.21. 37A sheeki ka, “Ng wani ruu maa angaa Yahudu ni, ɓwak shii mu!”
38Nggaghaa ɗǝ mee, a gwomji warangaa ta shiin kooni gandalangaa kyaa ka, “MARI NI RUU MAA ANGAA YAHUDU.”
39Gaat ta kǝshii maa angaa shaan ram kyaa, kaa gwomji ma ta koning gandalangaa ɗǝ yen, ng rinza ma, shee ka, “Ng ta ka woni Kǝristi rakghaan? Ɓwak shiimu ɗǝ wari ket!”
40Pang gaat ta kǝshii maa angaa ram kyaa mok ma nung, ɓan ma ka, “Ɗaa maad! A shaa wop Vitor rak ɓetɗaa? Wokghai kǝ a kom yin maa toor yin gaaɗi ɗǝ mee yaa? 41Wari, wo bungaaki, ta shii maa wung koo shii yaa ni, sum mari shii vishii maa awen naa rak.”
42Pang shee ka, “Yesu, kaa gidak ɗǝ mak ng woni kap tǝruu mu!”
43Yesu pal ma ta ka, “Ng ɓana ku kǝduk-dukghaa, ɓari a ɗaa ɗǝ mak ta lokng fednaa.”
Kwaan Yesu
(Mat 27.45-56; Mar 15.33-41; Yoh 19.28-30)
44Kǝ a yara vii tǝɗoong shaa, shee ara taa shiirki puk ndar ki gang ɗǝdn sheemi taat mang vii. 45Vii kala pyaaki. Shee pǝri#23.45 pǝri: mee ni awung kǝ a kom ara ta nggen kǝshiin lokng Vitora a ka lǝraki ta kǝshii yee yaa ɓol gaat. War 26.31-33; And 31.6. kaa kom kǝshii lokng Vitor ta sari pang kabsan mɓaa. 46Yesu foo nung shadshan, shee ka, “Ɗǝ min, ta kwak mwaa ni pang ng kala awurki min.” Kǝ shee kaɓan, shee vuk fednaa mee mang kǝɗa pang kuu.
47Kǝ banji mushori fuu maa pok maa Roma ɓee awung kǝ wari, mak Vitor pang shee ka, “Duk dukghaa mari sum zar ni.” 48Kǝ nzup maa sum kaa tokshii tung kaa ɓee awung kǝ wari, ng kaa ɓee, aɗoo yen shiirki shee awun kok yen pang a kap shii niyang. 49Nzup ɗǝ kaɓan angaan kaa yok ma yaa, ɗaa yiin kaa bii ma kaa war Galili ɗǝ mee, a shambal yang, pang a ɓyaa awuna kyai.
Lwaan Yesu
(Mat 27.57-61; Mar 15.42-47; Yoh 19.38-42)
50Sum yen ta kaa tokghaa ma ka Yusufu, ng shee kǝduk dukghaa, ng sum zar ni, ng gaat ta kǝshii maa angaan komang nung maa Yahudwaa. 51Yusufu ɗǝ yala ˈyee maa awun kǝ aɗakghai mee ˈyeena ˈyaaki rak. War ndarng Aramatiya kǝng kǝshii Yahudiya, kǝng ta ˈyaa yis taan tǝruun Vitora. 52Yusufu nak ta Bilatusa pang kwarshii ka kaa na ma tǝpun Yesu. 53Pang cir ma wuu jirak, karkat maa ɗǝ pǝri pang naa ta ˈyii ara kun kaa shoɓi tǝtara, mang kaa luu muɗakghai yaa ta rak. 54Viin kambal ng kǝ angaa Yahudu kasa ɗaa yen tung Viin Fednaa maa Yahudu. Ɗǝ kǝryakghan ki ni kǝ Viin Fedna ki kaɓak.
55Ayiin kaa bii Yesu tari mang kaa war kǝshii Galiliyaa a bii Yusufu a naa ta ɓee ara kun ki, ɗǝ kaa basa ka, a ˈyii tǝpun Yesu ki kacee. 56Pang a niyang lokghaa ka kaa wutaa nggal ɗǝ noong ngol tung kaa turshii ta tǝpun kyaa. Nzup ɗǝ kaɓan a fedn viin fedna maa Yahudu kan kee awung kǝ shiiring Musa shee ri.
Šiuo metu pasirinkta:
Luka 23: (Boi) Tiyaa
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
©️2022 Luke Initiative for Scripture Translation