LUKA 24
24
Waasle/uú Yesu
(Mat 28:1-10; Marko 16:1-8; Yoh 20:1-10)
1Matlaatlér deelór Jumapiíliro, looa niwa tsiiríhh, /ameena iri amór /aantár keér, mooyangwdá' taa amohhe'eés kuri huúw. 2Naxés tawa hardáh, tlaa/adá' kaa gwangwaraá' amorqí alé dír /aantaro. 3Tari dáh baraá baa'a, ala slaqwtá Aako Yesu kaa ariiká. 4Tari amoqwaqwadín as tidá' taa ár. Naxés múk tsár aa dír bihhaaín i sihhiít oo tlabaá miirii/á' gaa tsiit. 5/Ameenadaádá' iri ló'wa da'ayút, sager'ín kari xupu'uús yaamií alé. Mukdaádá' gari báy, «Heé slaáf gár kus leelehhita' didár múk aa qaátl wa ale. 6Diirihe i kaahh, aa waasleé/. Inslawaagáy tidá' inós aa káh qoomár iwa baraá yaamaá Galilayár i kahhi, iwa káh, 7‹Garmoó Hee gár kuwa hariím aqo kun dabaá tlakuusér i qaas, nee kuri kikii', nee bál tám iri waaslee/.› »
8Axweesanayduú Yesu kuri insláy, 9tari tláy didár /aantár wa ale, tay kií/, kaangwí sleémeero kuri dír eeharuuseedá' mibaá nee wák i oó', nee awa hatlá' sleémeero. 10Nee /ameenadá' a ín Maria Magdalene, nee Yoana nee Maria aayór Yakobo, nee /ameenár hatlá' ar nee inooín ti alkoomá'. Tí an tidá' kaangwí gwa o' dír ya/abuusér i alé. 11Ala axweesanoó /ameenarí aa kát a adór axweesanoó dakti'iima dir'ine, slám kaa haratlintii'iiká. 12Ala Petro iri tláy ar ti'iingw ay dír /aanta. Iri xupuú' iri qaytsiít baraadií alé, nee gár aa ár a inqwaruudá' kura uuntsuús kilós kudá' taa tleéhh ar kitaáni. Iri kií/ amór do', i hara loohi waa/oo/amín daanduú tidá' aa tleehharuti.
Aa'aá Emau
(Marko 16:12-13)
13Baalaadár kilae awa tsár baraá tla/ángw eeharuuseero tana tláy, ta baraá gixsarka káy, ar umuuwós ta bay Emau. Saweemawós dír Yerusalemuwo a har adór kilomiíta mibaá nee wak. 14Qoomár inooín tawa loohír i dirii'i, ta axwees kilooín alé daanduú kangwdá' aa tleehharuuti. 15Qoomár tawa axweesi nee tiwa yaahamiisiya' kilooín alé, Yesu inósuú kilá' iri tseewúy dir'ín i alé, tari alhi'iít nee inooín. 16Ala ilaaín kiri boo/eés as munguwa tsaahhiyé'. 17Yesu giri báy, «Kaangwí a milá ta axwesa' tawa hi'ita'?»
Tari sihhiít, tari xumiís ar gurhaami. 18Kooko wák baraá tla/angw'ine, ta bay Kleopa, ina ilawaáts amór Yesu, iri oó', «Ahaá kuúng kilók a dahaaymoówo baraá Yerusalemuwo, tam muruudá' sleémeero aa baraadá' wa tleehharuumiit deeloorihe, kuwa xu'uká?»
19Giri yaahaás, «Ahaá, a muruú adoomá oo aa tleehharuut?»
Kuri báy, «Kángw Yesú Nasareti. Inós a aarusmo. Inós i aleesleemuú kón baraá tlehhemi'iiwo nee baraá axweesanto, dír geeraá Munguhe, nee dír muu sleémeerowo. 20Kaahamuusér uren ar Mungú, nee geeraharuuseerene inós kuri haniís kuwa sakwasleemuuti ar sakwasleemár gwa'ara, kuri kikií'. 21Atén geeraawo inós una haraxuaán tawa kudá' múk Israeli gu gweér. Slám iimír muruuwí iwa tleehharuumiít deelo laarí ar tám. 22Slám laarí /ameenarka baraá tla/angwrene atén tina dae tsát. Inooín matlaatleero nina tseewa amór /aantárí tlayé', 23ala naxés slaqwtós kaa ariiká. Tindiwa kií/ amoorén ta kaahi, ‹Malayke ana araán. Nee malaykeedá' i kat i slaaf.› 24Nee slamí awa hatlá' baraá tla/angwrene tana amór /aantárií daqáy, adoodá' /ameenadá' ngira kát, kari ár. Ala inós kwaa ariiká.»
25Yesu giri báy, «Kuungá' a tsuwa daktana. Kuungá' tundu tsuwa har gawdén mura' haratlintaaooro, kudá' sleémeero tinda alki/iít nee aaruuse. 26Ahaá, a gár xuawásle, Kristo slahh'amaayeerí ngiwa slay, nee iwa dahi baraá xirfuuwós i alé?» 27Yesu muruudá' sleémeero Gooi i kat daanduuwose guri dir'ín i xu'utimís, guri iimír kitaaba'aá Mosé wa iimu/ún ay aaruuse sleémeero.
28Tari tseewúy amór gixsadá' ta kay. Yesu ina hi'iít adór heé geerií kumiitár slaá'. 29Ala inooín kuri harhheehhe'eés ta kaahi, «Deeláng, asma looa aa dát, xweera naa xayé'.» Iri dáh as nee inooín tawa al'iwiwiiti. 30Qoomár tawa dinkwár i iwiít dír muruú /ayma, mukatmo guri óh, iri sluufiís, guri parhhamiís, guri hanmiís dir'ín. 31Ilaaín kiri gwa/atís, kuri sangw tsaáhh. Inós iri dír ilaaín wa qwaár. 32Tiri kilooín yaahamisiyé' tari káh, «Ahaá, muneerén kaa kwatimiítiíke, qoomár loohiro iwa amoorén i axweesi, nee Gooi ngiwa xu'utimiisi?»
33Hamtidár kilae tari tláy, tari kií/ Yerusalemu. Tawa hardáh eeharuuseedá' mibaá nee wak, taa dinkwárií burumburiít nee tidár hatlá' nee inooín aldinku'umamisá'. 34Eeharuuseedá' taa Yerusalemúrí áy iri ó', «Ar ló', Aako naa waasleé/, Simon nguna ár.»
35Kudá' tsár sleeme kangwdá' aa tleehharuut loohiro nguri kaahiyé', nee adór Aako kura tsaáhh, qoomár mukatmo nguwa parhhamiís.
Yesu eeharuuseerós ngiwa harati'iít
(Mat 28:16-20; Marko 16:14-18; Yoh 20:19-23; Tlehh 1:6-8)
36Qoomár tawa kaangwí axweesi, Yesu inósuú kilá' iri tla/angw'íní sihhiít, giri báy, «Wayda ilaoohaak.»
37Tari kwisliít, tari ló'wa da'ayuút, asma inooín ka xui gaa a hhaantamo. 38Giri báy, «Asma milá masa amoqwadé'? Nee asma milá mas xurumitá' baraá munerhunge. 39Dabaaeé' i qaytsitaak nee ya'aaeene. Asma a anuú kilá'. Án kwatiitaré' nee xuuxuaaré'. Asma hhaantamo i slaqwtá konká, laqaá fadu, ala aníng slaqwa nee fadu i koóm, adoorí kuungá' ir ga/eera'.»
40Axweesantí ooaro ngiwa hhe'eés, dabaawós giri laqán nee ya'aawose. 41Tam siiwadae kwaa haratlinti'iiká as qwala/, slám tari kumiít waa/oo/amooro. Yesu giri báy, «Muruú /ayma u koondá'a diirihe?» 42Kuri fu'unír i haniís ar siyoó taa kikií'. 43Gari óh gari geeraaín wa /aáy.
44Aluuwo Yesu giri báy, «Kaangwí a kudá' naa káh qoomár niwa dinkwár i dirii' nee kuungá', niwa káh tidá' sleémeero taa gooín daanduueén i alé, baraá hara'ayár Mosewo, nee baraá gooír aaruuseero, nee baraá Wara'amto, gár iwa hariin aqo in bó/ sleémeero.»
45Yesu sager'ín gari gwa/atís as Gooi kawa tsaahhi. 46Giri báy, «Tí a tidá' taa gooín tawa kaahi, ‹Kristo gár kuwa hariím aqo kun slahh'eemiis, nee bál tame nay waaslee/.› 47Nee sleeme kaa gooín tawa kaahi, ‹Kaangwí ku alki/iit ar umuueé' dír xoordu sleémeero tawa kaahi, hhu'u'uumé' as gurtleemuú tlakweema kuwa sleera'.› Kaangwí dír kuwa iimu/un an Yerusalemu. 48Kuungá' kilá' kaangwí u lamabu'uundá'. 49Nee ga/aawaagáy, Kudá' Baabuúeé' naa al'axweés aníng ngu amorhúngí ya/aáw. Ala kuungá' iwiwiité' baraaká' gixsarí wa ale, ay dír /uuruú gáwtá daáhh kway sleera'.»
Yesu iwa gawaá doori tsa/án
(Marko 16:19-20; Tlehh 1:9-11)
50Yesu eeharuuseerós gay geerahaár ay Betania, dabaawós gay tleés, inooín giri tsuúq. 51Qoomár inós ngiwa tsuuqun, tiri paraátl dir'ine, kurira tláy gawaá doori. 52Inooín kuri i tumbarara'aát, tari kií/ ay Yerusalemu ar qwal/uú úr. 53Umuúqo siiwaro inooín tana baraá Doó Mungú wa iwiwiít, tawa Munguú xirfayeemisi.
Šiuo metu pasirinkta:
LUKA 24: IRQW
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The Bible in Iraqw © Bible Society of Tanzania, 2004.