LUKA 18
18
Slaqsoó kwaalo'o nee har'ohusmo
1Aluuwo Yesu giri slaqsaywí báy as ngiwa intsaahhatisi, asma inooín gár kiwa hariím a Mungú ngun firiiriná' daqisleém, tam matawa mune sií'. 2Iri oó', «Har'ohusmooko baraá gixsarkaaro i deer. Inós i Mungú ilaiwa/aa/atiiká, slám inós muu gu gaárí xuiiká. 3Nee baraá gixsadae /ameenirkar kwaalo'o i deer. Inós gun i kwasleemárií aaeér, as ngiwa alee/iisi dír wakusmoowose, tidá' inós wa hariim ngiwa sleer. 4Nee har'ohusmoodá' iri ala sií', aluuwo iri baraá muunaáwósí oó', ‹Aníng a Mungú ilaiwa/aa/ataaká, slám muu u gaárí xuaaká. 5Ala kwaalo'oorí aníng i daawitamís. Bira adoorír kumít, aníng alhhe'eesaywo i slaaqatís daawitamisuwo, ala gár kas hhoó' aníng an alee/iís, as hariímarós ngiwa sleer.› »
6Aako iri oó', «Har'ohusmoodá' gan'amuú tlehhiitaaká ugwa axasí'iíke adór aa káh. 7Xáy, Mungú mukós kudá' aa tsawaár gu ak alee/iísiíke, hariímar'ín ngiwa slay, kudá' inós nguy /aa/amiimá' tlaatla/aangw nee xweeraawo? Inós i hargawdúya ngiwa alee/iisi? 8Án a kah, hariímar'ín ga haniis ar gaanslaay. Tam adoorihe qoomár Garmoó Hee binda kií/, haratlintaao ga ári baraakaá yaamuwo?»
Slaqsoó heé Farisayo nee ohomusmoó koódi
9Yesu slaqsaywí guri malé dir'íní oó' as mukko taa kilooín harafaar tawa múk hota ganaá', múk hatlá' sleémeero kuri waaqaqaá', giri báy, 10«Múk tsár ina tsa/án amór Doó Mungú, ta saalíngw áy. Oo wák a heé Farisayo, nee oo tsár a ohomusmoó koódi.
11«Heé Farisayo ina sihhiít, iri adoorír firín kilós alé, ‹Mungú, án kuúng u sluufmiís, asma aníng a adór múk hatlaeeká, a adór fisuuseerooká nee adór al/aymuuseerooká nee adór fuquuseerooká, laqaá a adór ohomusmoowú koódirooká. 12Aníng an gwaawawiím baraá wiíkír wake sagaáwa tsár. A ilahhooár hanimaamiís baraá daqaari'iimar'eé' sleémeerowo, ar wák baraá mibaango tawa ar Mungú.›
13«Ala ohomusmooduú koódi amorqá' saaw gana i sihhiít. Sleeme tam iwa gáwtí qayti gaa qiitliiká, aqo har da/ewawós gina pupuxuumiís, iri oó', ‹Mungú, án gurtlawáng! Aníng a heé tlakweemaá koóm.› 14Án a kah, kwí iri waátl amór do'ós, kwí kilós an kudá' taa gan'amií harafaár. Asma kudá' ti kilós ureemiís, ku niinawees, nee kudá' ti kilós niinaweemiís, ku urees.»
Yesu na/ii ngiwa tsuúq
(Mat 19:13-15; Marko 10:13-16)
15Na/aá ninakw kina amór Yesú ii huúw as dabaawós ngiwa gawaaínií qaasi nee ngiwa tsuuqi. Ala eeharuuse adoodá' ngiwa aán, mukdá' na/aá koóm guri iigahhát. 16Ala Yesu giri ateét amoorós, iri oó', «Na/aá ninakw mawaagáy ni amor'eé' hardihiye', mi ila/aamara'. Asma awa adór kuká', waawuti'iimár Mungú a tooín. 17Án a kah, heé waawuti'iimár Mungú gaa ya/aniiká adór na/oó niinár alé, i baloó dahiiká baraá waawuti'iimarihe.»
Masoomoó daqaarmo
(Mat 19:16-30; Marko 10:17-31)
18Heeko úr Yesu guri yaahaás, «Intsaahhatusmoó hhoó', adór ni laaq a adoomá ar slafíngw alhhe'eesay wásl ngur aal?»
19Yesu guri báy, «Mis hhooeemár ateetiín? Heé hhoó' i kaahh, aqo har Mungú kilós. 20Ahaá baré hara'aya a xú', ‹Fuqi ma awaar, Hee mu gaasaar, Gár hee ma fiisaar, Hee mu /aysántií tsataar, Baabuúwók nee aayo ilaiwawa/eek.› »
21Iri oó', «Tisíng aga boo/eés sleémeero iimír na/uumar'eé' wa ale.»
22Qoomár Yesu tí ngiwa axaás, guri báy, «Tam hamí gár wák uga wa /aaruúr. Muruudá' ta koon sleémeero weeriseek, nee peésaadá' ta sleer ka narkuutér i qasmís. Daqaari'iimarók a gawaá doorí eér. Daqaní ni hardát, aníng i eehát.» 23Ala inós tí ngiwa axaás, iri ló'wa gurhaamuút, asma inós a ló'wa daqaarmo.
24Yesu gari tsaáhh adór ira gurhaamuút, iri oó', «Ga/aawaak, adór daqaare kar gawít dahmaá baraá waawuti'iimár Munguhe. 25Ka inslaahh angamía iwa waarahh ar baraá fooxár laqwa, ta daqaarmo iwa baraá waawuti'iimár Mungú i dahi.»
26Mukdá' aa axaas tari oó', «Ala barqo adoosíng heé ba/ám a heemá?»
27Yesu iri oó', «Tidaádá' dír muko ya/aamaaká, dír Munguhe i ya/aán.»
28Petro iri oó', «Ga/aaweegáy, atén muruurén sleémeero ugwa geexawaán, kuúng uri eeharaán.»
29Yesu giri báy, «Án a kah, umuúqo heewo oo dooín gwa geexay, laqaá hareerós, laqaá hhaeewós, laqaá xwayliteérós, laqaá na/iiwós, as waawuti'iimár Mungú, 30inós muruú yaariír gun ak sláy hám baraá yaamuukae, nee baraá yaamaá hatlae slafíngw alhhe'eesay wásl gu sláy.»
Yesu gwa'araarós ngiwa malé sagaá wa tám wa oó'
(Mat 20:17-19; Marko 10:32-34)
31Yesu eeharuuseedá' mibaá nee tsár ganara tláy, gari báy, «Ga/aawaagáy, hamí a tsa/a/amaán tawa Yerusalémúr kawaan, nee tidá' sleémeero taa gooín nee aaruuse daanduú Garmoó Heewo i bó/. 32Asma ku qaas gawaá dabaá xoordaá hatlá'. Inooín kway niqín, kway /oosliislín, kway i nitsimiit, 33kway muux ar qaw'i, kway gaas. Bál tame niri waaslee/.»
34Ala eeharuuseerós tam /aymuú wák gwa tsahhiká baraá axweesanaydá' aa dir'íní kaahi. Gídaabár kaangwí kaa luú/ dir'ine. Sleeme kaa tsaahhiiká tidá' aa alki/iít dir'ín i alé.
Yesu heé taampa nguwa qaytsitís
(Mat 20:29-34; Marko 10:46-52)
35Yesu iwa tseewúy Yerikór i alé, heeko wák oo taampa aa iwiít afaá loohi, i múk firiirín. 36Qoomár boo/oó úr nguwa axaás iwa waaraahhi, iri yaahaás, «Gaa a milá?»
37Kuri báy, «Yesú Nasareti in waaraahh.»
38Tseeo gari iimu/ún, iri oó', «Yésu, Garmoó Daudi, án gurtlawáng.»
39Mukdá' aa giirin kuri iigahhaát as iwa xasliiti, ala inós tseeooro iri buúhh, «Garmoó Daudi, án gurtlawáng.»
40Yesu iri sihhiít iri oó', «Huwaare' amor'eé' alé.» Qoomár iwa tseewúy dír Yésú ii alé, Yesu iri oó', 41«Adór ta sla' ar u laaq a adoomá?»
Inós iri oó', «Aáko, gár ni slaa' a ilaaeé' niwa qaytsitiya'.»
42Yesu iri oó', «Ilaawók ni qaytsitiye'. Haratlintaaoorók ugwa hungu/ús.»
43Hamtidár kilae ilaawós nay qaytsitiyé', nee Yesu tari koné', inós i hara Munguú xirfayeemiis. Nee muu sleémeero adoodá' kawa ár, Mungú kuri xirfayeemiís.
Šiuo metu pasirinkta:
LUKA 18: IRQW
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The Bible in Iraqw © Bible Society of Tanzania, 2004.